Read Kahua HOSEA 11 Bible Online

HOSEA 11 - Kahua bible

HOSEA 11

¹Na Araha ki vi: “Matena na Isiraelita ka sisite mêngara, inê kê takuira. Inê kê unira hura tenia i Esipito ma kê katora renira vi na kariaku.

²Inê kê ama ni unira nga, ma ngaira ka ama ni murisigeê nga. Ngaira ka vogasira na ataro ma ka susu tangara na nunuta, ga tahegi.

³Inênga nga na ani gê hagesurira ka arâ, ma ngaira ka hagaigê, vigê marupera.

⁴Inê kê karuhira me bâkoro, ma kê here i rimata, kê bêngenira, ma kê takuira. Inê kê topera ma kê siginira. Inê kê maruruhira ma kê hagangêra.

⁵“Ngaira ka usi, vige ahariê. Tahema ge aporo tanga i Esipito, ma na maneraha i Asiria ke marungira.

⁶Na hearihatana ki page tarahugi na hinua iata ma ki page hogegi na maani para na hinua. Na kareta ka page meme igê na hearihatana, suria ga râ surigi na obaniha iata mareta.

⁷Ngaira ka ama ni murisigeê nga. Ngaira ka page avarasira na ataro, suria ga higera na mamasiaganiha, ma ki asa, vige hagamahagara.

⁸“Isiraelita, tanu hega kê rumakaka renigamu? Tanu hega kê kasigamu? Manga i he kê girara gê erasigamu manga gê erasira na ai ni Atema? Manga i he kê girara gê hagaitangigamu manga gê hagaitangira na ai ni Seboimi? I bara ngavê tangê, be kato vikana, suria gê takuigamu bâraha.

⁹I asa be hagaitangigamu igê na mangariaganiha iaku. Isiraelita, i asa be erasigamu ngavê nikâ, suria inê nga kê God, mareha vi na enoni. Inê nga kê God raramohaga huniê, ma kê koro teha ma kê ngahisigamu. Tahema i asa be hagaitangigamu, matena gê mangariaga.

¹⁰“Na kariaku ka page arâ suriê, inê na Araha matena gê hagaramo tangara na merongata, manga na laione i ngurunguru raha. Ngaira ka page akê me susu tenia i kere so.

¹¹Ngaira ka page soso me susu tenia i Esipito, mangara na manu ga gaha susu, tenia i Asiria mangara na kuvê. Inê be torera aporo tanga i pasita. Ngaia kani gê visia, inê na Araha.”

¹²Na Araha ki vi: “Na Isiraelita ka hagaparuê tare ma ka hagabekasiê bâraha, ma na ai ni Juta ka murisigeê mênga. Inê nga kê God, gê hagamonarigi tare na tamasinga iaku, ma kê koro ma oto teha ngavê.