Read Kahua HOSEA 9 Bible Online

HOSEA 9 - Kahua bible

HOSEA 9

¹Ai ni Isiraele, siana mu vagevage. Siana mu vagevagesigi na tangiani raha mangara na enoni ahuroto, suria mu bani murisigea God ma kamu pe toto suria. Igê na agua hagenani igamu kamu rârâgenigamu maremi tanga na ataro, manga na êrâ tanga na mane, ma kamu vagevagesigi na ngêra, i vurigamu renigi.

²I sugia ma, ma igamu kamu page magê, suria i pe ararigamu na ngêra ma na oile ni olive ma na vaini ki page hato hagetage tenigamu.

³Na Isiraelita ka page hato, vige oga igê na agua, God ki vatera, ma ngaira ka page aporo i Esipito, ma i Asiria ngaira ka page ngêgi na ngêra, ga apu hagetage tangara.

⁴I ngekana i pasita na mamahuara ki bara tangara, vige vogasia igê na Araha renia na vaini, se vige hagakoro obana renigi na vogasiha. Na ngêra iata ka page katora, ka aharêngigi na ramata, manga na ngêra na hagatataka. Na ngêra ki hagabarasia sisite ma na magêha raha iata. Ma ki asa iata, vige vogasia na Araha renigi i Ruma ni Rotu iana.

⁵Ma na ta ka tanua igê na tangiani raha ni rotu, ga hagarahasia igê na Araha?

⁶Matena ga bani tarahura na bagabevoani ma na enoni ka totoko, na ai ni Esipito ka page torera me haku, hanana ga bagira i Memipisi. Na rauga ka page rubuhigi na ruruguha iata, ma na tone ka page rubuhigi na angisi ruma iata.

⁷Na matena ni hagaitangiha ki bani vora me noga. Na tangiana ni kasi mena ki bani ata me noga. Na Isiraelita ka page girara. Mu visiê, vi inê na poropete bekabekaga. Mu visiê, vi inê na mane ni hinarunga, gê higa. Igamu kamu kiteniê bâraha, suria igamu kamu tasitasi bâraha.

⁸God ki ateê, kê poropete ma ki hagatorangeniê, hanana gê kanukanura na kariana, na Isiraelita. Ma igamu, na ara ni agua gê arâ igê, igamu kamu tutu kariê tare. Na manu vari kani kê, kamu basubasu kariê? Igê nikâ na Ruma ni Rotu iana na Araha na enoni ka merongasiê, suria gê poropete.

⁹Ngaira ka erataga ngavê igê na ara ni marâ ga tanugi, manga i nago i Gibea. God ki asa, vige bonotenigi na bagatarihata! Ngaia ki page hagaitangira renigi hete.

¹⁰Na Araha ki vi: “Isiraelita, matena gê tarahugamu moramora, ki manga gê tarahugi na guani na vaini igê na masusu. Matena gê bâsira moramora na uvarimi, ki manga gê tarahugi na guani na apinige na fiki, na guani ga mata hagenago. Ma na matena ga ata igê na hungana i Peori, ngaira ka haganega ka vogasia igê o Bala na ataro, ma ka kahu era ngavê, usurira na ataro, ga hagarapera.

¹¹Na raramohata na Isiraelita ki page magahuru, manga na manu i gaha vê. Ma na gete ki hato hagetage, vige atui, se vige obara, se vige apara kare.

¹²Naka ma manga vi ngaira ka apara kare, inê be hagamesira, ma ki mareha na hitangita, vige page tahi. Ki page era ngavê tangara, matena gê murisigera.

¹³Matena gê bâsira moramora na Isiraelita, ngaira ka mangagi na ni haoru igê na pariki. Ma i ngekê na merongata ka tarigenira na kareta, hanana ga nahuira ka meme.”

¹⁴Araha, gu hagaitangira! Na hagaitangiha ta ku vatera renia? Gu katora na gete ke gomara ma ke mamata ngavê na susuta!

¹⁵Na Araha ki vi: “I Gilegale ki hagabângenia ngavê, vi ngaira ka erataga ngavê. I ngekana inê kê haganega kê kitenira. Ma renigi na bagaparongata inê kê paira hura tenia i pasiku. I hato hagetage vi ve page takuira nikâ. Ngaira hato na maneraha iata ka merongasiê.

¹⁶Na Isiraelita ka mangagi na apinige, ga bani rorogi. Na vagani ka mamata, ma ki asa, vige hungu nikâ. I asa iata, vige apara kare. Manga vi ngaira ma ka apara kare, inê kê page hagamesira, naka ma ngaira ka takuira bâraha.”

¹⁷Ngaira ka pe tê viteana God, gê rahesia. Tahema ngaia ki page usitenira. Ngaira ka page aheahe rârâ ma i berarogata na enoni, ga pe Siu.