Read Kahua HOSEA 14 Bible Online

HOSEA 14 - Kahua bible

HOSEA 14

¹Isiraelita, mu aharia na Araha God iami. Na bagaparongami ka bani katogamu, kamu tapasu ma kamu votavota.

²Mu angitenigi na tasi iami ma kamu urisi parongami. Mu vogasia na Araha renia na nunginungi ikê: “God, go bonotenigi na tasi hato iamami, ma ku aganaria na nunginungi iamami, ma igami kami page hagarahasigo, manga mi bani surua.

³Asiria ki asa hagetage, vige hagatahigami. Igami kami pe tako togo renira na hosi ni me, suria ngaira ki asa, vige anumasigami. I asa iamami, vigami visigi nikâ na marâ, mi tahegi, viga god iamami. Araha, igo nga nga na ani go takuira na kare banogo ma na enoni ga varomu.”

⁴Na Araha ki vi: “Inê be katora na kariaku, ke toto suriê aporo. Inê be takuira i mêrihaku hagenani. I hato be mangariaga tangara.

⁵Inê be hagamaurira na Isiraelita, manga na rangi i rangisia na mako avagavaga. Ngaira ka page mauri mangagi na mahe, ga taka. Ngaira ka page nganganihaga mangagi na vagani na apinige raha i Libanone.

⁶Ngaira ka page nahunia na mauriha haoru mangagi na apinige na olive, ga baogo ma ka bâkoro. Ngaira ka page sigini koro mangagi na takani na ago igê na hungani.

⁷Ngaira ka page rukuruku aporo i pasiku, ma inê be anumasira. Ngaira ka page tagarahigi nikâ na mu ni ngêra. Ngaira ka page rakorako manga na pariki ni vaini, i rasirasi. Ki page rongo raha na atata manga na vaini ni Libanone.

⁸Na Isiraelita ki asa, vige page gagêmaga nikâ renira na ataro. Inê nga kê page aganarigi na nunginungi iata. Inê nga kê page marupera. Inê nga kê page anumasira, manga i hagamamarusira na apinige, i asa, vige turituri. Inê nga na hunana na korohata hato.”

⁹Na enoni, i tako mataha, ki tuguhia, i takotako renigi. Na enoni, i aitangisigi maninga, ki tuguhia, i arâ surigi. Na tarani iana na Araha ka oto, ma na enoni, ga koro ma oto, ka arâ surigi, ma na enoni, ga aharê igê, ka tapasu ma ka votavota.