Read Kahua AMOSE 6 Bible Online

AMOSE 6 - Kahua bible

AMOSE 6

¹Igamu na maneraha i berarogata na Isiraelita, na enoni purua ka avarasigamu tare. Naka ma i mataku ma tangagamu na ogaha iami i Sione, naka ma mu ape tatara i Samaria, ma ki page era ngavê tangagamu.

²Igamu kamu vi, “Mu râ i Kalene ma kamu bâ igê. Ma hemuri kamu arâ i hinua raha i Hamati ma kamu arâ i Gata i Pilisitia. Hoi, na ogaha iata vari ki koro teharia na anika? Na apanena iata vari ki raha teharia na anika?’

³Naka ma igamu kamu obania, vigamu hagatêria na tangiana ni mamasiaganiha ngekana, na ara ni marâ hato, mu katogi, ka okea hete, ki hagarangi me na tangiana ni hagaitangiha. I page era ngavê tangagamu!

⁴Igamu kamu gâga ma igê na bea reoreoga iami, ma kamu ngêngê ma na hasigota na karena puruka binibinikaga ma na sipi. I page era ngavê tangagamu!

⁵Igamu kamu barobaro ki ma henigi na gita. Mu vi vari mu manga o Tavite?

⁶Igamu kamu totono ma na vaini, na apira ma na apira. Igamu kamu monegamu maremi ma renigi na marâ, ga sigini koro ngavê, ma kamu pe ape ruruhi hete renia na hagaitangiha, i sugi tarahugamu, Isiraelita.

⁷Tahema igamu ka na ani ga page henahuraugamu hagenago. Ma na magotoha ma na vagevageha iami ka page hato ngavê.”

⁸Na Araha God raramohaga hunia ki tohe, ki vi: “Inê kê kitenia ngavê na paroparoha iata na Isiraelita. Inê kê usitenigi na ruma raha ma nganganihaga iata. Inê be hagamarumungenira na merongata, ke henahuraua na hinua raha iata i Samaria henigi na ara ni marâ hato igê.”

⁹Manga na tangahuri nuni, ga tahitahi mêngara, ma ka rukuruku igê ta na ruma, ngaira hato ka page me.

¹⁰Manga ta na enoni, ma ki bêbanu vê i ruma, hanana vi torea na gahuana na goana, ki vi bagia, ngaia ki page hagatea na enoni, i goga igê na ruguna roto i ruma. Ki vivi, “Igo getego ma ngekana?” Ma na enoni ngekana, i arami, ki vivi, “Mareha.” Ma ngaia i maani ruma ki page suia banu, ki vi, “Manapu! Manapu! Siana ko visia na atana na Araha. I era ma ki rongorerua.”

¹¹Bâ, manga na Araha, ma ki tamasi ma, na ara ni ruma hato, na ani raha ma na ani sisite, ka page ahogehoge ma ka aruhuruhu.

¹²I hega, na hosi ka girara vari ga tangotango igê na maniverake? I hega, na enoni ki girara vari i hikiru igê na tagaru? Naka ma, ma igamu kamu bani urusigi na koroha ma na otoha renigi na marâ era, mu hagamesira na enoni renigi.

¹³Igamu kamu parunigamu renia mu henahuraua na kere hinua i Lotebare. Igamu kamu tamasi paroparo, kamu vi, “Igami maremami kami ramo teharia na hinua i Karanaimi!”

¹⁴Bâ, na Araha God raramohaga hunia ki vi, “Isiraelita, inê be hagamarumungenira na merongami, ke hagamamasiaga apemi, ma ke parênia na apanena iami tenia i ta bogona tanga i ta bogona.”