Read Kahua AMOSE 1 Bible Online

AMOSE 1 - Kahua bible

AMOSE 1

¹Igê na buka ikê ka oga igê na tamasinga iana o Amose. Ngaia ki nahunira rako na sipi. I pasina i Tekoa. God ki hagagirara renigi na tamasinga renia i Isiraele ngegê, matena o Usia ki marungia i Juta, mo Joroboamo, karena o Jehoasi, ki marungia i Isiraele. God ki vatea renigi na tamasinga ngegê igê na harisi gi rua i nago tarana na nunu raha.

²O Amose ki tamasi, ki vi: “Na Araha ki tamasi raha tenia i Sione, manga na laione i nguru raha. Na ringena ki rongo raha manga na gugusuhia. Na pariki ni go ka marama ma na rauga i hungana i Karamele ka mêgu.”

³Na Araha ki vi: “Na Ai ni Tamasiko ka bani tasi bâraha ngavê. Tahema inê be hagaitangira nga. Ngaira ka katora bera na ai ni Gileata manga na enoni i garasia na ngêra.

⁴Inê be sungia na ruma raha, i torea na maneraha o Hasaele. Na gi ke ngêgi na ruma nganganihaga, i oga igê o Benihata, na maneraha.

⁵Inê be hogegi na maani para ni hinua i Tamasiko. Inê be nahuia ke me na maneraha, i marungia na hinua ni eraha ngekana, henira na ai ni hinua ni vagevageha bera. Na merongata ka page henahuraura na ai ni Siria, ma ka page torera vê, ka ahiahi noga i Keri. Ngaia kani gê visia, inê na Araha.”

⁶Na Araha ki vi: “Na ai ni Gasa ka bani tasi bâraha ngavê. Tahema inê be hagaitangira nga. Ngaira ka henahuraura na enoni igê na hinua rako, ma ka hagavuringenira tangara na ai ni Etome.

⁷Inê be hogegi na maani para ni hinua i Gasa. Na gi ke ngêgi na ruma nganganihaga igê.

⁸Inê be nahuira ke me na maneraha, ga marungirerua i Asetote mi Asekoloni. Inê be hagabângenia na raramohaku ma be hagaitangira na ai ni Ekeroni, ma na ai ni Pilisitia, ga tahitahi mêngara, ka page meme nogata. Ngaia kani gê visia, inê God na Araha.”

⁹Na Araha ki vi: “Na ai ni Taire ka bani tasi bâraha ngavê. Tahema inê be hagaitangira nga. Ngaira ka henahuraura na enoni igê na hinua rako, ma ka hagavuringenira tangara na ai ni Etome, suria ga pe hagamonaria na suruha ni marapeha henira.

¹⁰Inê be hogegi na maani para ni hinua i Taire. Na gi ke ngêgi na ruma nganganihaga igê.”

¹¹Na Araha ki vi: “Na ai ni Etome ka bani tasi bâraha ngavê. Tahema inê be hagaitangira nga. Ngaira ka tarigenira na Isiraelita, na goata, hanana viga nahuira ka meme, suria ga kasi renira. Ngaira ka mangariaga teha ngavê. Na mangariaganiha iata ki asa, vige page hato.

¹²Inê be sungia na hinua i Temani. Na gi ke ngêgi na ruma nganganihaga i hinua i Bosara.”

¹³Na Araha ki vi: “Na ai ni Amone ka bani tasi bâraha ngavê. Tahema inê be hagaitangira nga. Ngaira ka meraheariha na ai ni Gileata, hanana viga parênia na mako tenira. Ngaira ka tatahura na gete, ga obara.

¹⁴Inê be hogegi na maani para ni hinua i Raba. Na gi ke ngêgi na ruma nganagnihaga igê. Ngaira ka page kasikasi manava igê na hearihatana maramaguara.

¹⁵Ka page henahuraura na maneraha ma na kariana. Ngaia kani gê visia, inê na Araha.”