Read Kahua ESEKIELE 9 Bible Online

ESEKIELE 9 - Kahua bible

ESEKIELE 9

¹Ma hemuri inê kê rongoa God, i ngere, ki vi: “Râ me igamu na mane tanga mu hagaitangia na hinua. Migirâ me na tangaruha iami, tanga mu mutea.”

²Ki parama, ma na vere ono na mane ga râ me tenia na maani na Ruma ni Rotu. Na ara ni hitangita ki tangaru. Henira ngaira ki râ me na mane, i tuguni siki ma ki rarahenia na marâ ni segeha iana igê na hogosina. Ngaira ka râ me ma ka ura hagarangia na bea na kapa ni vogasiha.

³Ma hemuri God raramohaga hunia iata na Isiraelita ki akê tenia na atohana i avorata na angero, ga mauri, ga tonga na gagahata, ma ki râ tanga na maani Ruma ni Rotu. Ngaia ki unia me na mane, i tuguni siki ma ki rarahenia na marâ ni segeha iana igê na hogosina, ma ki bonasia, ki vi:

⁴“Gu râhia na hinua hagenani i Jerusaleme. Gu segegi na raeta na ara ni enoni, ga hataera ma ka anumanuma, suria ga obaera renigi na tarani, ga erataga ngavê, ga katogi i hinua ikê.”

⁵Ma inê kê rongoa God, i vi tangara na mane getera, ki vi: “Mu râ suria, kamu nahu enoni. Siana kamu tihia tani. Siana kamu takia tani.

⁶Mu nahuira ka meme na meraha, na gapu haoru, na mane ma na gete, na kenata na kare ma na kere kare. Ma siana kamu hatarira na ani, i oga na segesegeha igê na raeta. Mu haganega nga ikê i Ruma ni Rotu.” Ngekana ngaira ka haganega ka nahuira ka me na enoni raha, ga ura i ngekana i maana na Ruma ni Rotu.

⁷God ki vi tangara, ki vi: “Mu hagaerasia na Ruma ni Rotu. Na gahuata na enoni ke manasigi na mahera ni Ruma ni Rotu. Mu râ nga!” Hoi, ma ngaira ka râ, ma ka nahuira ka me na enoni i hinua.

⁸Inê geteê ma kê oga so, matena ngaira ka nahuira na enoni. Inê kê tubê so i ano, ma kê ngere, kê vi: “Araha God, igo ko mangariaga ngavê tanga i Jerusaleme. I hega, igo ko mutera nikâ vari na kere Isiraelita, ga hita so?”

⁹God ki arami, ki vi: “Na ai ni Isiraele me Juta ka bagaparongata ngavê. Ngaira ka nahu enoni suria na agua hagenani, ma na eraha ki aharêsia Jerusaleme nikâ. Ngaira ka vi ma, vi inê na Araha kê pe bâsira ma kê bani pania na agua.

¹⁰Ma inê ki asa be takira. I asa iaku be tihia tani. Inê be hagaitangira hete meni na bagatauhata.”

¹¹Ma hemuri na mane, i tuguni siki ma ki segegi na raeta na enoni, ngaia ki aporo, ma ki hagarongoa na Araha, ki vi: “Na marâ, go bonasiê re, ki hato.”