Read Kahua TANIELE 3 Bible Online

TANIELE 3 - Kahua bible

TANIELE 3

¹Na maneraha o Nebukanesa ki haribona, ka tagarahia na nununa na harasina ma ka tagarahia renia na golo. Ngaia ki kerekê noga 30 mita ma na aberaberagana ki 3 mita. Ngaia ki haribona ka hagêrasia igê na bena i Tura igê na apanena i Babilone.

²Ma hemuri na maneraha ki bonasira na enoni raha hato ka haku me: na tamana ngaia, na mane ga bêngenia ta apanena na arahanga se ta na hinua, na mane ni hagaotonga, ma na mane ga totora takesi, na mane ni hagatamasiha, na mane ni ramata ma na enoni raha getera suria na agua. Na maneraha o Nebukanesa ki bonasira vikana ka haku me tanga na hagêrasiana na nununa na harasina.

³Matena na enoni raha hato ngegana ka haku hato me i maana na nununa na harasina,

⁴na mane ni tora tamasinga iana na maneraha ki tamasi raha, ki vi: “Mu rongo, igamu hato na enoni, naka ma tenia i he, se mu bâ marata, se vi na tamasinga ta!

⁵I sugia ma vigamu rongogi na ringeni na ahuri, na êhihi, na karakaraburu, na ukelele, na gita ma na marâ vigana. Matena i haganega na ringeni, igamu ki tuguhigamu, vigamu hatani tubê so i ano ma kamu rahesia na nununa na harasina na maneraha o Nebukanesa, i tagarahia renia na golo, ma ki hagêrasia ikê.

⁶Na ani ma na enoni i pe tubê so i ano ma ki pe rahesia, ngaia ki page kasia otooto râ igê na anguruna na baga gi raha.”

⁷Tahema, pusina ma na enoni hato, naka ma tenia i he, se ga bâ marata, se vi na tamasinga ta, ma ka rongogi na ringeni, ngaira ka tubê so ma ka rahesia na nununa na harasina, na maneraha o Nebukanesa ki tagarahia renia na golo ma ki hagêrasia.

⁸Na merongata na Siu ka naka tara tangara tani na ai ni Babilonia, ka ranganira na Siu.

⁹Ngaira ka hagarongoa na maneraha o Nebukanesa, ka vi: “Maneraha, gu mêri arihu!

¹⁰Igo, na maneraha, ko bani haribona, vi pusina ma i haganega na ringeni na ahuri, na êhihi, na karakaraburu, na ukelele, na gita ma na marâ vigana, ma na enoni hato ki tuguhira, viga tubê so i ano ma ka rahesia na nununa na harasimu, go tagarahia renia na golo.

¹¹Igo ko haribona nikâ, viga page kasia igê na anguruna na baga gi raha na ani mavê na enoni, i pe tubê so i ano ma ki pe rahesia.

¹²Ka oga nikâ tani na Siu, ga haritohego, maneraha. Ngaira ka na mane, go nakara ka bâsuria na apanena i Babilone. Ngaira ka no Sitarake, o Mesake mo Abetenego. Ngaira ka pe rahesira na harasimu, ma ka usi, vige tubê so tanga na nununa na harasimu, go hagêrasia.”

¹³I ngekana na maneraha ki hêni mangariaga ngavê. Ngaia ki haribona, ka merarâ me na vera oru ngegana i pasina.

¹⁴Ngaia ki vi tangara, ki vi: “Sitarake, Mesake mo Abetenego, i hega, i monari vari, vi igamu kamu usi, vigamu rahesia na harasiku? I hega, igamu kamu usi, vigamu tubê so i ano tanga na nununa na harasiku, gê tagarahia renia na golo ma kê hagêrasia?

¹⁵Hoita, be uhungigamu kê nikâ. Pusina ma mu rongogi na ringeni na ahuri, na êhihi, na karakaraburu, na ukelele, na gita ma na marâ hato vigana, mu tubê so i ano ma kamu rahesia na nununa na harasiku. Ma ki manga i mareha, hoi, inê kê haribona, ka rakugamu ma ka kasigamu igê na anguruna na baga gi raha. Mu takusia vari, vi tani na ataro ki girara, vi hagatahigamu teniê?”

¹⁶O Sitarake, o Mesake mo Abetenego ka aramia, ka vi: “Maneraha, igami kami pe obania, vigami aramigi na hagatenga iamu.

¹⁷Manga vi God, mi rahesia, ma ki girara vi hagatahigami tenia na anguruna na baga gi raha, ngaia ki girara i katoa. Ngaia ki page hagatahigami tenia.

¹⁸Ma ki manga i mareha, igami ki asa hagetage, vigami rahesia na ataro iamu. Ngaia kani gami visia ngekê, na maneraha. Igami ki asa ngavê, vigami tubê so i ano tanga na nununa na harasimu, go tagarahia renia na golo, ko hagêrasia.”

¹⁹Vikana o Nebukanesa ki mangariaga ngavê. Ngaia ki bâ ni mangariaga tangara o Sitarake, Mesake mo Abetenego. Tahema ngaia ki bonasira na kariana, ka ukua nga na gi, ki angênguruga.

²⁰Ngaia ki bonasira na mane ni me iana, na ani ga ramo teha, ka rakura na vera oru ngegana, ma ka kasira igê na anguruna na baga gi raha.

²¹Ngaira ka rakura henigi na gahu hato i apeta, na tuguni, na aruha ma na esare, ma ka kasira igê na anguruna na baga gi raha.

²²Na vavatana na gi ki ngêra na mane ni anumasiha, ga torera na vera oru ngegana tanga na gi, suria na maneraha ki haribona, ka ukua na gi, ki angênguruga.

²³Ma o Sitarake, mo Mesake mo Abetenego ka vota igê na anguruna na baga gi raha henigi na varo, ka rakura renigi.

²⁴Ma hemuri na maneraha o Nebukanesa ki parama, ma ki gasuga, ki hagareke akê. Ngaia ki aharira na mane ni hagaotonga iana ma ki hagatera, ki vi: “I hega, igia ka rakura na vera oru ma ka kasira igê na anguruna na gi?” Ngaira ka aramia, ka vi: “Ua, maneraha. I monari.”

²⁵Na maneraha ki arami, ki vi: “Ma ki tanu hega, inê kê bâsira na vere he, kani ga arârâ i rarona na gi. Na varo ki mareha i apeta, ma na gi ki bâ, manga i pe ngêra rârâ. Ma na heta nenuni ki bâ manga na angero.”

²⁶Vikana o Nebukanesa ki râ hagarangia na anguruna na baga gi raha, ki ngere, ki vi: “Sitarake! Mesake! Abetenego! Igamu na kariana God i teha, mu hura me!” Ma ngaira ka hura me otooto râ.

²⁷Ngaira hato na tamana na maneraha, na enoni gâ bâsurigi na apaneni na arahanga iana se na hinua, ma na enoni raha getera iana na maneraha, ngaira hato ka râ me, ka bâsira na vera oru ngegana. Na gi ki pe ngêra rârâ. Na varehuta ki goga mênga manga bani hanani. Na gahu iata ki bâ manga bani hanani. Ngaira ka pe sigini ni gi rârâ.

²⁸Na maneraha ki vi: “Ka visia raha na God iata o Sitarake, o Mesake mo Abetenego. Ngaia ki kasia me na angero iana, ki hagatahira na mane ngegana, suria ga rahesia ma ka hagêguri togo renia. Ngaira ka haritoheê, ma ka pe tako renigi na mêrihata, suria ngaira ka obania ma, viga rahesia na God iata mareta, ma ka usi, vige tubê so tanga na ataro getea, se vige rahesia.

²⁹Tahema inê kê haribona, ka ninia na ani mavê na enoni, henaka vi ngaia ma ki râ me tenia i he, se vi bâ marata, se vi na tamasinga ta, manga vi ngaia ma ki tamasia na ani ma na kere marâ, i pe koro renia na God iata o Sitarake, o Mesake mo Abetenego. Inê kê haribona nikâ, ka ruhuruhua na ruma iana. Ngaia getea ma na God iata kani hagatahira na enoni vikana!”

³⁰Ma na maneraha ki gurura akê nikâ o Sitarake, o Mesake mo Abetenego igê na bâsuriana na apanena i Babilone.