Read Kahua TANIELE 9 Bible Online

TANIELE 9 - Kahua bible

TANIELE 9

¹O Tario, karena o Ahasuero, ki marungia i Babilonia. I pasina kani Metia.

²Na harisi gi tage iana i maneraha suria, inê Taniele kê hagesuringenigi na buka apuna. Inê kê takusigi na hinarunga iana God tanga o Jeremia, vi Jerusaleme ki aruhuruhu surigi na harisi tangahuru gi pi.

³Inê kê avarasia nga na Araha God. Inê kê nunginungi nga. Inê kê harihari. Inê kê hagesuru tatari. Inê kê ape ruruhi.

⁴Inê kê avarasia na Araha God iaku, ma kê visigi mataha na tasi iata na kariaku. Inê kê nungi, kê vi: “Araha God, igo ko raramohaga hunigo. Igami kami hagarahasigo. Igo ko toto suria tare na suruheri iamu henira na kariamu. Igo ko ama ni takuira nga na ani, ga takuigo ma ka marupegi na ramata iamu.

⁵“Igami kami haritohego. Igami kami erataga ma kami bagaparongamami. Igami kami kasigi râ na ramata iamu. Igami kami pe râ surigi na hagesuringa iamu tangagami.

⁶Igami kami pe tê viteata na kariamu na poropete. Igo ko tamasi i harata tangara na maneraha ma na enoni raha iamami, tangara na êvarimami ma tangara na enoni hato.

⁷Igo Araha, ki oto tare na tauhamu. Igami ki ararigami, vigami maki. Igami hato kami maki, igami na ani mi oga i Juta ma i Jerusaleme, ma na Isiraelita nogata, go bani tokorenira surigi na marê getigi, na ani hagarangi ma na ani hagatê, suria igami kami pe toto surigo.

⁸Igami kami maki, suria na maneraha ma na enoni raha iamami ma na êvarimami ka bagatauhata, ma ka haritohego, Araha.

⁹Igo Araha God, igo ko takuigami ma ko bonotenigi na tasi iamami, naka ma mi haritohego.

¹⁰Araha God iamami, igami kami pe tê viteamu, suria igami kami pe râ surigi na ramata iamu, go vategami, matena go tamasi i harata na kariamu na poropete.

¹¹Na ara ni enoni hato i Isiraele ka aharêngigi na ramata iamu. Igami kami pe botage renigi na tamasinga iamu. Igami kami guguruga bâraha tangago. Tahema igo ko hagaitangigami renigi na hagaitangiha, i bani visigi na kariamu o Moise igê na Buka ni Ramata.

¹²Igo ko hagamonarigi na tamasinga iamu. Igo ko hagaitangigami, igami ma na maneraha iamami. Igo ko hagaitangia Jerusaleme teharigi na ara ni hinua hato getigi i maveta.

¹³Na ara ni hagaitangiha hato igê na Buka ni Ramata iana o Moise ka bani tarahugami. Ma henaka, Araha God iamami, i asa iamami, vigami hagakoro obamu, suria mi pe urisi parongamami ma kami pe râ suria na morana na tamasinga iamu.

¹⁴Tahema, igo Araha God iamami, igo ko hagamonarigi na hagaitangiha, go bani visigi, suria igami kami pe tê viteamu, ma na tauhamu ka oto tare.

¹⁵“Araha God iamami, igo ko raramohaga hunigo, suria go bêngenira hura na kariamu tenia i Esipito. Tahema ki rongo raha na atamu mataro me i ngekê. Igami kami bagaparongamami ma kami bagatauhamami.

¹⁶Araha, igo ko bani anumasigami me hagarako. Tahema siana ko ama ni mangariaga nga tanga i Jerusaleme. Ngaia ka na hinua iamu igê na hungana apuna iamu. Na enoni hato igê na agua rihigami ka ruhia Jerusaleme ma ka manavatenira na kariamu renigi na tasi iamami ma na bagatauhata na êvarimami.

¹⁷God, gu aganarigi nga na nunginungiha ma na avarasiha iaku. Gu tagarahia aporo na Ruma ni Rotu iamu, i bani aruhuruhu, hanana na enoni hato ka page tahetara renigo, vi igo ko God.

¹⁸God, gu aganarigami. Gu bâ, igami kami mamasiaga ngavê. Bâsia na hinua iamu, i aruhuruhu ngavê. Igami kami avarasigo, mareha vi suria ga oto na tauhamami, ma suria hete i raha i pasimu na takuiha.

¹⁹Araha, go rongogami! Araha, gu bonotenigi na tasi iamami. Araha, gu botage renigami ma ku tamanigami, hanana na enoni hato ka page tahetara renigo, vi igo ko God. Siana ko hagarihu! Igo ko nahunia na hinua ikê ma na enoni ngegana ka na kariamu.”

²⁰Inê kê ama ni nunginungi nga. Inê kê visigi mataha na tasi iaku ma na tasi iata na kariaku na Isiraelita. Inê kê nungia nga na Araha God iaku, hanana i tagarahia aporo na Ruma ni Rotu iana.

²¹Matena gê nunginungi mênga, Gabiriele, gê bani rigia igê ta na maruteha iaku i nago, ngaia ki gaha me tangê. Ngaia ka na matena ni vogasiha ni manurahitana.

²²Ngaia ki vi tangê, ki vi: “Taniele, inê kê râ me ikê, hanana gê ramatenia tangago na tamasinga poropete, ko girara.

²³Matena go hagenago ko avarasia God, ngaia ki aganarigo. Ngaia ki takuigo. Tahema inê kê râ me, hanana gê merâ me na girarana tangago. Hoi, gu karinga maninga, matena gê ramatenia na girarana na maruteha tangago.

²⁴“God ki bani nakagi na tangahuru gi pi hagepi na wiki tangara na kariamu ma na hinua apuna, hanana ga murisigegi igê na tasi iata ma ka urisi parongata. Ngaia ki page bonotenigi na tasi iata, ma ki page vora me na otoha, i asa vige page hato. Vikana na maruteha ma na tamasinga poropete ka page vagavaga me mave, ma ka page hagapua aporo na Ruma ni Rotu.

²⁵Go karinga maninga, ko girara. Haganega tenia na matena, ga haribona ka tagarahia aporo igê i Jerusaleme, mataro me ki page arâ me na maneraha, God ki atea, ngaia ki na harisi gi pi hagepi. Jerusaleme ka page tagarahia aporo henigi na tara ma na mahera, na para ma na bebetehe. Na hinua ki page oga surigi na harisi tangahuru ge ono matarerua hagepi. Ngaia ki na matena tangagi na bagabevoani.

²⁶I murina ngekana na maneraha, God ki bani atea, ka page nahuia ki meme. Mareha ta na enoni, vige urusia. Na mane ni me iana ta na maneraha raramohaga ki page taharia i Jerusaleme, ma ka page ruhuruhua na hinua henia na Ruma ni Rotu. Na hatongina ki page manga na maganuha raha, i toregi me na hearihatana ma na aruhuruhunga, God ki bani nakagi.

²⁷Na maneraha ngekana henira rako na enoni ka heaganari surigi na harisi gi pi, ma i gupuna na matena ngekana ngaia ki page hatungigi igê na vogasiha ma na hagarahenga. Ga page hagêrasia na nununa na ataro igê na agua i akê i Ruma ni Rotu. Ngaia ki page gâga rârâ i ngekana mataro me na ani, i naka, ki page meme igê na tarana, i bani naka God tanga.”