Read Kahua HOSEA 10 Bible Online

HOSEA 10 - Kahua bible

HOSEA 10

¹Na Isiraelita ka mangagi na apinige na vaini, ga rasirasi ma ka varo uri. Ngaira ka ama ni toregi nga na bea ni vogasiha, ma ka ama ni korokoro nga na mu iata. Ngaira ka ama ni hagabâkorogi nga na vakivaki na hê ni vogasiha.

²Na hagaparunga ki angarira na enoni. Tahema ki page tarahura na mamasiaganiha renigi na tasi iata. Na Araha ki page hogegi na bea ni vogasiha iata, ma ki page paparigi na vakivaki na hê na vogasiha iata.

³Na enoni ka sugia ma vige vi: “Igia ka pe nahunia nikâ na maneraha, suria igia ka pe hagahigasia na Araha. Ma na ta nikâ ki page katoa tangagia na maneraha?”

⁴Ngaira ka tamasi purua ma, ka surusuru hagaparu, ka tohetohe vero ma ka pe hagamonarigi na suruheri iata henira na enoni. Na mane igê na kotiha ka pe râ suria na otoha. Ngaira ka manga na rauga, i akê i mu, ma na enoni, ga ngaua, ka meme renia.

⁵Na ai ni Samaria ka page magu ma ka page angiangi maramara, suria i magahuru tenira na ataro iata, na nununa na puruka na golo i Betele, na hinua ni eraha. Ngaira ma na mane ni vogasiha, ga vogasia na ataro ngekê, ka page angisia, suria i tarataraga na golo na bâkorohana.

⁶Ma na nununa ka page torea râ i Asiria, manga na votovoto tanga na maneraha i teha i ngekana. Na Isiraelita ka page maki ngavê, suria ga pe akê me na katoha iata.

⁷Na hinua i Samaria ka page hagasuhia ngavê, ma na maneraha i Samaria ka page henahuraua vê, manga na bahitana na apinige i torea vê na ve.

⁸Na ngêsu igê na boteni ka page sungigi erasigi, suria ngaigi ki na agua ni eraha, na Isiraelita ka vogasira igê na ataro. Na tone ma na rauga ka page rubuhigi na bea ni vogasiha iata. Na enoni ka page avarasigi na barani, ka vivi, “Mu piringigami!” Ma tangagi na hungani ka vivi, “Mu ahunigami!”

⁹Na Araha ki vi: “Na Isiraelita ka ama ni tasitasi nga, haganega tenia na matena ga tasi i Gibea. Tahema na hearihatana ki page tarahura i Gibea nikâ, suria na enoni ka ama ni erataga nga.

¹⁰Inê kê bani kato, vigê hagamamasiagara ma be hagaitangira. Na enoni, ga pe Siu, ka page panepane haku tangara, ma ka page hagaitangira, renia ga rako na tasi iata.

¹¹“I nago na Isiraelita ka manga na puruka, i manata ngavê ma ki agana ki tanugi na ani ga mataku na tagaraha. Ma inê kê naka na totora igê na riona bâkoro ma kê barogi igê na marâ ni tagaraha raha. Inê kê katora na ai ni Juta ke hikiru vaga ma na Isiraelita ke hagamako na kiru.

¹²Inê kê bani vi, ‘Mu hikiru vaga vikana igê nga na mu haoru iami maremi, ma kamu hasigi igê na otoha, hanana mu tarahua na takuiha iaku, ma be korokoro tangagamu, suria mu toto suriê. I ngekê ki na matena koro tangagamu. Mu gariê igê, inê na Araha iami, mataro me kê page arâ me ma kê page vategamu na morana na mauriha.’

¹³Ma hete mu hasia na eraha, ma na harisi iami ka na guana na eraha. Igamu kamu bani ngêgi hato na guani na hagaparunga iami. “Igamu na Isiraelita, igamu kamu tako togo renigi na raramohami ma renira na mane ni me iami, ga rako.

¹⁴Tahema na hearihatana ki page erasigamu ma na hinua nganganihaga iami ka page hagasuhigi ngavê. I page manga na matena na maneraha o Salamana, ki hagasuhia ngavê igê na hinua raha i Betabele, ma na gete ma na kareta ka amenamena ka me.

¹⁵Isiraelita, na tarana ngekê ki page tarahugamu nogami surigi na eraha raha i pasimi. Igê na mahogotana, i haganega igê na hearihatana, na maneraha iami ki page meme otooto râ nga.”