Read Kahua JOELE 3 Bible Online

JOELE 3 - Kahua bible

JOELE 3

¹Na Araha ki vi: “I na matena ngekana inê be katora na kariaku i Juta me Jerusaleme, ke oga aporo igê na ramana.

²Na enoni hato i maveta, ga pe tongesuriê, inê be hagahakura igê na maruguna ni Suriha Raha. Ma i ngekana inê be hagatamasira igê renigi na bagaparongata tangara na kariaku. Ngaira ka tokorenira na Isiraelita, na kariaku, surigi na agua getegi. Ngaira ka votoa na mako i Isiraele.

³Ngaira ka pile tasi renira na kariaku, ga bani henahuraura, hanana vi o ti ki page nahunira. Na kere mane ngaira ka urusira renira na êrâ. Ngaira ka pasi tono ma ka urusigi na vaini renira na kere gete.

⁴Ai ni Taire me Sitone, igamu kamu pe arariê. Igamu hato na ai ni Pilisitia, igamu kamu pe arariê. Manga mu naka na siva tangê inê, inê be hagenago be pariria bê aporo tangagamu igamu.

⁵Igamu kamu hanagogi na siliva ma na golo ma na ruruguha raha iaku, ma kamu nakagi i ruma ni vogasiha iami.

⁶Na ai ni Juta me Jerusaleme mu henahuraura ma kamu hagavuringenira tangara na ai ni Agaia.

⁷Bâ, inê be torera aporo tenigi na agua, mu hagavuringenira igê. Na eraha, mu bani katogi tangara ngaira, inê nikâ be katogi bê aporo tangagamu igamu.

⁸Inê be hagavuringenira na karemi, mane ma na gete, tangara na ai ni Juta, ma na ai ni Juta ka page hagavuringenira hagatê tangara na Sabeo, na enoni i Arabia. Ngaia kani gê visia, inê na Araha!

⁹“Igamu na merongata na kariaku, mu nananêa nga na hearihatana. Mu unira me haku na maneraha ni me iami. Mu hakura me na mane hato ni me iami. Mu heguniguni tanga na hearihatana.

¹⁰Na marâ ni tagaraniha i mu mu katogi re na tangaruha ni hearihatana. Mu tagarahigi na ora renigi na gira iami. Igamu na enoni marusi, mu arâ nga nogami igê na hearihatana.

¹¹Igamu hato na enoni i maveta, mu pe tongesuriê, mu rêrête me haku igê na maruguna ni Suriha Raha.” Araha, gu taharira renira na mane ni me iamu!

¹²Na Araha ki vi: “Na enoni, ga pe tongesuriê, ki tuguhira nga, viga nananê ma ka hakuhaku me igê na maruguna ni Suriha Raha, hanana gê hagatamasira igê.

¹³Ngaira ka erataga ngavê. Mu retera mangagi na ohu, ga mêa. Mu menamenarira manga na guani na vaini mu rusigi. Na apira ka vunu ahaharê renigi, suria na erahata ki aharêsira.”

¹⁴Na rehagaro ma na rehagaro ka oga haku igê na maruguna ni Suriha raha. I sugia ma na tangiana iaku, inê na Araha.

¹⁵Na arito ma na hageha karu rotoroto, ma na higu ka pe mave.

¹⁶Na Araha ki ngere tenia i Sione manga na laione i nguru raha. Na ringena tenia i Jerusaleme ki rongo raha manga na gugusuhia. Na vavearo ma na ano karu gisigisi. Ma na Araha ki anumasira na kariana, ga rukuruku i pasina.

¹⁷Ngaia ki tamasi ki vi: “Isiraelita, mu page aitangisiê maninga, vi inê nga ki na Araha God iami. Inê kê goga i Sione, na hungana apuna iaku. Jerusaleme ki na hinua apuna iaku. Na mamahuara ki asa, vige page rêa aporo.

¹⁸I na matena ngekana na mu ni vaini ka page gahuigi na barani ma na puruka ma na sipi ka page manasigi na hungani. Na ara ni ve hato i Juta ka page vora na ve oto. Na ve banga ki page gogo me tenia na Ruma ni Rotu ma ki page hagavokaria na maruguna i Akasia.

¹⁹“Esipito ki page vora na bagamanihê raha. Etome ki page vora na masusu avagavaga, suria ngaira ka sugaria i Juta ma ka nahuira ka me na enoni koro.

²⁰Inê be nahu baruta. I asa be tako renira na enoni era ngegana. Na kariaku ka page oga gatagata nga i Juta me Jerusaleme, ma inê nga, na Araha, kê goga tare nga i Sione.