Read Kahua TANIELE 2 Bible Online

TANIELE 2 - Kahua bible

TANIELE 2

¹Na ruata na harisi o Nebukanesa ki maneraha surigi, ngaia ki marute. Ngaia ki nahuia na takoha, ma ki bara tanga vige mêru.

²Tahema ngaia ki unira me na mane ni hinarunga, na mane ni mangata, na mane ni matuha, ma na mane ni kuasiha, hanana viga ramatenia tanga na maruteha iana. Matena ga râ me ka ura so i maana,

³ngaia ki vi tangara, ki vi: “Inê ki nahuiê na takoha renia na maruteha iaku. Inê kê obania be girara na ta ki na girarana.”

⁴Ngaira ka aramia na maneraha igê na tamasinga ni Arama, ka vi: “Maneraha, gu mêri arihu! Gu visia me tangagami na maruteha iamu, hanana mi ramatenia tangago.”

⁵Na maneraha ki vi tangara, ki vi: “Inê kê bani takusia, vi igamu hete kani mu visia me igamu na maruteha iaku ma na ta ka na girarana. Manga i mareha, hoi, inê kê page unira me na me, ka ninigamu ma ka rugugugi na ruma iami.

⁶Manga ki manga igamu, ma kamu visia me na maruteha iaku henia na girarana, hoi, inê kê page vurigamu bâkoro ma kê page hagarahasigamu. Hoita, mu visia me na maruteha iaku henia na girarana.”

⁷Ma ngaira ka arami bê aporo tagenana ma, ka vi: “Maneraha, gu visia me maremu hete na maruteha iamu, megami kami kahu ramatenia vê na girarana.”

⁸Vikana na maneraha ki tamasi ramo, ki vi: “Gê bani giraragamu! Igamu kamu obania, vigamu hagababe. Igamu kamu bani girara, vi inê ki asa be urusia na takoha iaku.

⁹Manga mu pe visia me na maruteha iaku, inê kê page hagaitangigamu, igamu hato, renia na ani i tagenana na hagaitangiha. Igamu kamu bani heaganari so maremi, hanana vigamu mu hagabekasiê, suria mu hagêguri, vi na marâ ka page totora getigi. Mu visia me na maruteha iaku be rongo ma hanana gê tongesurigamu, vi igamu kamu girara mu ramatenia.”

¹⁰Na mane ngegana ka arami, ka vi: “Maneraha, i maveta hagenani ki mareha rârâ ta na enoni, ge girara, vige visia vê tangago na marâ, go obania, vigo girara. I mareha rârâ ta na maneraha, henaka vi na maneraha i raramohaga hunia ma ki rongo raha na atana, vige bonasira vikana na mane ni hinarunga, na mane ni mangata, ma na mane ni matuha, hanana vige katokato vikana.

¹¹Na tarana, go katogami renia, ki bara ngavê. I mareha vige araria rârâ ta na enoni, nga noga ma na ataro kani ararira, ma kani ngaira ka pe goga i berarogata na enoni.”

¹²Vikana na maneraha ki hêni mangariaga ngavê. Ngaia ki bonasira na me iana, ka nahuira ka me na mane hato ni hagaotonga iana i Babilone.

¹³Na maneraha ki bonasira na me iana ka nahuira na mane ni hagaotonga iana henira nikâ o Taniele ma na tamana.

¹⁴Tahema o Taniele ki râ i pasia o Arioko. O Arioko ngaia ki na araha iata na mane ni anumasiha iana na maneraha, i bonasia, hanana vi nahuira ka meme. Ngaia ki hagatogo surigi na tamasinga,

¹⁵ma ki hagatea o Arioko, vi tanu hega na maneraha ki bona rapurapu vikana. Tenia i ngekana o Arioko ki hagarongoa o Taniele renigi na marâ hato.

¹⁶Hoi, o Taniele ki oto râ i pasina na maneraha, ma ki nungia, hanana vi gurua akê nikâ na matena, hanana vi ramatenia igê na maruteha.

¹⁷Ma hemuri o Taniele ki aporo ma ki hagarongora na tamana o Hanania, mo Misaele, mo Asaria renigi na ara ni marâ hato.

¹⁸Ngaia ki vi tangara, ka nungia na Araha God ki takuira ma ki ramatenia tangara na girarana na maruteha, hanana vi siana ka meme henira na mane ni hagaotonga getera i Babilone.

¹⁹Igê nga na bungiana ngekana o Taniele ki marute. Ma igê na maruteha ngekana God ki ramatenia na girarana tanga. I hemuri o Taniele ki visia raha God na Araha, ki vi:

²⁰“Visia raha God tarê, ki bê ki arâ, suria ngaia ki raramohaga hunia ma ki tako mataha ngavê.

²¹Ngaia ki nakagi na mateni ma na bevoani. Ngaia ki atera na maneraha ma ki kasira vato nikâ. Ngaia ki mahatangenigi tangara na enoni na takoha mataha ma na girarana mora.

²²Ngaia ki hagahurasigi na marâ, ga pinihi ma ki bara tangara na enoni, vige giraragi. Ngaia ki giraragi na marâ naka ma igê na roto hono, ma na ara ni marâ i pasina ka mave.

²³God iata na êvariku, inê kê visigo raha ma kê hagarahasigo. Igo ko hagaramoniê ma ko hagamataha obaku. Igo ko aganaria na nunginungiha iaku ma ko hagagiraragami renia na aramiha na maneraha ki obania tenigami.”

²⁴Hoita, o Taniele ki râ i pasina o Arioko, na maneraha ki bani bonasia, vi nahuira ka meme na mane ni hagaotonga. Ngaia ki vi tanga, ki vi: “Siana ko nahuira. Gu meêrâ i pasina na maneraha, suria inê kê girara gê ramatenia tanga na girarana na maruteha iana.”

²⁵O Arioko ki merâ otooto râ o Taniele i pasina na maneraha o Nebukanesa, ma ki vi tanga, ki vi: “Maneraha, inê kê tarahua na hitangita na ai ni Juta, go bani henahuraura, i girara i ramatenia na girarana na maruteha iamu.”

²⁶Na maneraha ki hagatea o Taniele, ga hêtana nikâ vi o Belotesasare, ki vi: “Igo ko girara vari na maruteha iaku ma ko girara vari, vigo ramatenia na girarana?”

²⁷O Taniele ki arami, ki vi: “Maneraha, na tarana go hagateê renia ki bara ngavê tangara na mane ni mangata, ma na mane ni matuha, ma na mane ni hinarunga se vi na mane ni giraraha ni higu.

²⁸Ma na Araha God kani gâga hete, i hagabângenigi mave na marâ, ga pinihi. Ngaia ki hagagirarago, maneraha, renigi na marâ, ga page voravora me i muri me. Hoi, inê be visia tangago na maruteha iamu, matena go mêru.

²⁹Manereha, matena go tâ ko mêru i banamu, igo ko marutegi na tarani, ga page voravora me i muri me. God, i giraragi na marâ ga pinihi, ngaia ki hagabâsigo renigi na marâ, ga page voravora me.

³⁰Hoi, ngaia ki hagagirarê inê nogaku renigi na tarani ngegana, mareha suria vi inê kê tako mataha teharira na enoni getera, ma suria hete i obania, vi igo, na maneraha, ko girara na girarana na maruteha iamu, ma ko rongorongo giraragi na takoha igê na aitangihamu.

³¹“Maneraha, igê na maruteha iamu igo ko bâsia na nununa na baga marâ raha, i togatoga ma ki mave. Ngaia ki ura me i maamu, ma ki bâ mamagutaga.

³²Na bêna ka tagarahia renia na golo. Na matona ma na rimana ka tagarahigi renia na siliva. Na gupina ma na kâna ka tagarahigi renia na kapa.

³³Na tangana ma na êgana ka tagarahigi renigi na aiani. Na vekurugani ugana ki tariha i na ababa ni ugana ka tagarahigi renia na aiani, ga toraria henia na mako.

³⁴Matena go bâsia, ngaia na baga hê raha ki apuri so me marena tenia na tarihu. Na hê ngekana ki hitarirerua na vekurugani ugana, ga tagarahigi renia na mako, ga toraria henia na aiani, ma ki menamenarirerua.

³⁵Na nununa hagenani na marâ ngekana ki parama, ma ki ehu ki amenamena. Na aiani, na mako, na kapa, na siliva ma na golo ka maramomoga manga na momo, i ahegenigi râ na roga, matena ga hatagi na marâ. Mareha rârâ tani na momo, vige hita so. Ma na hê akana ki raharaha manga na barana, ma ki buhia na maveta hagenani.

³⁶“Maneraha, nga na maruteha iamu ngekana. Hoi, i ngekê inê be ramatenia tangago na girarana.

³⁷Maneraha, igo ko raha teharira na ara ni maneraha hato. Na Araha God ki bani katogo, ko maneraha raramohaga ngavê, ma ki rongo raha na atamu.

³⁸Ngaia ki bani katogo, ko marungira na enoni hato i maveta ma na togoha ma na marâ ga mauri ma na manu hato. Na bêna, ga tagarahia renia na golo, ngaia kani go.

³⁹Ma i ta na matena i hemuri ta na arahanga ki page urusia na arahanga iamu, ma ngaia ki asa, vige page raramohaga manga na animu. Ma hemuri na oruta na arahanga ki page marungia na maveta hagenani. Ngaia ki manga na kapa.

⁴⁰Ma hemuri na heta na arahanga ki page nganganihaga manga na aiani, ki barugigi ma ki menamenarigi na ara ni marâ. Ngaia ki page menamenarigi ma ki page rumurumugigi na arahanga na ani i nago tarana, manga na aiani i menamenarigi na ara ni marâ hato.

⁴¹Igo ko bani bâsia, vi na vekurugani ugana ma na kakêni ugana ka na aiani, ga toraria henia na mako. Ngaia ki na girarana, vi na enoni igê na arahanga ngekana ka page voasira so mareta.

⁴²Ta apanena na arahanga ki nganganihaga manga na aiani, ma ta apanena ki asa vige gatagata manga na mako.

⁴³Igo ko bâsia, vi na kakêni ugana ka na aiani, ga toraria henia na mako. Na tarana ngekana ki vi, vi ngaira na maneraha igê na arahanga ngekana ka page uhungia, viga hakugi na ahemata iata igê na êragiha hetarênge, ma ngaira ki bara tangara, suria na aiani ma na mako ki bara, vigaru hetorariga.

⁴⁴“Igê na matena iata na maneraha ngegana, na Araha God ki page naka igê na arahanga, na ani i asa vige page hato. Henaka vi ta na maneraha o ti, ngaia ki asa, vige page teharia. Ngaia ki page hagamagahurugi ngavê hete na arahanga getigi hato, ma tanga so ngaia marena, ki asa hagetage iana, vige page hato.

⁴⁵Igo ko bani bâsia, vi ngaia marena na hê ki apuri so tenia na tarihu, ma ki hitaria na nununa na marâ, ga tagarahia renigi na aiani, na kapa, na mako, na siliva ma na golo ngekana. Igê na tarana ngekana na God raha hunia ki hagagirarago igê renigi na marâ, ga page vora i muri me. Ngaia nga nga na girarana na maruteha iamu. Na morana ngekana.”

⁴⁶Hoi, ma hemuri o Nebukanesa ki tubê so i ano ma ki hagarahasia o Taniele. Ngaia ki haribona, ka vogasia o Taniele ma ka susu tanga.

⁴⁷Na maneraha ki vi: “Na God iamu ki teharira na ara ni harasi hato. Ngaia ki na Araha, i marungira na maneraha hato. Ngaia getea ma ki giraragi na tarani hato ga pinihi. Tahema igo ko girara, go ramatenia na maruteha.”

⁴⁸Ngaia ki kasia akê o Taniele ma ki mahatangenigi tanga rako na mahatanga i bâkoro. Ngaia ki naka o Taniele, ki bâsuria na apanena hagenani i Babilone, ma ngaia nikâ ki na bêta na mane ni hagaotonga.

⁴⁹Suria o Taniele ki nungia na maneraha, tahema ngaia ki kasira o Siterake mo Misake ma o Abetenego, ka bâsuria na apenana hagenani i Babilone. Ma ngaia marena o Taniele ki oga so ma igê na ruma iana na maneraha.