Read Kahua HOSEA 12 Bible Online

HOSEA 12 - Kahua bible

HOSEA 12

¹Ga arumakaka na ara ni marâ hato, ga tangakuhigi na Isiraelita i na ara ni tangiani. Na hagaparunga iata ka ama ni akê nga, ma na nahunga ni nuni nikâ. Ngaira ka hesurusuru henira na ai ni Asiria, ma ka hagavuri na oile tangara na ai ni Esipito.”

²Na Araha ki ranganira na ai ni Juta, ma ki page hagaitangira nikâ na Isiraelita renigi na bagatarihata.

³O Jakobo, na uvarita, ki meheariha o Esau o veogana, matena garu gâga mênga i obana kenaterua. Matena i raha noga, ngaia ki meheariha God.

⁴Ngaia ki meheariha na angero ma ki teharia. Ngaia ki rugu na obana ma ki angi ma ki nungia, ki korokoro tanga. I Betele God ki vora tanga o Jakobo, ma ki tamasi tanga igê.

⁵Ngaia nga ki na Araha God raramohaga hunia. Ngaia ki teha, ma ki tuguhira na enoni, viga rahesia.

⁶Tahema, igamu na raraha iana o Jakobo, ki tuguhigamu, mu aharia God iami, ma kamu hagêguri togo renia. Igamu kamu toto suria, ma kamu nganganihaga igê na takuiha ma na otoha. Igamu kamu marape ma kamu naasia na God iami.

⁷Na Araha ki vi: “Na Isiraelita ka hagahagabeka mangara na enoni, ga nahunigi na tagaraniha ni haga ma ka hagahagaparu. Ngaira ka ravarava haga, ma ka hagavoro, matena ga hagavuri.

⁸Ngaira ka vi, ‘Igia ka ruruguha. Igia ka aharêsigia na nahuninga. I mareha ta na enoni, vige visigia, viga ruruguha, suria ga hagabekasira na enoni.’

⁹Ma inê nga, na Araha God iami, inê kê toregamu hura tenia i Esipito. Inê be katogamu, kamu oga aporo igê na ruma na gahu manga i nago, matena gê vatugigamu igê na masusu raha.

¹⁰“Inê kê bani tamasi tangara na poropete, ma kê hagamarutera, ma i harata na poropete inê kê ramonira ma kê hagaotora na kariaku.

¹¹Ma bâ, ngaira ka vogasira na ataro i Gileata, ma na ani, ga vogasi, ka page me. I Gilegale ngaira ka vogasira na ataro renira na puruka mane. Ma na bea ni vogasiha iata ki page mangagi na hê, ga haripage purua ma i mu.”

¹²O Jakobo, na uvarika, ki gava i Mesopotamia. Ma i ngekana ngaia ki tagara meni haga igê, hanana vi vuria na gete. Ngaia ki bâ surira na sipi iana na mane.

¹³Na Araha ki hagatora na poropete, hanana i torera hura na Isiraelita tenia i Esipito, ma ki hagatahira tenigi na mamasiaganiha i ngekana, ma ki marupera.

¹⁴Na Isiraelita ka hagaera obana ngavê na Araha. Tahema i ararira, viga meme. Na Araha ki page hagaitangira, suria ga hagaerasia bâraha.