Read Kahua HOSEA 8 Bible Online

HOSEA 8 - Kahua bible

HOSEA 8

¹Na Araha ki vi: “Mu uhigi na ahuri ni perenga. Na meronga ka hagavato manga na ahetaronga hurira na kariaku, suria ngaira ka aharêngia na suruheri, gê naka henira ma ka pe râ surigi na ramata iaku.

²Naka ma ngaira ka vivi, ‘God iamami, igami kami hagêguri togo renigo,’

³ma ngaira ka kitenigi na tarani, ga koro. Tahema na merongata ka page tavogenira.

⁴Ngaira ka atera na maneraha iata suria na obaniha iata mareta, mareha vi inê. Ngaira ka kasira na enoni raha iata, mareha vi suria inê kê hagamarumu. Ngaira ka tagarahigi na nunuta na ataro renigi na siliva ma na golo iata. Na tarana ngekê ki page erasira ngavê.

⁵Inê kê kitenia ngavê na nununa na puruka na golo, ga rahesia na ai ni Samaria. Inê kê mangariaga ngavê tangara na Isiraelita. I arihu manga i he ma ka naka vê na vogasiha ni ataro?

⁶Ta na mane i Isiraele ki tagarahia na nununa na ataro, i mareha ngavê, vige god. Na nununa na puruka na golo, ga rahesia i hinua i Samaria, ka page menamenaria.

⁷Ngaira ka obania na mamava ma ka hagapangira mareta renia na roga raha. Na koni i mu iata ka pe obo, ma ki manga ga obobo, ka page obo baguru. Na mamahuara ka page ngaugi.

⁸“Na enoni, ga pe Siu, ka parênia Isiraele, ma ka kitakitara manga na apira, i abota. Na Isiraelita ka râ surigi na tauhata mareta.

⁹Ngaira ka togeaga mangara na tonki vasiga. Ngaira ka avarasira na ai ni Asiria. Ngaira ka mahata tangara na enoni igê na agua getegi nikâ, hanana viga tamanira me bê aporo.

¹⁰Hoi, naka ma ngaira ka gari tamata, inê be hagahakura, hanana gê hagaitangira. Ngaira ka sugia ma, vige gatage, suria ga mamasiaga, matena na maneraha i Asiria i hagamamasiaga apeta.

¹¹“Na Isiraelita ka bani tagarahigi rako nga na bea ni vogasiha tangagi na bonoteniha na tasi. Ma na bea ni vogasiha ngegê ka katora, ka ama ni tasitasi nga.

¹²Naka ma gê ama ni segegi nga na ramata iaku tangara na enoni, ma ngaira ka kitenigi, ka vi ma, vi na ramata iata na enoni mamahuara, ma ka pe ararira so ngaira mareta.

¹³Ngaira ka vagevagesia, viga vogasi tangê, suria ma ga obania, viga ngêgi na hasigota na marâ ni vogasiha. Ma inê, na Araha, kê pe vagevage renia. I asa be bonotenigi na bagatarihata. Inê be hagaitangira renigi na tasi iata. Ngaira ka page aporo i Esipito.

¹⁴“Na Isiraelita ka bani hitenia God, i hagavorara. Ngaira ka bani toregi na ruma raha iata na maneraha. Na ai ni Juta ka bani rihigi na hinua iata renigi na para pusira na me. Ma inê be sungigi hagetage na ruma ma na hinua ngegana.”