Read Kahua AMOSE 2 Bible Online

AMOSE 2 - Kahua bible

AMOSE 2

¹Na Araha ki vi: “Na ai ni Moaba ka bani tasi bâraha ngavê. Tahema inê be hagaitangira nga. Ngaira ka pe hagahigasia na maneraha i Etome, ma ka sungigi hagamakakagi na surina.

²Inê be sungigi na hinua hato i Moaba. Na gi ke ngêgi na ruma nganganihaga i Keriote. Na ai ni Moaba ka page meme igê na hearihatana, matena na mane ni me ka ngerengere raha ma ka uhihi ahuri.

³Inê be nahuira ke me na maneraha i Moaba ma na kariana hato. Ngaia kani gê visia, inê na Araha.”

⁴Na Araha ki vi: “Na ai ni Juta ka bani tasi bâraha ngavê. Tahema inê be hagaitangira nga. Ngaira ka kitenigi na hagesuringa iaku, ma ka aharê igê na ramata iaku, inê na Araha. Mangara na uvarita ngaira nogata ka vogasira na ataro, ga hagatasira.

⁵Inê be sungigi na hinua hato i Juta. Na gi ke ngêgi na ruma nganganihaga i Jerusaleme.”

⁶Na Araha ki vi: “Igamu Isiraelita, kamu tasi bâraha ngavê. Tahema inê be hagaitangigamu nga. Igamu kamu hagavuringenira na enoni koro, i bara tangara, vige vuri tangagamu na hagaba mu vatera, ka vora renira na enoni vurivuri. I tagenana ma mu katora vigana na enoni matareha, i bara tangara, vige vuri tangagamu na hagaba mu vatera, naka ma na santere iata.

⁷Igamu kamu purira so na enoni matareha, mu kitenira ma kamu sikirira hura na enoni purua ma na ani i bara tangara. O hemana karu rongo era henia na kere gete vurivuri. Igê na tarana ngekê ngairerua karu pe hanetasiê.

⁸I rarona ni ruma ni hagarahenga igamu kamu mêru igê na gahu, mu toregi tenira na enoni matareha, girarani, vi ngaira ka page vurigi tangagamu na hagaba mu vatera. Igê na tarana ngekê igamu kamu aharê igê na ramata iaku. I ruma ni rotu iana God, mu rahesia, igamu ki ruguhigamu na vaini, mu hanagogi tenira na enoni, ga vuripusira mareta renigi tanga na rotu.

⁹“Isiraelita, kariaku, inê nga kê tamanigamu. Inê nga kê hagaerasira ngavê na merongami ni Amone. Naka ma ngaira ka borahu mangagi na nuri ma ka gatagata mangagi na gugura, inê kê okeke pirira.

¹⁰Inê nga kê tavogamu hura tenia i Esipito, ma kê bêngenigamu igê na bagamasusu raha surigi na tangahuru ge he na harisi, ma kê haganahunigamu renia na mako iata na Amorita.

¹¹Tani na hitangimi inê kê atera ka poropete. Ma tani na mane haoru inê kê atera ka Nasarita. Isiraelita, inê na Araha, kê vi monari se mareha?

¹²“Ma igamu nga kamu hagatasira na Nasarita, suria mu hagatonomira renigi na vaini, ma kamu vi pusira na poropete, vi siana ka tarohenia na tamasinga iaku.

¹³Tahema inê be hagaitangigamu ma be hagavotarigamu manga na toraha higa i hagavotaria na enoni ma ki piringia so i ano.

¹⁴Naka ma na enoni, i tangotango rêrê era, i asa vige tahi. Naka ma na enoni, i ramo ngavê, na raramohana ki page vato. I asa na mane ni me, vige hagatahira mareta.

¹⁵Na mane henigi na epage ni me ka page sugare bê aporo. Na enoni, ga tangotango rêrê, ki asa vige tahi. Na mane ni me igê na hosi ki asa vige hagatahira mareta.

¹⁶Igê na tangiana ni hagaitangiha ngekana naka ma na mane ni me ramo teha ngavê, ngaira ka page kasigi na tangaruha iata ma ka gavagava. Ngaia kani gê visia, inê na Araha.”