Read Kahua HOSEA 7 Bible Online

HOSEA 7 - Kahua bible

HOSEA 7

¹“I na ara ni matena inê kê obania be hagakomagara na Isiraelita ma be vatera aporo na ramana, ma kê tarahugi ma na bagaparongata ma na erahata. Ngaira ka hogegi na ruma ma ka hanago. Ngaira ka nahuira na enoni i tara ma ka hanago tenira.

²I asa hagetage, vige takusia, vi inê kê nakagi i obaku na bagaparongata hato ngegana. Ngaira ka tu igê na eraha. Inê kê bâsigi tare na bagaparongata.”

³Na Araha ki vi: “Na enoni ka hagakoro obana na maneraha, matena ga harikato renia. Ngaira ka nakanaka bêta tangara na enoni raha, matena ga katokato pinihi renira. Ngaira hatohato ka hagahagaparu tare. I asa hagetage, vige tongesurira.

⁴Ngaira ka manga na gi, i tangatanga igê na êmu. Na enoni, i hagamako ngêra, ki surungia, matena i suhisuhi hato na ngêra.

⁵Matena ga hagahigasia na tangiana iana na maneraha, i rârâhira igê, ngaira ka hagatonomira na maneraha ma na enoni raha renia na vaini, ki ruguhira ka bekabekaga.

⁶Na kiteniha igê na aitangihata ki manga na gi igê na êmu. Igê na bungiana hagenani na mangariaganiha iata ki manga na gi, i tangatanga, ma igê na mahogotana ki vatavata.

⁷Suria ga mangariaga ngavê, ngaira ka nahuira ka me na maneraha iata. Ngaira hato na maneraha iata ka me hagetage, ma ki asa na hitangita, vige avarasiê.”

⁸Na Araha ki vi: “Na Isiraelita ka hetorariga henira na enoni, ga pe Siu. Ngaira ka manga na ngêra, i mako okaga.

⁹Ngaira ka tako togo renira na ai mahuara, ma ka pe girara, vi na tarana ngekana ki bani hatungia hete na raramohata. Ngaira ka mangara na gemêa ma ka gohogohoraga. Ma ngaira ka pe girara nga.

¹⁰Na paroparoha iata ki ranganira. Naka ma ga bani tarahura na bagabevoani, ngaira ka pe urisi parongata, ma ka pe aporo me tangê, inê na Araha God iata.

¹¹Na Isiraelita ka manga na kuvê, i tugupu ma ki pe takotako. Tani na mateni ngaira ka avarasira na ai ni Esipito, ma tani na mateni ka avarasira na ai ni Asiria.

¹²Ma inê be naka na basu iaku ma be basuira mangara na manu. Inê be hanasira mangara na manu, ma be hagaitangira renigi na bagatarihata.

¹³“I page era ngavê tangara, suria ga bani kasi reniê. I page era ngavê tangara, suria ga bani usiteniê. Inê kê obania, vigê hagatahira, ma ngaira ka rahesiê hagaparu ma.

¹⁴Ngaira ka pe avarasiê maninga i mêrihata hagenani. Ngaira ka hagata ma ka marumaru mangara na enoni ahuroto. Ngaira ka nungigi na ngêra ma na vaini, ma ka tapitapira mareta mangara na enoni ahuroto, matena ga hagarahe. Ngaira ka guguruga ngavê tangê.

¹⁵Henaka inê kê marupera ma kê hagesurira ma kê hagaramonira nikâ, ma ngaira ka harikato reniê.

¹⁶Ngaira ka kasi reniê, ma ka hagarapera na ataro, i asa, vige tamanira. Ngaira ka makevokevo manga na epage. I asa, vige tako togo renira. Na maneraha iata ka page me igê na henahuita, suria ga tamasi paroparo ma ka guguruga tangê. Ma na ai ni Esipito ka page rurusira.”