Read Kahua HOSEA 4 Bible Online

HOSEA 4 - Kahua bible

HOSEA 4

¹Igamu na Isiraelita, mu karinga na Araha, suria na Araha ki ramonigamu ma ki ranganigamu. Na enoni, mu oga i na agua ikê, ngaia ki hagatamasigamu, ma ki vi: “Na totosuriha ma na takuiha karu mareha igê na agua. Mareha ta na enoni, vige hagêguri togo reniê.

²Ngaira ka tohetohe vero. Ngaira ka hagaparu ma ka nahu enoni. Ngaira ka hanago ma ka gamogamo. Na ogasutaganiha ki ama ni raharaha nga ma na nahunga ni nuni ki ama ni akê me tare.

³Tahema na ano ki page avagavaga. Na enoni ma na marâ hato, ga mauri igê, ka page me. Ma na marâ vasiga i bemu ma na manu ma nikâ na siare i asi ka page me.”

⁴Na Araha ki vi: “Igamu na mane ni hagarahenga, siana hagetage kamu ramonira na enoni se mu hagatamasira. Inê kê hagatamasigamu igamu hete!

⁵Naka ma na tangiana, igamu kamu tari purupuru, ma suria na bungiana na poropete nogata. Ma inê be hagamesia i Isiraele, kenami.

⁶Na kariaku ka meme, suria ga pe hagêguri togo reniê. Mane ni vogasiha, igamu kamu pe tako togo reniê. Tahema inê kê kasi renigamu, ma ki hato, vigamu page mane ni vogasiha iaku. Tahema inê nogaku kê page kitenira na karemi.

⁷“Mane ni vogasiha, matena mu ama ni rakorako nga, igamu kamu ama ni aharêngigi nga na ramata iaku. Tahema inê be hagamakigamu, suria mu vora na mane ni vogasiha.

⁸Mu mauri renigi na tasi iata na kariaku. Tahema mu obanira, vige ama ni tasitasi nga.

⁹Na hagaitangiha tangara na enoni ki tangagamu nogami. Inê be hagaitangigamu renigi na bagaparongami, ma kamu page kasikasi mena renigi.

¹⁰Igamu kamu ngêgi na vogasiha, ma ki asa iami, vigamu ngê masu. Igamu kamu gamogamo, suria mu vogasira na ataro, ma ki asa iami, vigamu tataka, suria igamu kamu bani kasi reniê, hanana mu gogogo surira na ataro.”

¹¹Na Araha ki vi: “Na vaini, na bani ani ma na ani haoru, karu katora na kariaku ka bekabekaga.

¹²Ngaira ka nungia na mavorona na apinige, hanana vi hagagirarara renia ta na marâ! Ma na vato ki hagarongora renigi na marâ, ga obanigi, viga giraragi! Aige, ngaira ka beka ngavê! Ngaira ka kasi reniê. Manga na gete, i vora renia na êrâ, ngaira ka gogo surira na ataro.

¹³I na agua ni vogasiha igê na barani ngaira ka vogasira igê na ataro. I ruguhani na apinige raha, ga arubebe, ngaira ka susu tangara igê na ataro. Aige, na mamaruha ki hagakoro apeta vari? Ma na ta ki akê me? Ka karemi ka êra ma ka hungâmi ka gamogamo.

¹⁴Naka ma ka karemi ma ka hungâmi ka manga ngegana, inê ki asa be hagaitangira renigi, suria igamu na mane kamu gogogo surira na êrâ i ruma ni vogasiha ma kamu tage vogasira na ataro. Mu girara, na enoni ka ama ni hagabekasia nga na ani i bekabekaga.

¹⁵“Isiraelita, naka ma igamu kamu pe toto suriê ma kamu paronga manga na gete, i gamogamo, siana kamu katora na ai ni Juta ka tasitasi nogata. Siana mu hagarahe i Gilegale. Siana mu arâ i Betavene, na agua ni eraha, ma siana mu tohetohe i ngekana reniê, suria inê nga ki na Araha mamauri.”

¹⁶Na Isiraelita ka guguruga manga na puruka, i marababaga re râha. Manga i he na Araha ki girara i hagangêra mangara na kareta na sipi igê na pariki ni go?

¹⁷Na ataro ka angarira na Isiraelita. Nakara vê ke râ!

¹⁸Matena i ruguhira na vaini, ngaira ka vagevagesia na gamogamoha. Na teniha era ki erasia na ogaha koro iata.

¹⁹Ngaira ka page mangagi na marâ, i ahegenigi vê na roga. Ma ngaira ka page maki ngavê, renia ga vogasira na ataro.