Read Kahua HOSEA 1 Bible Online

HOSEA 1 - Kahua bible

HOSEA 1

¹Ikê na tamasinga na Araha ki hagatora renia o Hosea, karena o Beri, igê na mateni ga heheuri o Usia mo Jotama mo Agasi mo Hesekia ka marungia i Juta, mo Jeroboamo, karena o Jehoasi, ki marungia i Isiraele.

²Matena na Araha ki tamasi hagenago i harana o Hosea tangara na Isiraelita, ngaia ki vi tanga o Hosea, ki vi: “I ararigo nga, gu êragia na gete, na êrâ. Ngaia ki page oga erasigo, ma na karemu ka page usuria. Renia na kariaku ka paronga manga na êrâ, suria ga pe totosuriê.”

³Vikê o Hosea ki êragia ka Gomere, karena o Tibilaimi. Ngairerua karu apara na bêbê ni kare mane.

⁴Ma na Araha ki vi tanga o Hosea, ki vi: “Gu hêtana vi o Jeserele, suria i sugia ma be hagaitangia na maneraha i Isiraele, renia o Jehu, na uvarina, ki nahu enoni i Jeserele. Inê kê page hatungia ngavê. Siana ta na enoni ki maneraha i Isiraele.

⁵Igê na tangiana ngekana igê na maroguna i Jeserele inê kê page hagaerasira ngavê na mane ni me iana na maneraha i Isiraele.”

⁶Ka Gomere ki obara nikâ, ma ki apara na kare hehene. Na Araha ki tamasi nikâ tanga o Hosea, ki vi: “Gu hêtana vi ka Petakuia, suria inê ki hato be takuira na Isiraelita, se bonotenigi na bagaparongata.

⁷Ma inê be takuira hete na ai ni Juta. Ma inê, na Araha ma na God iata, inê be hagatahira, mareha vi suria na hearihatana, se vi surigi na epage ma na tatapa borahu, se vi surira na mane ni me igê na hosi.”

⁸Matena ka Petakuia ki kasi susu, ka Gomere ki obara nikâ, ma ki apara na kare mane.

⁹Na Araha ki tamasi tanga o Hosea, ki vi: “Gu hêtana vi o Varomu, suria mu hato vi na kariaku, menê ki hato vi na God iami.”