Read Kahua AMOSE 7 Bible Online

AMOSE 7 - Kahua bible

AMOSE 7

¹Na Araha God ki hagamaruteê. Inê kê bâsia, vi ngaia ki hagavora na ruruha ni pê, i murina na matena, ga bani oparigi igê na nagoni na mu tanga na maneraha. Ga bani retegi na go, ma na go ki vavaka aporo noga.

²Inê kê bâsira na pê, ga ngêgi hato ngavê na go ma na rauga. Ma inê kê nungia na Araha, kê vi: “Araha God, gu bonotenigi na tasi iata na Isiraelita, na kariamu. Manga i he ka girara, viga tahitahi? Ngaira ka kahu mamakaga ma!”

³Na Araha ki urusia na katoha iana, ma ki vi: “Na tarana, go bâsia, ki asa, vige vora me.”

⁴Na Araha God ki hagamaruteê nikâ. Inê kê bâsia, vi ngaia ki hagarêa na gi, hanana i hagaitangira na kariana renia. Na gi ki hagamamataria na asi raha i ruguhana na maveta, ma ki sugi ngêgi noga na mu.

⁵Ma inê kê nungia na Araha, kê vi: “Araha God, siana! Manga i he na kariamu ka girara, viga tahitahi? Ngaira ka kahu mamakaga ma!”

⁶Na Araha ki urusia nikâ na katoha iana, ma ki vi: “Na tarana, go bâsia, ki asa nikâ, vige vora me.”

⁷Na Araha ki hagamaruteê nikâ. Inê kê bâsia, vi ngaia ki ura kerekê igê na apê, ma ki têa i rimana na varo, i baroa igê na higahigata, hanana vi girara, vi na apê ki ura otooto se tatare.

⁸Ma na Araha ki hagateê, ki vi: “Amose, na ta ko bâsia, gê têa?” Inê kê arami, kê vi: “Na varo igê na higahigata.” Ma ngaia ki vi: “Na varo ngekê ki hagabângenia, vi na kariaku ka manga na apê, i ura tatare, suria ga pe oto na parongata. I ngekê ki asa vê, be urusia nikâ na katoha iaku. Inê be hagaitangira nga.

⁹Inê be hagamagahurugi na agua ni vogasiha iata na raraha iana o Isako, ma na ruma ni hagarahenga i Isiraele ke aruhuruhu. Inê be taharira na raraha iana o Jeroboamo, na maneraha, mataro me ke magahuru.”

¹⁰O Amasia ki na maneraha ni vogasiha i Betele. Ngaia ki hagarongo renia o Amose tanga o Jeroboamo, na maneraha i marungia i Isiraele. Ngaia ki vi vikê: “Ngaia ki harikato pinihi renigo i Isiraele. Na ateateha iana ka page hagareke tarara na enoni hato i Isiraele.

¹¹Ngaia ki vi vikê: ‘O Jeroboamo ki page meme igê na hearihatana, ma ka page henahuraura na Isiraelita tanga na agua hagatê.’”

¹²O Amasia ki tamasi tanga o Amose, ki vi: “Poropete, i uhu noga. Gu aporo i pasimu i Juta, ma ku ateate igê. Ma ngaira i ngekana ka tamanigo.

¹³Gu tamasi poropete i ngekana, mareha vi ikê i Betele, suria ngaia ki na ruma ni hagarahenga raha igê na agua, i hagarahe igê na maneraha.”

¹⁴O Amose ki arami, ki vi: “Inê ki mareha vi na poropete na ani go takusia. Na vaemaku ki mareha vi na poropete nikâ. Inê kê pe râ me tenia na raraha ni poropete. Inê kê nahuni ma i apeta na sipi iaku ma na pariki na apinige ni fiki iaku.

¹⁵Ma ngaia nga na Araha ki hagaharoê tenira na sipi iaku, ma ki bonasiê, ki vi, ‘Gu arâ, ma ko tamasi poropete tangara na kariaku i Isiraele.’

¹⁶Igo, Amasia, igo ko obania vari, vigo rêra pusiê, siana kê tagara manga na poropete ma kê ramonira na Isiraelita? Hoi, gu karinga na marâ, i visia tangago na Araha, ki vi:

¹⁷‘Amasia, na gete iamu ki page vora renia na êrâ i hinua raha. Na karemu ka page me igê na henahuita. Na mako iamu ka page voavoasia tangara na enoni getera. Ma igo maremu ko page meme i na agua hagatê i pasita na enoni ahuroto. Ma ka page henahuraura ngavê na Isiraelita.’”