Read Kahua HOSEA 2 Bible Online

HOSEA 2 - Kahua bible

HOSEA 2

¹Na Isiraelita ka page rako mangagi na one i asi. I asa ta na enoni, vige tomanigi, se vige hagararingenigi. God ki vi tangara, ki vi, “Igamu kamu mareha vi na kariaku.” Ma i ta na tangiana God ki page vi tangara vikê, “Igamu ka na kariana na God mamauri.”

²Na ai ni Juta ma na Isiraelita ka page haku aporo. Ngaira ka page kasia na ani gi tage na mane, ki page marungira ngaira hato. Ngaira ka page rakorako ma ka page ramoramo, ma ka page oga igê na ramana. Na tangiana ni Jeserele ki page vora na tarana raha teha!

³Igê na matena ngekana gu hêtata na goamu vi: “Kariana God. God ki takuigamu.”

⁴Na Araha ki vi: “Kareku, mu ramonia kenami, ma kamu rangania. Ngaia ki hato vi na gete iaku nikâ, ma inê kê hato vi na mane iana nogaku. Mu ramonia! Siana ki gamogamo nikâ, ma siana ki êrâ nikâ.

⁵Manga i mareha, inê kê tasitasia ki rupaturi manga matena i vora me. Inê kê katoa, ki gomara manga na mako pusuga, i avagavaga renia na arito. Ma ngaia ki page meme, renia i mamata na riona.

⁶I asa be takuira nikâ na karena, suria ga gamogamo manga kenata. Ngaira ka pe toto suriê.

⁷Kenata ki na êrâ ma ki pe tangahuria. Ngaia ki vi, ‘Inê be surira na mane. Na tamaku ngegê ka page vateê na ngêra ma na ve, na tuguni ma na gahu, na oile ni olive ma na vaini.’

⁸Tahema inê be ravoravo pusia renigi na apinige kakaruga, ma be naka na panga na hê pusia, hanana i hagabarasigi na tara.

⁹Ngaia ki page gogo surira na tamana mane, ma ki bara tanga, vige matarohira. Ngaia ki page bâbâ renira ma ki asa vige tarahura. Ma hemuri ngaia ki page vivi, ‘Inê be aporo tanga na mane iaku monari, suria na mêriha iaku henia ki koro teharia na mêriha i ngekê.’

¹⁰Ngaia ki hagaigê, vigê pe vatea na koni, na vaini ma na oile ni olive. Ngaia ki hagaigê, vigê pe vatea na siliva ma na golo, i tagarahia renigi na nununa o Bala, na ataro i vogasia.

¹¹Tahema inê be toregi aporo na votovoto iaku: na koni matena ga maua ma na vaini matena ga mamata. Ma be toregi aporo na tuguni ma na gahu, i hagesuru ma ki tuguni re.

¹²Inê be tasitasia ma be hagamakia i maata na tamana mane, ma ki asa na hitangita, vige hagatahia tenia na raramohaku.

¹³Inê be hatungigi na ara ni tangiani raha henigi na magotoha, na tangiani raha igê na harisi, na tangiani raha ni hageha haoru, na tangiani ni mamaroha, ma na tangiani raha na rotu.

¹⁴Inê be erasigi na pariki ni vaini ma ni fiki iana, suria ngaia ki vi, vi na tamana mane ka vatea manga vi na mena tanga. Inê be katogi na pariki ngegê, ke vora manga na masusu hêga, ma na marâ vasiga i bemu ka page oka.

¹⁵Inê be hagaitangia renigi na mateni i bonoteniê igê, ki vogasira igê na ataro, ki susu tangara, ma ki rêni bâkoro, hanana vi gogogo surira na tamana mane. Hoita, gê vi inê, na Araha.”

¹⁶Na Araha ki vi: “Tahema inê, na Araha, be hagamua, ma be me aporo igê na masusu raha, ma be katoa, ke takuiê nikâ.

¹⁷Inê be vatea aporo na pariki ni vaini, ma be katoa na Maroguna ni Eraha, ke vora na tara ni Naasiha Koro. I ngekana ngaia ki page barua na takuiha iaku manga i nago matena i kare viru ma ki hura tenia i Esipito.

¹⁸Vikê ngaia ki page visiê aporo nikâ, vi inê o vaniana, ma ki hato hagetage, vi ngaia ke visiê, vi inê na Bala iana, na avanuna.

¹⁹Ma inê kê vivi pusia, siana hagetage ki visia nikâ na atana o Bala.

²⁰“I na matena ngekana inê be naka na suruheri henira na manu hato ma henira na marâ vasiga i bemu ma henira na marâ hato, ga angoango i ano, hanana siana ka erasira na kariaku. Tenia na agua inê be toregi na ara ni tangaruha hato, na ara ni tatapa borahu ma na epage ni me, ma be katora na kariaku, ke oga igê na marapeha ma na ramana.

²¹Isiraele, inê be torego manga na gete iaku. Inê be hagahigasigo ma be toto surigo. Inê be mesigo ma be takuigo tare, ma be katogo, ko vora nga na aniku tare ma tarema.

²²Inê be hagamonaria tare na suruha iaku, ma be katogo, ku vora nga na aniku, ma ko page hagêguri togo reniê, inê na Araha.

²³I na matena ngekana inê be aganarigi na nunginungi iata na kariaku, na Isiraelita. Inê be hagarangisia na ano.

²⁴Ma na ano ki page hagarakonigi na koni, na vaini ma na oile ni olive.

²⁵Inê be haganahunira na kariaku renia na agua, ma be katora, ke oga igê na ramana. Inê be takuia na ani ga bani hêtana vi ka Petakuia. Ma tanga na ani, ga bani hêtata vi Varomu, kê page vi, ‘Igamu nga na kariaku.’ Ma ngaira ka page arami, ka vivi, ‘Igo nga na God iamami.’”