Read Kahua HOSEA 5 Bible Online

HOSEA 5 - Kahua bible

HOSEA 5

¹Na Araha ki vi: “Igamu na mane ni vogasiha, mu rongo! Igamu na Isiraelita, mu karinga! Ma igamu nogami na maneraha iata na enoni! Ki tuguhigamu, vigamu surira na enoni suria na otoha. Ma igamu ki mareha! Igamu kamu naka na tu tangara na kariaku i Misipa. Igamu kamu naka na basu igê na hungani i Tabore.

²Igamu kamu sutasuta i hinua i Akasia. Inê mareku nga be hagaitangigamu hato, na ara ni hitangimi.

³Inê kê bani girarara na Isiraelita. I asa iata, vige ahi paniê. Ngaira ka pe toto suriê, ma ki pe ararira, vige rahesiê.”

⁴Na bagaparongata mareta na enoni ka hagabarasira, ka pe aharia aporo na God iata. Na vogasiha tangara na ataro ka angarira. Tahema ngaira ka pe hagêguri togo renia na Araha.

⁵Na paroparoha iata na Isiraelita ki hagatanga monari renira, viga pe koro. Na parongata era ka katora, ka tapasu ma ka votavota, ma na ai ni Juta ka vota henira.

⁶Ngaira ka merarâ na sipi ma na puruka iata, hanana viga vogasia na Araha renira. Ma ngaira ka vogasi purua ma. Ngaira ki asa, vige tarahua na Araha, suria i bani panira.

⁷Ngaira ka pe toto suria na Araha. Na kareta ka mangara na kare ni tara, suria ga pe raruni togo renia na Araha. Ngaira ma na mu iata ka sugi era hagetage.

⁸Na Araha ki vi: “Mu uhigi na ahuri ni hearihatana i Gibea! Mu uhigi na ahuri i Rama! Mu sugaria i Betavene! Mu arâ, mane na raraha iana o Benamino, mu râ igê na hearihatana.

⁹I ata me noga na matena ni hagaitangiha. Na apanena iata na Isiraelita ki page bâ manga na bagamanihê raha. Isiraelita, na tarana nga ngekê ki voravora me!

¹⁰“Inê kê mangariaga ngavê, suria na maneraha i Juta ka banu i Isiraele ma ka parênia na mako. Tahema na hagaitangiha iaku tangara ki page tarahura manga na maganuha raha.

¹¹Na Isiraelita ka mamasiaga bâraha, suria ga tê tara renia na mako, ma suria ga nungia na hetamaniha tenira na enoni, i bara tangara, vige hetamani.

¹²Inê be erasira na Isiraelita manga na hasikoko ma na ai ni Juta manga na ane.

¹³Matena na Isiraelita ka bâsia, vi ngaira ka ape era ma na ai ni Juta ka rigia, vi ngaira ka mamari, ngaira ka râ i Asiria, ka nungia na maneraha i ngekana, hanana vi tamanira. Ma ngaia, ngaia ki bara tanga. Ngaia ki asa, vige hagakomagara se vige hagamavora.

¹⁴Renia inê nga be ohera na ai ni Isiraele mi Juta manga na o vasiga, i ramo. Inê mareku be ngasira ma hemuri be panira. Inê be oke rataratagenira, ma ki asa ta na enoni, vige hagatahira.

¹⁵“Inê be panira na kariaku mataro me na matena, i arari na mamasiaga iata renigi na bagaparongata, ma ka bâbâ reniê igê. Igê na mamasiaga iata ngaira ka page gariê vari.”