Read Kahua TANIELE 1 Bible Online

TANIELE 1 - Kahua bible

TANIELE 1

¹Na oruta na harisi o Jehoiakimo ki maneraha surigi i Juta, o Nebukanesa na maneraha ni Babilonia ki taharia i Jerusaleme ma na mane ni me iana ka oga rihia na hinua.

²Na Araha ki naka, ki henahuraua na maneraha o Jehoiakimo henigi tani na kâkâ ma na apira apuna tanga na hagarahenga i Ruma ni Rotu. Matena i aporo i pasina, ngaia ki migirâ na marâ ngegana tanga na ngêsu ni ataro iana i Babilone henira tani na enoni, ma ki nakagi igê na kiboru tangagi na marâ na vogasiha ni ataro igê na ngêsu.

³Na maneraha o Nebukanesa ki bonasia o Asepinasi, na mane i bâsurigi na bêni na tagaraha, hanana i atera tani na mane haoru i berarogata na Isiraelita, i bani henahuraura. Ngaia ki atera tenira na raraha iana na maneraha i Juta se na raraha iata na enoni raha i ngekana.

⁴Hanana vi ngaira ka tagara i ruma iana na maneraha, na mane haoru ngegana ki ararira, vi bâkoro na bâbâhata, ki mataha na bêta, ga hagesuri maninga, ki rêrê na giraraha iata, ka apeape koro ma ka pe vovora era. Na maneraha ki kasia o Asepinasi, ki hagesurira, hanana ga girara ga tomatoma ma ka segesege igê na tamasinga ni Babilonia.

⁵Na maneraha ki naka, vi na ara ni tangiani ka vatera na ngêra ma na vaini, ga tagenani henigi na anita ngaia ma na kariana. Ngaira ka hagesuri surigi na harisi gi oru, ma hemuri ka kahu tagara tanga na maneraha.

⁶I berarogata na ani o Asepinasi ki atera, ngaira ka no Taniele, mo Hanania, mo Misaele, mo Asaria. Ngaira ngegê ka râ me tenia na raraha iana o Juta.

⁷O Asepinasi, i bâsurigi na bêni na tagaraha, ngaia ki urusigi na atata, ma ki hêtata vi Belotesasare, o Sitarake, o Misake mo Abetenego.

⁸O Taniele ki bani naka obana, hanana vi ngaia ki page usisi tenigi na ngêra ma na vaini, ga tagenani henigi na anina na maneraha, suria ngaia ki obania, vi arâ surigi na ramata ni matarotaroha igê na rotu. Tahema ngaia ki nungia o Asepinasi, ki tamania.

⁹God ki katoa o Asepinasi, ki kato, vi aganaria na nungiha iana o Taniele.

¹⁰Henaka, ma ngaia ki magutenia na maneraha. Tahema ngaia ki vi tanga o Taniele, ki vi: “Na maneraha ki bani nakagi na ngêra ma na tonoha tangago. Manga vi igo, ma ko pe apeape koro ma ko pe ramoramo mangara na mane tage apaparaha henigo, e, ngaia ki page nahuiê, kê meme.”

¹¹Hoita, o Taniele ki râ ki tamasi tanga na mane ni anumasiha, o Asepinasi ki bani naka, ki bâsurira ngaia ma na tamana gi oru.

¹²Ngaia ki vi tanga, i vi: “Gu uhungigami surigi na tangiani tangahuru gi tage. Go hagangêgami ma renigi na ruve ma na ve baranga.

¹³Ma hemuri ko hagakitakitagami henira na mane haoru, ga ngêgi na ngêra, ga tagenani ma henigi na anina na maneraha, ma ko bâsigami, manga ko hanana mi page bâ, ma ko kahu hagagatagatania na nungiha iaku se mareha.”

¹⁴Ngaia ki hagamarumu tangara, ma ki uhungira surigi na tangahuri tangiani.

¹⁵Matena i hato vikana, ngaira ka ape koro ma ka ramo ngavê teharira na ani, ga ngêgi tare na ngêra, ga tagenani ma henigi na anina na maneraha.

¹⁶Tahema tenia i ngekana na mane ni anumasiha ki hagangêra ma renigi na ruve, ma ki pe vatera na ngêra ma na vaini, i vatera na maneraha.

¹⁷God ki haganahunira na mane haoru ge he renigi na giraraha, na takoha mataha, na tomatomaha ma na segesegeha, ma ki katoa o Taniele, ki aitangisia ngavê, hanana i ramatenigi na maruteha ma na hinarunga.

¹⁸I murini na harisi gi oru, i nakagi na maneraha, o Asepinasi ki merarâ na mane haoru hato i pasina o Nebukanesa.

¹⁹Na maneraha ki meratamasi ngaira hato, ma ki tarahua, vi nga noga ma o Taniele mo Hanania, mo Misaele mo Asaria kani ga teha. Tahema ga atera ka tagara tanga na maneraha.

²⁰Henaka vi na maneraha ki akê me henigi na ani mavê na hagatenga se na herongogiana, ma ngaia ki tarahua, vi ngaira ma ge he ngegana kani ga teharira nga ngavê na mane ni hinarunga ma na mane ni mangata surigi na agua hato, i marungigi.

²¹O Taniele ki tagara rârâ tanga na maneraha ma ki tariha igê na matena o Kuro na maneraha ni Pesia ki henahuraua igê i Babilonia.