Read Kahua AMOSE 3 Bible Online

AMOSE 3 - Kahua bible

AMOSE 3

¹Isiraelita, mu karinga na tamasinga iana na Araha renigamu, suria ngaia ki toregamu hura, igamu hato, na ara ni hitangimi, tenia i Esipito.

²Ngaia ki vi: “I berarogata na enoni hato i maveta igamunga nga na ani inê kê ategamu ma inê kê marupegamu. Tahema na bagaparongami ka erataga ngavê. Vikê inê be hagaitangigamu renigi.”

³Na vererua na mane karu girara garu haku vari, manga vi garu pe bani hesurusuru?

⁴Na o ki ngerengere vari, manga vi pe tarahua na ganiana? Na laione ki ngurunguru vari igê na tâtâ iana, manga vi pe ranguia na ganiana?

⁵Na siare ka arara vari igê na hinu, manga viga pe aragenia igê na pa? Na tu rikiriki ki rikiriki vari, manga viga pe puria ke roroa vato?

⁶Na enoni i hinua ka magu vari, manga viga pe rongoa na ahuri ni me? Na bagabevoani ka tarahua vari na hinua, manga vi na Araha ki pe hagamarumungenigi?

⁷Hoi, na Araha God ki pe hagapurungunira na poropete, na kariana.

⁸Manga na laione ma ki ngurunguru, ti ki pe magu? Manga na Araha ma ki tamasi, ti ki usisi, vige tarohenia na tamasinga iana?

⁹Na Araha ki tamasi, ki vi: “Gu hagarongora na enoni raha i Esipito me Asitote, ko vivi, ‘Mu haku me igê na hungani rihia Samaria, ma kamu bâsira na enoni i ngekana, ga hemeronge, ma ka mamasiaga heri.’

¹⁰Na enoni i Samaria ka page hagavunusigi na ruma raha iata renigi na marâ, ga hanagogi ma ka henahuraugi. Ngaira ka hitenia ngavê, vi na ta ki koro.

¹¹Tahema inê na Araha kê vi: Ai ni Samaria, na merongami ka page taharigamu, ma ka page hogegi na ruma nganganihaga, mu rukuruku igê, ma ka page hanagogi na nahuninga iami.”

¹²Na Araha ki vi: “Na avanu ni sipi ki tahura ma na mumukugani na êgana se na karingana na sipi iana tenia na harana na laione. I tagenana ma tangara na Isiraelita ga oga i Samaria. Na kere agua ma na bea se na bana iata ka page hita râ.”

¹³Na Araha raramohaga hunia ki vi: “Karinga! Hagakanura na raraha iana o Jakobo.

¹⁴Igê na tangiana, gê page arâ me igê, inê kê hagaitangira na Isiraelita renigi na bagaparongata. Inê be hogegi erasigi na bea ni vogasiha i Betele ma na ara ni tava ni ahiahinga.

¹⁵Inê be hogegi na ruma ma na ruhu. Ka page ahoge na ruma maremarega. Na ara ni ruma hato ka page tâ i ano. Ngaia kani gê visia, inê na Araha.”