Read Kahua AMOSE 5 Bible Online

AMOSE 5 - Kahua bible

AMOSE 5

¹Isiraelita, mu karingê! Inê be kiria na ki ni angiha maramara renigamu.

²Isiraele, kareku, kare viru iaku, ga nahuigo, ko me. I asa gu tahi nikâ. Go tâ hagetage suri parongamu i ano. Ka pe botage renigo.

³Suria na Araha God ki vi: “I Isiraele ka page manga ikê: Ta na hinua ki kasira na rehagaro na mane ni me tanga na hearihatana, ma na tangarê gi tage ma ka page tahitahi ka aporo. Ta na hinua ki kasira na tangarê gi tage na mane ni me, ma na tangahuru gi tage ma ka page tahitahi ka aporo.”

⁴Na Araha ki vi vikê nikâ tangara na Isiraelita: “Mu tari suriê aporo, hanana mu tahitahi.

⁵Siana mu hagarahe i Betele. Siana mu avaravara i Gilegale. Siana mu gahe tara suria Beresiba. Gilegale ka page henahuraura. Betele ki page magahuru ngavê.”

⁶Mu tototo suria na Araha, hanana mu tahitahi. Manga i mareha, Isiraelita, ngaia ki page mangariaga ngavê tangagamu, manga na anguruna na gi. Na gi ngekê ki page ngaura i Betele, ma ki bara, vige hunuia.

⁷Ki page era ngavê tangagamu, suria mu pe botage renia na otoha ma kamu heherigagi na ramata.

⁸Na Araha ki hagavoragi na higu, ma na ara ni marara ve i vavearo na rogaroga ahuru ma na hutohutoêa. Ngaia ki urusia na roto renia na mavetana ma na tangiana renia na bungiana. Ngaia ki katoa na ruarua ki anuia na maveta. Ngaia nga na Araha ki katogi vigana.

⁹Ngaia ki kasira so na enoni raha ma ki hogegi na ruma nganganihaga iata.

¹⁰Igamu kamu ruhira na enoni, ga gunahia na otoha igê na kotiha, ma kamu kitenira na enoni, ga tamasi igê na monariha.

¹¹Igamu kamu hagamamasiagara na enoni matareha, ma kamu hanagogi tenira na ngêra iata. Tahema, naka ma igamu kamu toregi na ruma bâkoro na hê, i asa, vigamu oga igê. Naka ma igamu kami hasigi na pariki ni vaini, i asa, vigamu tono na guani na vaini igê.

¹²Inê kê bani girara, ga era ngavê na bagatarihami ma na bagaparongami. Igamu kamu merongasira na enoni koro. Igamu kamu vatevate, ma igê na kotiha igamu kamu pe vatea na enoni matareha na marâ vige oto tanga.

¹³Igê na mateni ni bagabevoani manga ngegê na enoni, ga takotako mataha, ka marape ma!

¹⁴Mu gunahia na koroha, ma siana kamu tenia na eraha, hanana mu tahitahi. Ma na Araha God raramohaga hunia ki page ngahisigamu maninga manga mu visia i ngekê.

¹⁵Mu kitenia na eraha, ma kamu barigia na koroha, ma kamu katoa na otoha, ki akê me aporo igê na kotiha. Na Araha ki page takuira vari na hitangita na Isiraelita, na ani ga page tahitahi mêngara.

¹⁶Vikê na Araha God raramohaga hunia ki vi: “I na ara ni mahera ni hinua ma i tara na enoni ka page angiangi maramara igê. Ga page unira me na enoni matareha, ga tagara i mu, hanana ga angiangi maramara henira na ani ni angiha.

¹⁷Na enoni igê na ara ni pariki ni vaini ka pe obakoro, ma ka angiangi maramara ma hete. Na tarani hato ngegê ka page vora me, matena gê arâ me, kê hagaitangigamu. Ngaia kani gê visia, inê na Araha.”

¹⁸Na tangiana, mu naasia na Araha vi arâ me igê, ki page era ngavê tangagamu. Na ta ki page koro tangagamu renia na tangiana ngekana? Ngaia ki na tangiana ni mamasiaganiha, mareha vi tanga na vagevageha.

¹⁹Ngaia ki manga na mane i gava tenia na laione ma ki me torahe tanga ma na hua, se i manga na mane i ahiahi i ruma iana. Ngaia ki oga so igê na bea, ma na ma ki garea.

²⁰Na tangiana, i page arâ me igê na Araha, ki na tangiana ni rotoha ma ni mamasiaganiha, ni bagabevoani ma ni hataerana.

²¹Na Araha ki vi: “Inê kê kitenigi na tangiani raha, mu hagarahe igê. I mâmâga na obaku renigi. Inê kê usitenigi hagetage.

²²Naka ma mu susu tangê, se kamu vogasiê renigi na ngêra, i asa hagetage ve aganarigi. Naka ma mu vogasiê renigi na puruka se na sipi, mu bani hagabigara, i asa hagetage be botage renigi.

²³Siana kamu hagabono obaku renigi na kiha. Inê kê pe pasi karingagi na gita iami.

²⁴Mu katogi na koroha ma na otoha ka tehateha hete, mangagi na ve oto, i asa vige page mamata.

²⁵“Isiraelita, surigi na tangahuru harisi ge he, matena gê bêngenigamu igê na bagamasusu raha, ki hega, igamu kamu vogasiê vari renigi na ngêra ma na ganiani?

²⁶I na matena ngekana igamu kamu merâ vari na nununa o Sakuti, na ataro raha iami? Se na nununa vari na higu Kaivane, na ataro iami? Se na nunuta vari na ataro getera iami, mu tahegi?

²⁷Ma suria mu hagarapera i ngekê, tahema inê be hagamarumungenira na merongami, ke henahuraugamu tanga i Tamasiko ma kere râ, ma igamu kamu page migirâ na nunuta na ataro iami. Ngaia kani gê visia, inê na Araha God raramohaga huniê.”