Read Kahua ESEKIELE 7 Bible Online

ESEKIELE 7 - Kahua bible

ESEKIELE 7

¹Na Araha ki tamasi tangê, ki vi:

²“Gu karingê, igo karena enoni ma! Inê na Araha God kê vi, vi i Isiraele ki hato iana. I Isiraele hagenani ki hato iana.

³Isiraelita, i hato iami! Igamu kamu page hatamia na mangariaganiha raha iaku, suria inê be hagaitangigamu renigi na bagatauhami. Inê be hagaitangigamu meni na bagatarihami, gê kitenigi ngavê.

⁴I asa be hagamare surigamu. I asa be takigamu. Inê be hagaitangigamu meni na bagatauhami, gê kitenigi ngavê, hanana mu tahetara reniê, vi inê ka na Araha.”

⁵Inê na Araha God kê vi: “Na bagabevoani ka page tarahugamu hesurisuri.

⁶I hato! I hato noga! I hato iami!

⁷Na enoni, mu oga i na agua, ki hato iami noga. Ngaia ki na matena iami, mu hatohato igê. Na tangiana tanga. Na tangiana ni hetogotogoana. Na tangiana, i page magahuru igê na vagevageha igê na ngêsu igê na hungani.

⁸“Sugia ma vi igamu kamu hatamia na mangariaganiha raha iaku. Inê be hagaitangigamu meni na bagatarihami, gê kitenigi ngavê.

⁹I asa be hagamare surigamu. I asa be takigamu. Inê be hagaitangigamu meni na bagatauhami, gê kitenigi ngavê, hanana mu tahetara reniê, vi inê nga na Araha, gê hagaitangigamu.

¹⁰“I râ me noga na tangiana ni bagabevoani. I sugia ma. I hato iami. Na perenga ki ramo. Na paroparoha ki raha.

¹¹Na henahuita ki na hagaitangiha tangara na eragani nuni ngegana. Ngaira hato ka page mutemute. Na ruruguha iata, na raramohata, ma na atata, i rongo raha, ka page magahuru ngavê.

¹²“Na matena ngekê. Na tangiana ki hagarangi me noga. Na ani, i vurivuri, ki pe araria, vige obâbakoro. Na ani, i hagavuri, ki pe araria, vige obâbaera, suria na hagaitangiha iaku ki tarahura tagenata na ara ni nuni.

¹³Na ani, i hagavuri, ki bara, vige nahunia aporo na marâ, i bani hagavuringenia, naka ma ngaia ma na ani, i vuri tenia, karu mauri arihu, suria na mangariaganiha iaku ki tarahura na ara ni enoni. Na enoni, ga erataga, ki asa iata, vige page tahi.”

¹⁴Na Araha ki vi: “Na ringena na ahuri ki rongo raha. Na enoni hato ka nanêa na hearihatana, ma ki asa na hitangita, vige râ igê na hearihatana, suria na mangariaganiha iaku ki tarahura tagenata na ara ni enoni hato.

¹⁵Na henahuita ki ramo i metara i hinua, na ringa ma na magêha i rarona. Na ani i bemu ka page meme renia na hearihatana, ma na ani i hinua ka page meme renigi na ringa ma na magêha.

¹⁶Tani ka page gava tangagi na hungani, mangara na kuvê, ga hagavasira tenigi na maruguni. Ngaira hato ka page tangahurira renigi na tasi iata.

¹⁷Ngaira hato ki page arikuku na apeta ma ka page tatata ngavê.

¹⁸Ngaira ka page hagesuru tatari ma ka page angiangi maramara. Ngaira ka page magu ngavê. Ngaira ka page goro bê huri ma ki page nahuira ngavê na makiha.

¹⁹Ngaira ka page kasigi râ na golo ma na siliva iata ma ka page usitenigi ngavê mangagi na roro, suria na siliva ma na golo ki asa, vige hagatahira, matena na mangariaganiha raha iaku ki nahuira igê. I asa vige vuri ngêra renigi, hanana vige hato na magêha tenira, suria ngaigi kani katora ka bagaparongata.

²⁰I nago ngaira ka vagevagesigi na rêni iata ma ka katogi ki rono na siliva ma na golo iata. Ngaira ka tagarahigi na nunuta na ataro, gê kikitenigi ngavê, renigi. Tahema inê be katora ke makimaki tenigi na ruruguha iata.

²¹“Inê be nakara na mahuara ke hanago tenira. Na manero ka page rurugugi tenira na ruruguha iata ma ka page hagaerasigi ngavê.

²²I asa be urapusira, matena ga hoge ka bêbanu i Ruma ni Rotu iaku ma ka hagaerasia na ruma manimani iaku.

²³“Na enoni hato ka hetogotogo rârâ. Na manero ka aharêsia na agua, ma ki ramo na hearihatana surigi na hinua.

²⁴Inê be torera me na me ni marê getigi, na ani ga girara ga hagatavatava, ma be haganahunira renigi na ruma iami. Na mane ramo iami ka page maki ma na agua, mu vogasi igê, ka page era ngavê.

²⁵Mu page arikuku. Mu page gari makira renia na marapeha, ma ki bara vigamu tarahua.

²⁶Na bagabevoani ma na rongoha era ka page tarahugamu hesurisuri. Igamu kamu page nungira rapurapu na poropete renigi na marâ, ga bani hinarugi me. Na mane ni vogasiha ma na meraha ki hato, vige hagaotora nikâ na enoni.

²⁷Na maneraha ki page angi maramara, ma ki hato, vige page tako togo. Ma na enoni ki tatata na apeta. Inê be hagaitangigamu meni na bagatauhami, ma be surigamu, tagenana manga igamu mu surira na enoni getera. Igê na tarani ngegana igamu kamu page tahetara reniê igê, vi inê ka na Araha.”