Read Kahua HOSEA 6 Bible Online

HOSEA 6 - Kahua bible

HOSEA 6

¹Na enoni ka vi: “Nika, ge aporo tanga na Araha. Ngaia, i bani hagamamasiaga apeka, ki page hagakomagagia. Ngaia, i bani hagamamarigia, ki page baraigi na maara iaka.

²I murini na tangiani gi rua ngaia ki page hagamêrigia aporo. Igê na oruta na tangiana ngaia ki page hagarahagasigia. Igia ka page goga i maana.

³Ge uhungia nga, ke hagêguri togo renia na Araha. Igia ka page girara otooto râ, vi na Araha ki page arâ me, tagenana manga igia ka girara otooto râ na kahuagana na tangiana. Na râha me iana tangagia ki manga na rangi na suravaka.”

⁴Ma na Araha ki arami, ki vi: “Isiraelita, gê he nakagamu? Ai ni Juta, gê he nakagamu? Na takuiha iami tangê ki magahuru manga na vaha i mavoraro. Ngaia ki manga na kere kârupu, i magahuru râ i mavoraro.

⁵Tahema inê kê bani tamasi i harata na poropete tangagamu. Inê kê bani nahuigamu renigi na tamasinga iaku. Na suriha iaku ki mataha ngavê. Inê kê girara na marâ, gê obania.

⁶Inê kê obanigamu, vigamu takuiê tare nga, Inê kê pe obanigamu, vigamu vogasiê renira na sipi. Inê kê obanigamu, vigamu aitangisiê hete. Inê kê pe obanigamu, vigamu susu tangê.

⁷“Ngaira ka aharêngia na suruheri iaku henira manga o Atama. Ngaira ka pe toto suriê.

⁸I hinua raha i Gileata ka vunu igê na manero, ga nahu inuni.

⁹Na mane ni vogasiha ka mangara na manero, ga hegêni ka ababa hekarigi karira na enoni. Ma nikâ igê na tara tanga na agua apuna i Sekeme ngaira ka nahu enoni igê. Ngaira ka obania, viga katogi na eraha ngegê.

¹⁰Inê kê bâsira na ai ni Isiraele, ga katoa na tarana, i era ngavê. Ngaira ka pe toto suriê, ma ka vogasira na ataro.

¹¹Ma igamu nikâ, ai ni Juta, inê kê bani naka na matena, vigê page hagaitangigamu igê renigi na bagaparongami.