Read Kahua JOELE 1 Bible Online

JOELE 1 - Kahua bible

JOELE 1

¹Na Araha ki tamasia na rongoha ikê tanga o Joele, karena o Petuele.

²Igamu na enoni raha mu rongo! Ai ni Juta mu karinga! I hega, na tarana manga ngekê ki bani tarahugamu vari, se i bani tarahura na uvarimi i nago?

³Mu hagarongora na karemi renia. Ma ngaira ka page hagarongora nogata na kareta, ma ngaira ka page hagarongora nogata na kareta.

⁴Na ruruha ma na ruruha ni pê ka taheagani me ma ka gahuigi na mu. Tani na ruruha ki ngêngê kasigi, ki arâ ma tani ki ngêngê hatungigi, ki mumuri.

⁵Mu rite ma kamu angi, igamu na enoni mu tono tare na vaini. Ki rugurugu na obami, igamu na enoni, i ruguhigamu. Na vaini ki hato ngavê tenigamu, suria na mu ni vaini ka matarotaro ngavê.

⁶Na ruruha raha ni pê ka sinoa na agua. Ngaira ka raramohaga ma ka rako teha ngavê. Na rivota ka masi manga na rivona na laione.

⁷Ngaira ka erasigi na mu ni vaini iaka, ma ka ngasigi na apinige na olive iaka. Ngaira ka ngê sibisibigi ma na mahuhugani ka tâ i ano, ma na arani ka oga ma na gonarini.

⁸Igamu na enoni, mu angiangi, manga na kere gete i angiangi maramara, renia i me na mane vi auragia.

⁹Mane ni vogasiha, mu angiangi, suria ga hato hagetage na ngêra ma na vaini tanga na vogasiha i Ruma ni Rotu. Ki bara tangagamu, vigamu vogasia na Araha.

¹⁰Na mu ka matarotaro. Na mako ki avagavaga. Na ngêra ka mêgu ma ka tarataraga. Na guani na vaini ka mêgu ma ka mamata. Na apinige na olive ka maria.

¹¹Mu angiangi, igamu na enoni mu tagara i mu! Mu angiangi, igamu na enoni mu tagarahigi na pariki ni vaini! Ga tara hato vê na êhi ma na hana, ma na ara ni ngêra hato ka bani magahuru.

¹²Na varo ni vaini ma na apinige ni olive ka maria hato. Na apinige hato ni ngêra ka bani turi ma ka me. Na enoni hato ka oga ruruhitaga.

¹³Mane ni vogasiha, mu angiangi ma kamu katoa na enangiha. Mu bêbanu i Ruma ni Rotu ma kamu katoa na enangiha suria na bungiana hagenani. Ga hato hagetage na ngêra ma na vaini, vigamu vogasia God renigi.

¹⁴Mu bonasira na enoni, ka harihari. Mu hagahakura na enoni. Mu unira me haku i Ruma ni Rotu, na enoni raha ma na enoni purua, na enoni hato i Jutea. Mu avarasia na Araha God iami.

¹⁵Na tangiana iana na Araha ki hagarangi me noga: na tangiana God raramohaga hunia ki migirâ me igê na hagaitangiha. Na tangiana ngekana ki era ngavê!

¹⁶Na ngêra iaka ka magahuru i maaka. Ma na ta ke katoa? Igia ki hato, vige page vagevage, se vige page obakoro nikâ, matena ga rahesia God i Ruma ni Rotu.

¹⁷Na marâ, ga hasigi, ka meme igê na mako avagavaga. Na bea ni ngêra ka baguru, ma na ruma ni harisi ka baguru ma ka ahoge.

¹⁸Na puruka ka angiangi, suria ga magê. Ki hato hagetage na go tenira. Ma na totoha ni sipi ka mamasiaga nogata.

¹⁹Araha, inê kê avarasigo. Na pariki ni go ma na apinige ka maria hato, manga i ngêgi na gi.

²⁰Na marâ vasiga i bemu ka avarasigo nogata, suria ga mamata tenira na ve ma na go ka maria.