Read Kahua TANIELE 11 Bible Online

TANIELE 11 - Kahua bible

TANIELE 11

¹suria inê geteê ma kani gê bani tamania hagenago igê na harisi gi tage o Tario ni Metia ki maneraha suria. Hoi, be tamasi tangago igê na monariha.”

²Na angero ki vi: “Na maneraha gi oru ka page heheuri mêngara me i Pesia. I murita ngaira na heta na maneraha ki page akê me nogana. Ngaia ki page ruruguha ngavê teharira na maneraha hato i nago tarana. Matena i akê me, ngaia ki page raramohaga ngavê ma ki page ruruguha ngavê. Ngaia ma na mane ni me hato iana ka page hetehateha henia na maneraha i Agaia.

³“Ma hemuri ki page akê me na maneraha, i raramohaga ngavê. Na arahanga iana ki page râ hagatê ngavê. Ngaia ki page girara i katogi na ani mavê na marâ, i obanigi.

⁴Matena i akê me raha nga igê na arahanga iana, na raramohana ki page arumakaka, ma na arahanga iana ka voasia, ki voravora ke he. Na maneraha igê na raraha getigi ka page urusia ka maneraha, ma ngaira ka pe nahunia na ramoha manga ngaia.

⁵“Na maneraha i Esipito ki page raramohaga, ma ta na hitangita na araha iata na mane ni me iana ki page ramo teharia ngavê, ma na arahanga iana ki page râ hagatê nga.

⁶I murini tani na harisi na maneraha ni Esipito ki page surusuruheri henia na maneraha i Siria, ma ki page hagauragingenia ka karena henia, hanana na suruheri ngekana ki page gâga arihu. Na gete ngekana ma o vaniana ma na kareterua ka page nahuira ka meme henira na kariana, i merarâ.

⁷I murina ngekana tani na goana ki page urisi ki maneraha i Esipito. Ngaia ki page meraheariha na mane ni me iana na maneraha i Siria. Ngaia ki page henahuraugi na hinua nganganihaga. Ngaia ki page teharira.

⁸Ngaia ki page toregi vê tanga i Esipito na nunuta na harasita ma na apira ma na kâkâ ni hagarahenga, ga tagarahigi renigi na golo ma na siliva. Ma hemuri surigi tani na harisi ki page gâga na marapeha i berarogaterua ngaia ma na maneraha i Siria.

⁹Ma hemuri na maneraha i Siria ki page arâ ki meheariha i Esipito, ma ki asa vige page teha, suria ga tarigenia aporo.

¹⁰“O karena na maneraha i Siria ka page hagarêa na hearihatana. Ngaira ka page hakura na mane ni me gahu. Na hitangiterua o karena ngegana ki page sinogi na ara ni tarasini manga na ruarua. Ngaia ki page taharia nikâ na hinua nganganihaga iana na maneraha ni Esipito, suria ngaia ki na merongana.

¹¹Vikana na maneraha ni Esipito ki page mangariaga ngavê, ma ki page meheariha na maneraha i Siria, ma ki page henahuraura na mane ni me gahu iana.

¹²Ngaia ki page akê na ageagena, suria i teha, ma suria i mutera ngavê rako na mane ni me. Ma ki bara vige ama ni teha nga.

¹³Na maneraha ni Siria ki page akê me nikâ henira na mane ni me gahu teharia i nago. Igê na matena i nanê maninga igê, ngaia ki page arâ nikâ ki meheariha, i merarâ na mane ni me gahu teha ngavê henigi na tangaruha rako.

¹⁴“I na matena ngekana rako na enoni ka page merongasia na maneraha i Esipito. Taniele, tani na kariamu ramo ka page merongasia, suria ga marute, ma ngaira ka page vota.

¹⁵Na maneraha ni Siria ki page oga rihia na hinua nganganihaga, ma ki page henahuraua. Na mane ni me ni Esipito ki asa iata, vige page togeaga igê na hearihatana. Henaka nikâ na mane ni me ramo, ngaira nogata ka page mameaga.

¹⁶Na maneraha i Siria ki page katoa na merongana renigi na ani mavê na tarani, i obanigi, ma ki bara vige urapusia. Ngaia ki page ura i na Agua ni Suruha ma ki page têtê erasia.

¹⁷“Na maneraha ni Siria ki page togeaga, hanana i merarâ na me hato iana tanga i Esipito, hanana i henahuraua hagenani. Suria i obania, vi mutera na merongana, tahema ngaia ki suruheri henia na maneraha i Esipito, ma ki hagauragingenia ka karena henia. Ma na katoha iana ki asa, vige akê me.

¹⁸I murina ngekana ngaia ki page taharigi na hinua igê na tarasini, ma ki page henahuraugi rako. Ma ta na araha iata na mane ni me ki page teharia, ma ki page hatungia na paroparoha iana. Na paroparoha iana na maneraha i Siria ki page apariri bê aporo huria marena.

¹⁹Ngaia ki page taharigi na hinua nganganihaga i pasina marena, ma ki page vota hete. Ngaia ki page me, ke hato iana.

²⁰“Na maneraha, i urusia, ki page hagatorangenia ta na enoni raha igê na gavumane iana, hanana i hagamamasiaga apeta na enoni renigi na takesi, suria i obania, vi hagarahagi na ruruguha iana. I page arihu, ma ngaira ka page nahuia ki meme, mareha vi i maata na enoni, se vi igê na hearihatana, ma suria hete na vatevateha.”

²¹Na angero ki vi nikâ, ki vi: “Na maneraha, i urusia, ki page erataga ngavê. Ngaia ki pe oto tanga, hanana vige maneraha. I mareha rârâ ta na enoni, vige takusia, vi ngaia ki page voravora re na maneraha, ma ngaia marena ki vora so renia na maneraha, suria i hagahagabeka.

²²Ngaia ki page sinora ma ki page mutera na ani mavê na enoni, ga urapusia, ma ki page mutera nikâ na maneraha teha ni vogasiha iana God.

²³Ngaia ki page hagabekasigi na agua getigi renigi na suruhaheri henira. Ngaia ki page ama ni akê me raramohaga nga, henaka viga pe rako na enoni ga gahesuria.

²⁴Ngaia ki page hagagasuganira ma ki page henahuraugi na apaneni na agua, ga ruruguha ma ka koro ngavê. Ngaia ki page katogi na tarani, ga pe katogi noga na êvarina. Ngaia ki page henahuraugi na nahuninga iata na enoni ma ki page tonganira renigi na kariana. Ngaia ki page katokato, hanana vi taharigi na hinua nganganihaga. Henaka, ma ngaia ki sugi hato iana.

²⁵“Ma hemuri ngaia ki page togeaga, ki hakura na mane ni me gahu, hanana vi meheariha na maneraha ni Esipito. Ma na maneraha ni Esipito ki page nanê, hanana i meheariha bê aporo. Ngaia ki hakura na mane ni me gahu raramohaga ngavê, ma ki asa vi ngaia ki teha, suria ga hagabarasia.

²⁶Na mane ni hagaotonga iana, i tako togo renira, ngaira kani ga page hagabekasia. Rako na mane ni me iana ka page meme, ma na ani, ga tahitahi mêngara, ki page hato iata.

²⁷Ma hemuri na maneraha gi rua ngegana karu page gâga haku, karu katoa na nakuha. Ma na ara ni hitangiterua hegetigi ki page takotako ni erasia tani. Ngairerua karu hagabekasirerua heri ma. I mareha rârâ na hitangiterua, vige page teharia tani igê na katoha iana, suria na matena tanga vikana ki mamênga, vige akê me.

²⁸Na maneraha ni Siria ki page aporo i pasina henigi na nahuninga, i hanagogi, ma ki togeaga mênga, hanana vi hatungia na rotu iata na kariana God. Ngaia ki page katoa hato na katoha iana, ma ki kahu aporo i pasina.

²⁹“Ma i hemuri ngaia ki page meheariha aporo nikâ i Esipito. Ma i na matena ngekana ki page tora getea tanga.

³⁰Na me ni Roma ka page râ me igê na haka iata ma ka page taharia, ma ngaia ki page magutenira ma ki page aporo i pasina. “Ma hemuri igê na mangariaganiha raha iana ngaia ki page râ nikâ, hanana i hagamagahurua na rotu iata na kariana God. Ngaia ki page râ surigi na tamasinga iata na ani, ga bani kasia na rotu.

³¹Na mane ni me iana ka page katoa na Ruma ni Rotu, manga vi na ruma purua. Ngaira ka page hatungigi na vogasiha i na ara ni tangiani, ma ka page hagêrasia igê na nununa na ataro.

³²Na maneraha ki page hagamura na ani, ga bani kasia na rotu iata, hanana ga panepane henia, ma na ani, ga ama ni toto suria nga God, ka page urapusia.

³³Na enoni raha, ga tako mataha i berarogata na enoni, ka page hagatako obata na ani rako getera. Igê ma na kere matena ka hagamamasiagara ngavê. Ga nahuira tani igê na hearihatana, se ga sungira tani ka meme. Ga hanagogi na nahuninga tenira tani, ma ka kasira tani igê na ruma ni hagaitangiha.

³⁴Matena ga nahuira, tani na enoni ka tamanira na kariana God. Ma na ani ga rako ka hakunira ma hete ka nakanaka bêta tangara.

³⁵Tani na enoni raha, ga tako mataha, ka page me. Na tarana ngekana ki page uhungira na enoni, i page hagakorora ma ki page hagamatarotarora. Na tarana ngekana ki page gâga rârâ mataro me ki hatohato igê na matena, ga bani naka.

³⁶“Na maneraha ni Siria ki page katogi na ani mavê na tarani, i obanigi. Ngaia ki page hagarahasia marena, vi ngaia ki raha teharira na ara ni ataro hato, ma ki raha teharia nikâ na Araha God i teha. Ngaia ki page akê me nga vikana, mataro me na matena God ki page hatungia igê, suria God ki page hagamonaria nga na katoha iana.

³⁷Na maneraha ki page ruhira na ataro, na êvarina ka rahesira, ma nikâ na ataro, na gete ka hagarapera bâraha. Bâ, ngaia ki page ruhira rârâ ma na ataro, mareha ngavê vi ta kere ani, suria i vi, vi ngaia ki raha teharira ngaira hato.

³⁸Ngaia ki page hagahigasia hete na ataro, i anumasigi na hinua nganganihaga. Ngaia ki page vogasia renigi na golo, na siliva, na hê ahe ma na marâ getigi vigana na ataro, na êvarina ka pe bani hagarea me i nago.

³⁹Matena i tagarahigi na hinua nganganihaga iana, ngaia ki page hagêguri togo renia na harasita na enoni mamahuara. Na enoni, ga têa maninga na arahanga iana, ngaia ki page hagarahasira ma ki page kasira ka voravora re na enoni raha igê na gavumane, ma ki page vurira renia na mako.

⁴⁰“Na matena i sugi hato iana igê na maneraha ni Siria, na maneraha ni Esipito ki page taharia. Na maneraha ni Siria ki page meheariha bê aporo renigi na kati ni me, ma renira na hosi ni me, ma renigi na haka ni me rako. Ngaia ki page ramo manga na baga maguara raha. Ngaia ki page taharigi na tarasini, i riri igê. Na mane ni me iana ka page aharêsigi manga na maganuha raha.

⁴¹Ngaia ki page taharia nikâ na Agua ni Suruha, ma ki page mutera igê na rehagaro ma na rehagaro. Ma i Etome me Moaba ma na apanena hagenani i Amone ka page tahi.

⁴²“Matena i henahuraugi na hinua igê na tarasini, i Esipito nikâ ki asa, vige tahi.

⁴³Ngaia ki page rurugugi tenia i Esipito na golo, na siliva ma na nahuninga getigi i raha na meni. Ngaia ki page teharira nikâ na ai ni Libia me Etiopia.

⁴⁴Ma hemuri ta na rongoha tenia i kerekê ma tenia i Roma ki page tarahua, ma ki page katoa, ki takotako bâraha. Ngaia ki page mangariaga ngavê, ma ki page têtê ngangataga igê na hearihatana, ma ki page mutera rako na enoni.

⁴⁵Na maneraha ni Siria ki page hagêrasigi na ruma na gahu iana, na ani ga rakorako era, igê na bena i beraroaterua na asi ma na hungana apuna, i oga igê na Ruma ni Rotu. Ma ki asa ta na agua, vige tamania. Ngaia ki page meme.”