Read Kahua AMOSE 4 Bible Online

AMOSE 4 - Kahua bible

AMOSE 4

¹Gete ni Samaria, mu karinga! Igamu kamu biga manga na puruka binibinikaga ni Basani. Igamu kamu katora bera na enoni matareha. Ma tangara na mane iami igamu kamu vivi, “Me na vaini, kami tono.”

²Na Araha God, i hagamonarigi tare na tamasinga iana, ngaia ki tohe, ki vi, “I page arâ me nga na matena, ga page okeke ratarata renigamu igê na gavi. Igamu kamu page bâ mangara na siare igê na hinu.

³Ga page bugurenigamu tangagi na ani hagarangi na makuruha igê na para, ma ka henahuraugamu tanga i tagua i Heremone. Ngaia kani gê visia, inê na Araha.”

⁴Na Araha God ki tamasi ni mangariaganiha, ki vi: “Isiraelita, Tari era kamu râ tanga na agua apuna i Betele ma kamu tasi igê manga mu obania! Tari era kamu râ i Gilegali ma kamu tasi ke tungigamu! Tari era nga kamu râ! Mu merarâ nga na sipi ma na puruka iami ma kamu vogasi i ngekana renira i mavoraro. Ma igê na ruata na mavoraro mu tagarenigi na ara ni tangahuruta na harisi iami.

⁵Mu râ nga, ma kamu vogasia God renigi na bereti ma kamu visia koro. Mu râ nga, ma kamu parunigamu, suria vigamu mu hagateha renigi na vogasiha. Nga na tarana mu obania ngekana!”

⁶Na Araha God ki vi: “Inênga nga na ani, gê hagamagêsigamu ma kê hagatarigi na ngêra surigi na ara ni hinua hato iami. Ma igamu kamu ama ni guguruga nga tangê.

⁷Matena mu obania na rangi tangagi na mu iami, inê kê pe hagarangisigi. Inê kê hagarangisigi tani ma na mu, ma tani ki mareha. Ngaigi ki avagavaga ma.

⁸Na enoni i tani na hinua ka marumarusiga, suria i mamata na riota. Ma ki naka ma, ma ngaira ka arâ i ta na hinua, hanana viga garigari ve i ngegana, ma na ve ki mareha, vige ararira ngaira hato. Ma igamu kamu ama ni guguruga nga tangê.

⁹Inê kê hagatorangenigi na roga mahana ma na mera tangagi na mu iami. Na pê ka ngêgi hato na mu iami, na pariki iami ni apinige na vaini, ma na apinige na fiki ma na olive iami. Ma igamu kamu ama ni guguruga nga tangê.

¹⁰Inê kê katoa na ringa ki tarahugamu mangara na ai ni Esipito i nago. Inê kê hagamarumungenira na merongami, ka hagamesira na mane ni me iami igê na hearihatana, ma ka henahuraura na hosi ni me iami, ma ki mapu hunigamu na gahuata. Ma igamu kamu ama ni guguruga nga tangê.

¹¹Inê kê hagaerasigamu ngavê mangara na ai ni Sotomo me Gomora. Na hitangimi, ga tahi, ka mangagi na baro, ga tavogi râ tenia na gi. Ma igamu kamu ama ni guguruga nga tangê.

¹²Tahema, Isiraelita, inê be hagaitangigamu nga. Vikê, hoi, mu nananêgi na suriha iaku ma na hagaitangiha iaku tangagamu.”

¹³Ngaia nga God nga na ani i hagavoragi na hungani, na roga ma na atarota na enoni. Ngaia ki hagagirarara na enoni renigi na takotako iana. Ngaia ki katorerua na tangiana ma na bungiana karu heheuri. Ngaia ki marungia na maveta hagenani. Ngaia nga ka na Araha God raramohaga hunia.