Read Kahua BELO 1 Bible Online

BELO 1 - Kahua bible

BELO 1

¹I murina i me na maneraha o Asituagesi, o Kuro na mane ni Pesia ki urusia ki maneraha.

²Na maneraha o Kuro ki katoa o Taniele renia na tamana koro ngavê, ma ki hagahigasia teharira na ani getera na mane ni hagaotonga iana.

³Na ai ni Babilonia ka nahunia na nununa na ataro, ga hêtana vi Belo. I na ara ni tangiani ngaira ka vogasia renigi na paike tangahuru matarerua na koni, ma renira na tangahuru ge he na sipi, ma renigi na tangarê gi rua na lita na vaini.

⁴Na maneraha o Kuro ki tongesuria nogana, vi Belo ki na ataro, ma i na ara ni tangiani ngaia ki râ ki rahesia. Ma o Taniele ki rahesia ngaia getea ma na God iana.

⁵I ta na tangiana na maneraha ki hagatea o Taniele, ki vi: “Tanu hega ko pe rahesia Belo?” O Taniele ki arami, ki vi: “Inê kê pe rahesia na nununa na ataro, na ani ga tagarahia mareta na enoni. Inê kê rahesia ngaia getea ma hete na God mamauri, i hagavorarerua na vavearo ma na ano, ma ki na Araha iata na enoni hato.”

⁶Ma na maneraha ki hagatea, ki vi: “I hega, igo ko pe tongesuria vari, vi Belo ki na ataro monari? Igo ko pe bâsia vari, i ngêngê ma ki totono bâraha i na ara ni tangiani?”

⁷O Taniele ki mamana, ki vi: “Maneraha, siana ko beka surira! Na ataro ngekana ka na kapa ma, i vunu renia na mako. Ngaia ki bara, vige ngê, se vige tono.”

⁸Vikana na maneraha ki mangâriâga ngavê. Ngaia ki unira haku me na mane ni vogasiha iana Belo. Ngaia ki vi tangara, ki vi: “Manga mu pe hagarongoê, vi ti kani ngêgi na marâ, ga vogasia renia Belo, inê kê page hagamesigamu.

⁹Ma ki manga mu hagatanga monari tangê, vi Belo kani ngêgi, hoi, inê kê page hagamesia o Taniele, suria ngaia ki hagaiga Belo, vi ngaia ki mareha vi na ataro.” O Taniele ki vi tanga na maneraha, ki vi: “Ua, na tarana ngekana ki koro ma tangê.”

¹⁰Na mane ni vogasiha iana o Belo ka na tangahuru gi pi, mareha henira na gete iata ma na kareta.

¹¹Na maneraha henira o Taniele ma na mane ni vogasiha, ngaira hato ka râ ka banu igê na ngêsu iana Belo. I ngekana na mane ni vogasiha ka vi tanga na maneraha, ka vi: “Maneraha, igami kami huhura i metara tenigo. Ku hagarêgi getego na ngêra ma na vaini, ma ko nakagi igê na bea. Matena go huhura tenigi, go purusia nga na maani ruma, ko puruia, ma ko piringia igê na giraramu igê na purupuru.

¹²I gomaha mavoraro ko aporo me nga. Manga vigo tarahua, vi Belo ki pe ngêgi hato na ara ni marâ, hoi, go hagamesigami igami. Ma ki manga vi ngaia, ma ki ngêgi, hoi, go hagamesia o Taniele, suria ngaia ki hehegami.”

¹³Ma ngaira na mane ni vogasiha ngegana ka pe anumanuma rârâ, suria i ruguhana na bea ni ngêra i rarona na ngêsu ngaira ka bani tagarahia igê na teha, i oga pinihi. Tahema i na ara ni bungiani ngaira ka bêbanu tare igê, ka ngaugi na ngauha ni vogasiha.

¹⁴Matena ga bani hura râ na mane ni vogasiha, na maneraha ki nakagi na ngêra tanga Belo. Ma hemuri o Taniele ki bonasira na kariana, ka toregi me na rahu, ma ka tokorenigi rârâ suria na ngêsu. Mareha rârâ ta na enoni, vige bâsira, ga kato vikana, nga noga ma na maneraha. Hemuri ngaira hato ka hura vê, ka purusia na maani ruma, ma ka puruia, ma ka piringia na girarana na maneraha igê na puru. Hato vikana, ma ngaira ka râ.

¹⁵Bâ, igê na bungiana ngekana na mane ni hagarahenga, na gete iata ma na kareta, ngaira ka banu igê na teha pinihi tanga na ngêsu, manga bani hanana. Ngaira ka ngêgi na ngêra hato ma ka tonomigi na vaini hato, manga bani hanana.

¹⁶Matena i tangi mavoraro, na maneraha henia o Taniele karu râ tanga na ngêsu.

¹⁷Na maneraha ki hagatea o Taniele, ki vi: “I hega, na puru ki oga bâkoro ma?” O Taniele ki arami, ki vi: “Ua, maneraha, i oga bâkoro ma!”

¹⁸Na maneraha ki tangahia na maani ruma, ma ki pusina ma i bâsia na guruna na bea ni ngêra, ngaia ki ngere, ki vi: “Belo, igo ka na harasiku koro. Igo ka na ataro monari.”

¹⁹Ma o Taniele ki haganega ki mamana, ma ki vi tanga na maneraha, ki vi: “Siana ko hatani bêbanu. Gu bâbâ rârâ noga suria na rarona na ngêsu. Go bâsigi na peregani na êga. Visigi me, ti ka na êgata?”

²⁰Na maneraha ki arami, ki vi: “Inê kê bâsigi na peregani ugata na mane, na gete ma na kere kare.”

²¹Na maneraha ki gasuga ni mangariaga so. Ngaia ki haribona, ka têra na mane ni vogasiha henira na ahemata iata ma ka torera me tanga. Ngaira ka hagabâsia renia na teha, i pinihi, ga bêbanu me igê i na ara ni bungiani, hanana ga ngaugi na ngêra igê na bea ni ngêra.

²²Ngekana na maneraha ki haribona, ka nahuira ka me na mane ni vogasiha. Ngaia ki tagarenia na nununa Belo tanga o Taniele. O Taniele ki rahutenia na nununa Belo, ki babaroagani ma ki hogea na ngêsu.

²³Na ai ni Babilonia ka vogasia nikâ na baga hua raha.

²⁴Ta na tangiana na maneraha ki hagatea o Taniele, ki vi: “I hega, igo ko hagaiga nikâ vari, vi na ani ikê na ataro ki pe mauri? Hoita, gu rahesia!”

²⁵O Taniele ki arami, ki vi: “Inê kê rahesia ma na Araha. Ngaia getea ma ki na God mamauri.

²⁶Maneraha, manga igo ma ko hagamarumungeniê, hoi, inê kê page nahuia ki meme na baga hua raha iamu, mareha vi renia na tatapa borahu se vi na tarure.” Na maneraha ki arami, ki vi: “Inê kê hagamarumungenigo.”

²⁷Vikana o Taniele ki toregi na totogani na parâ ma na êbena na ganiana ma na varehu, ma ki hagaguburi haku. Ngaia ki hêhêa, ma ki hagangêa na baga hua raha renia. Matena na baga hua raha ki ngêa, ngaia ki bobote ragani ma ki abota. Mo Taniele ki vi tangara na ai ni Babilonia, ki vi: “Nga na marâ, mu vogasia akini ngekana.”

²⁸Matena na ai ni Babilone ka rongo vikana, ngaira ka mangariaga ngavê. Ngaira ka apariri tanga na manêraha, ka ngere, ka vi: “Na manêraha ki vora re na Siu! Hagênago ngaia ki kumûkumugia na nûnûna Belo, ma ki ninira na mane ni vogasiha, ma i ngekê ngaia ki nahuia ki me na baga hua raha iaka.”

²⁹Ngaira ka râ i pasina na maneraha, ma ka tuguria, ka vi: “Kasia me o Taniele tangagami. Manga i mareha, igami kami page nahunahu hunigamu, igo ma na ahemata iamu.”

³⁰Matena na maneraha ki bâsira, ga togeaga bâraha ma ka tutuguria, ngaia ki tagarenia o Taniele tangara.

³¹Ngaira ka kasia so o Taniele igê na kiru iata na laione, ma ngaia ki oga i ngekana surigi na tangiana ge ono.

³²Na laione gi pi kani ga oga igê na kiru ngekana. I na ara ni tangiani ka hagangêra renira na vererua na enoni ma na sipi gi rua, ma surigi na tangiana ge ono ngegana ngaira ka pe hagangêra rârâ igê, hanana viga magê ma ka ngaua o Taniele.

³³Igê na matena ngekana na poropete o Habakuku ki oga i Juta. Ngaia ki bani hagamako na guguhu ma ki bani nuinuigi so na bereti igê. Ngaia ki torea na apira na guguhu ngekana tangara na mane i mu, ga opaopa harisi.

³⁴Ta na angero iana na Araha ki bonasia o Habakuku, ki vi: “Gu migirâ na ngêra, go tora, tanga o Taniele. Ngaia kani i Babilone, i gâga igê na kiru iata na laione.”

³⁵O Habakuku ki arami, ki vi: “Araha, inê kê pe râ noga i Babilone, tahema inê kê pe girara na agua, i gâga igê na kiru iata na laione.”

³⁶Vikana na angero ki rangu i varehuna na poropete, ma ki hatani megaha garigari manga na roga tanga i Babilone. I ngekana ngaia ki hagêrasia so igê hagarangia na kiru iata na laione.

³⁷O Habakuku ki uni, ki vi: “Taniele! Taniele! God ki kasi me na ngêra tangago. Ngaigi kani igê! Gu ngê!”

³⁸Matena o Taniele ki rongoa o Habakuku, ngaia ki hagarahe, ki vi: “God, igo ko takusiê. Igo ko pe kasi renira na ani ga takuigo.”

³⁹Hemuri ngaia ki aharaga ma ki ngê. Ma na angero iana God ki megaha aporo otooto râ nga o Habakuku tanga i pasina.

⁴⁰Igê na pita na tangiana i oga surigi o Taniele igê na kiru, na maneraha ki râ i ngekana, hanana vi angiangi maramara renia. Matena i mataro vê, ma ki bâ so i rarona na kiru, ngaia ki bâsia vato o Taniele.

⁴¹Na maneraha ki ngere, ki vi: “Araha, na God iana o Taniele, igo ko teha. Igo getego ma ko God.”

⁴²Vikana ngaia ki okea akê me o Taniele tenia na kiru, ma ki haribona, ka kasira so igê na mane, ga bani rapasia, viga nanahuia o Taniele. Na laione ka hatani hetabusige renira i maana na maneraha.