Read Kahua TANIELE 4 Bible Online

TANIELE 4 - Kahua bible

TANIELE 4

¹Na maneraha o Nebukanesa ki hagaguhia na tamasinga tangara na enoni hato i maveta, naka ma tenia i he, se ga bâ marata, se vi na tamasinga ta. Na tamasinga ki manga ikê: “Ge aharêsigamu na ramana!

²Inê kê obania be hagarongogamu renigi na tagaraha raha ma na mena, gê bâsia, i katogi na Araha God i teha.

³Na tagaraha iana God ka na hagakoneha ngavê. Na mena, i katogi, ka raha teha. Na arahanga iana ki asa, vige page hato. Ngaia ki Araha tare, ki bê ki arâ.

⁴“Inê, Nebukanesa, inê kê oga mareku i ruma raha iaku, ma kê vagevagesia na ramana raha.

⁵Ma i ta na matena gê tâ i banaku, inê kê marute. Na maruteha ngekê ki hagamagusiê ma ki haganumanumê ngavê.

⁶Inê kê unira hato na mane ni hagaotonga iaku, hanana vige ramatenia na girarana na maruteha iaku.

⁷Ma ngaira hato ka râ me, na mane ni hinarunga, na mane ni matuha, na mane ni hagataniha, ma na mane ni giraraha ni higu. Inê kê hagarongora renia na maruteha iaku, ma ngaira ki bara, vige ramatenia me.

⁸Hemuri o Taniele ki banu me. Ga hêtana nikâ vi o Belotesasare, na atana na harasiku. Na God apuna ki angaria. Tahema inê kê hagarongoa renia na maruteha iaku.

⁹Inê kê vi tanga, kê vi: Belotesasare, igo ka na bêta na mane ni hinarunga. Inê kê bani girara, vi na God Apuna kani angarigo, ma ko girara, go ramatenigi na marâ hato, ga pinihi. Inê kê marute. Gu visia me na girarana.

¹⁰“Matena gê mêru, inê kê marutea na baga apinige raha, i hura i gupuna na maveta.

¹¹Ngaia ki ama ni akê nga ki tariha i vavearo. Na enoni hato i maveta ka bâsia.

¹²Na ahani ki bâkoro ngavê. Ngaia ki rasi ngavê, ma ki ararira na enoni hato i maveta, viga ngaugi. Na marâ vasiga ka mamaro i mamarugana. Na manu ka beabea ma ka roborobo igê na arani. Na ara ni marâ ga mauri ka ngêgi na guani.

¹³“Matena gê tako harisuria na maruteha iaku, inê kê bâsia ta na angero, i rêra ni nanêha tare, i so me tenia na vavearo.

¹⁴Ngaia ki ngere raha, ki vi: ‘Tapia so na apinige! Retegi râ na arani! Rêsigi râ na ahani! Tokorenigi na guani! Tarigenira râ na marâ vasiga tenia na mamarugana ma na manu tenigi na arani!

¹⁵‘Mu naka so ma na barêrigana, ma kamu rugia renia na aiani ma na kapa. Mu naka so ma i ngekana, i gupuni na go. Ki araria, vi vokavoka renigi na kârupu, ma ke oga manga na marâ vasiga, se mangagi na rauga.

¹⁶Surigi na harisi gi pi ngaia ki page bara iana, vige takotako mangara na enoni, ma ki page mangara hete na marâ vasiga.

¹⁷Nga hanana ngekana igami na angero, mi ura ni nanêha tare, kami tarohenia. Vikê na enoni hato i maveta ka page tahetara, vi na Araha God i teha kani marungigi na arahanga iata na enoni, ma ki nahuni ramoha, hanana i mahatangenigi na arahanga ngegana tanga na ani mavê na enoni, naka ma vi na enoni purua ngavê.’

¹⁸“Nga na maruteha iaku, inê na maneraha o Nebukanesa ngekê. Hoita, Belotesasare, gu visia me nga na girarana. I mareha rârâ, vi ta na hitangita na mane ni hagaotonga iaku, vige girara ge ramatenia. Ma igo hete kani go girara, suria God Apuna ki angarigo.”

¹⁹I na matena ngekana o Taniele, ga hêtana nikâ vi i Belotesasare, ki gasuga ngavê, ma ki anumanuma, vige tamasi. Ma na maneraha ki vi tanga, ki vi: “Belotesasare, siana ko anumanuma renigi na maruteha ma na girarana.” O Belotesasare ki arami, ki vi: “Maneraha, manga na maruteha ma na girarana, ma ke tamasi renira na merongamu, vikê ke koro, ma ki tamasi renigo igo hete nga.

²⁰Na apinige, i borahu ngavê ki tariha i vavearo, na enoni hato i maveta ka bâsia.

²¹Na ahani ki bâkoro, ma ki rasi, ki ararira na enoni hato i maveta. Na marâ vasiga ka mamaro i mamarugana, ma na manu ka beabea ma ka roborobo igê na arani.

²²“Maneraha, igo nga ka na apinige ngekana, i borahu ma ki raha. Igo ko raha teha ngavê, ma na raramohamu ki tariha i vavearo, ma na arahanga iamu ki buhia na maveta hagenani.

²³Maneraha, nikâ igo ko bâsia na angero, i rêra ni nanêha tare, i so me tenia na vavearo, ma ki vi: ‘Tapia so na apinige! Tagahua! Naka so ma na barêrigana! Rugia renia na aiani ma na kapa! Ma naka so ma i ngekana igê na go. Naka vê ke vokavoka renigi na kârupu. Naka vê ke oga henira na marâ vasiga surigi na harisi gi pi.’

²⁴Manereha, na girarana ki tamasi renia na katoha iana na Araha God i teha renigo, maneraha iaku.

²⁵Na enoni ka page paigo, ma igo ko page gâga henira na marâ vasiga. Surigi na harisi gi pi igo ko page ngaugi na go mangara na puruka, ma ko page mauru i metara, ko vokavoka renigi na kârupu. Ma hemuri igo ko page tahetara, vi na Araha God i teha kani marungigi na arahanga hato iata na maneraha, ma ki nahuni ramoha, hanana i mahatangenigi tanga na ani mavê na enoni, i obania.

²⁶Na angero ka haribona, viga naka so ma na barêrigana. Na girarana ki vi, vi igo ko page maneraha aporo, igê na matena go tahetara igê, vi God kani marungia na maveta hagenani.

²⁷Hoita, maneraha, gu râ suria na hagaotonga iaku. Gu urisi parongamu. Gu katogi na tarani, ga oto. Gu komanira na ani ga matareha. Vikana ma hanana go page ama ni gâga nga igê na ramana.”

²⁸Na tarani hato ngegana ka tarahua na maneraha o Nebukanesa.

²⁹I murini ma na hageha tangahuru gi tage matarerua ngaia ki arâ igê na aberaberagana na gerina na ruma raha iana.

³⁰Ngaia ki tako so marena, ki vi: “E, Babilone ki na hinua raha hunia ngavê! Inê nga kani gê tagarahia. Ngaia ki na bêni na hinua. Ngaia ki hagabângenigi na raramohaku, na arahanga iaku ma na tarotarohaku.”

³¹Pusina ma i tamasi hato râ vikana, tani na ringe ki râ me tenia na vavearo, ki vi: “Maneraha o Nebukanesa, gu karingê! Igo ko hato, vigu maneraha.

³²Na enoni ka page paigo. Igo ko page gâga henira na marâ vasiga, ma ko page ngaugi na go henira na puruka surigi na harisi gi pi. Ma hemuri igo ko page tahetara, vi na Araha God i teha kani marungigi na arahanga iata na maneraha, ma ki nahuni ramoha, hanana i mahatangenigi tanga na ani ma na enoni, i obania.”

³³Na tamasinga ngegana ka vaga me mave otooto râ. Na enoni ka paia, ma ngaia ki ngêngê na go mangara na puruka. Ngaia ki vokavoka renigi na kârupu. Na varehuna ka borahu mangagi na varehuna na ahetaronga. Na misini rimana ma na êgana ka borahu mangagi na kakêta na manu.

³⁴“Hoita, i murini na harisi gi pi inê, Nebukanesa na maneraha, inê kê atakê i vavearo, ma ki koro aporo na takoha iaku. Inê kê visia koro na Araha God i teha, i bani oga me kere vê noga, ki bê ki arâ. Inê kê hagarahasia ma kê visia raha. Inê kê vi: Ngaia ki Araha tare, ki bê ki arâ. Na arahanga iana ki asa, vige page hato.

³⁵Tanga ngaia na enoni i maveta ka na marâ purua ma. Ngaia ki marungira na angero i pasina ma na enoni hato i maveta. Na enoni ki bara, vige teharia, se vige hagate susuria.

³⁶“Matena i koro aporo na takoha iaku, inê kê nahunigi aporo nikâ na ramoha, na arahanga iaku ma na tarotarohaku. Na mane ni hagaotonga iaku ma na enoni raha igê na gavumane ka vatugiê aporo, ma inê kê vora re aporo na maneraha iata, ma na arahanga iaku ki raha teharia i nago.

³⁷“Tahema inê Nebukanesa kê visia raha na Araha God i teha. Inê kê hagahigasia ma kê hagarahasia. Na tauhana ki koro ma ki oto tare. Ngaia ki girara i hagavotarira na ani ga hagarahasira mareta.”