Read Kahua HOSEA 13 Bible Online

HOSEA 13 - Kahua bible

HOSEA 13

¹I nago, matena ga tamasi na aparaha iana o Eparaimi, na ani getera na aparaha i Isiraele ka magu, suria ngaira ka hagahigasira. Ma ngaira ka haganega ka vogasia na ataro o Bala, ma na tarana ngekê ki hagatasira. Tahema na mera ki tarahura.

²Ma ngaira ka ama ni tasitasi nga, suria ngaira ka tagarahigi na nunuta na ataro, hanana ga vogasira. Na enoni ka takusigi ma ka tagarahigi ma ka vivi, “Mu vogasira!” Tanu hega na enoni ki girara i siginigi na nunuta na puruka mane!

³Tahema na enoni ngegê ka page magahuru manga na vaha i mavoraro, se manga na kârupu, i magahuru, matena i tangitangi raha. Ngaira ka page mangagi na gahuni na koni, i toregi vê na roga, matena ga kangikangi, se manga na robona na gi.

⁴Na Araha ki vi: “Isiraelita, inê nga ki na Araha God iami. Inê nga kê toregamu hura tenia i Esipito. Inê geteê nga ki na God iami. Inê geteê nga kê hagatahigamu.

⁵Inê nga kê marupegamu igê na masusu avagavaga.

⁶Ma na matena mu arâ igê na agua na mako koro, igamu kamu ngêngê masu, ma kamu tongesurigamu maremi, ma kamu paroparo, ma kamu pe botage reniê.

⁷Tahema inê be ngasigamu manga na laione. Inê be gamorahigamu manga na marâ vasiga ngegana.

⁸Inê be garegamu manga na o raha, i mangariaga, matena ga torera na karena, ma be ohegamu. Inê be ngê kusikusi renigamu manga na laione. Inê be ngasigamu mangara na marâ vasiga i bemu.

⁹“Isiraelita, inê be hagaerasigamu ngavê! Ti ki page tamanigamu? Mareha vê!

¹⁰Na maneraha iami vari? I he ngaia, hanana i tamanigamu? Na enoni raha iami vari? I he ngaira, hanana ga hagatahigamu?

¹¹Matena gê mangariaga, inê kê vategamu na maneraha, ma igê na mangariaganiha iaku inê kê tavora hura tenigamu.

¹²“Ga bani segegi so na bagatarihata na Isiraelita. Na sihonga renigi na tasi iata ka bani naka bâkoro râ ki tâ.

¹³Na Isiraelita ka bonobonoga, suria i bâ, manga viga usitenia na mauriha. Ngaira ka maratorana na kare i pe gusure, matena kenana ki harahara tenia, ma ki usi, vige vora me.

¹⁴Vikê ki asa be hagatahira tenia na agua iata na enoni, ga me, se vi tenia na raramohana na mera. Mera, gu migirâ me na ringa iamu! Gu migirâ me na hagaitangiha raha iamu! Inê ki hato, be tako renira nikâ.

¹⁵“I ngekê na Isiraelita ka mauri bâkoro vari mangagi na rauga, ga taka. Ma inê, inê na Araha, be hagatorangenia na roga mahana tenia i kerekê, tenia na masusu raha. Ma na roga ngekê ki page hagamamatarigi na ve banga ma na ve karu iata. Na ngêra ma na ruruguha ma na nahuninga iata ka page hato renia.

¹⁶Na ai ni Samaria ka page hatamia na mamasiaganiha, suria ga guguruga bâraha tangê. Ngaira ka page me igê na hearihatana. Ga page rahutenira i ano na kare gari iata, ma na gete, ga obara, ka page tatahura.”