Read Kahua AMOSE 9 Bible Online

AMOSE 9 - Kahua bible

AMOSE 9

¹Inê kê bâsia na Araha, i ura hagarangia na bea ni vogasiha. Ngaia ki tamasi, ki vi: “Mu vangigi na gogohane igê na u ni hê na Ruma ni Rotu, hanana i gisigisi na ruma hagenani. Mu hogegi hurira na enoni, ga hagarahe igê. Na ani, ga gava ka tahitahi, inê be hagamesira igê na henahuita. I asa hagetage ta na enoni, vige ahi teniê.

²Naka ma vige so igê na agua iata na enoni, ga me, inê be tahurara akê me tenia. Naka ma vige akê i haha i vavearo, inê be tahusigenira vato.

³Naka ma vige ahiahi igê na barana i Karamele, inê be garira ma be torera. Naka ma vige ahi teniê igê na rutuni i asi, inê be bonasia na ega raha, ke garahunira.

⁴Naka vi na merongata ma ke henahuraura, inê be bonasira na enoni getera, ke nahu hunuira. Inê kê obania nga, vigê erasira ngavê, mareha ve tamanira.”

⁵Na Araha God raramohaga hunia ki hataria na maveta. Na maveta ki gisigisi, ma na enoni hato igê ka angiangi maramara. Na maveta hagenani ki arubobo manga na ve i Nile.

⁶Na Araha ki naka i pasina, i avorana na vavearo. Ma ngaia ki naka na vavearo ki buhia na maveta. Ngaia ki katoa na ruarua ki anuia na maveta. Na Araha nga ki katogi vigana.

⁷Na Araha, ki vi: “Isiraelita, tangê inê, mu takusia vari, mu pe mangara na ai ni Etiopia? Monari, inê kê toregamu hura tenia i Esipito. I hega, inê kê pe torera hura vari na ai ni Pilisitia tenia i Kerete? I hega, inê kê pe torera hura vari na ai ni Siria tenia i Kire?

⁸Inê nga na Araha God kê hahutugira na ai ni Isiraele, ga tasi tare ngavê. Inê be mutera, ma ki mareha vi be mutera ngaira hato na raraha iana o Jakobo.

⁹“Bâ, matena gê bani tokorenira na Isiraelita i pasita na enoni ga pe Siu, inê kê bonasira na merongata, ka hiora, manga na enoni i rusia na suru. Inê be hiora, hanana ga gâga getera ma na ani koro tenira na ani era.

¹⁰Na kariaku, ga erataga, ka page me igê na henahuita, ma ka page me nogata na ani, ga vivi: ‘God ki asa, vige hagamarumungenigi na bagabevoani, ke tarahugia.’”

¹¹Na Araha ki vi: “I ta na matena inê be hagakoroa aporo na arahanga iata na Isiraelita, ki nganganihaga aporo manga na matena iana o Tavite, suria na arahanga ngekê ki manga na ruma i ahoge. Inê be surungia ma be torea aporo ke bâ manga i nago.

¹²Vikê na Isiraelita ka page taua aporo na mako, na ai ni Etome ka bani parênia tenira. Ngaira ka page marungigi na agua getegi nikâ, gê bani visigi vi na aniku. Ngaia kani gê visia, inê na Araha gê page katogi.”

¹³Na Araha ki vi: “Bâ, i na bevoana i muri me na mako ki page korokoro ngavê. Na mu hato ka page akê garigari ngavê. Mareha vige kasikasi bevoa na hasinga ma na hutohutoêa. Na pariki ni vaini ka rasirasi hesurisuri. Na tavoni na vaini ka tatata berabera igê na barani ma na hungani.

¹⁴Inê be torera aporo na kariaku tanga i pasita mareta. Ngaira ka page tagarahigi aporo na hiru iata ma ka page gâga igê. Ngaira ka page hasihasi na pariki ni vaini, ma ka page tonomigi na tavoni na vaini. Ngaira ka page tagarahigi na mu ma ka page ngêngê igê.

¹⁵Inê be hasira na kariaku igê na agua, gê bani vatera, ma ki asa, vige page ragera nikâ. Ngaia kani gê visia, inê na Araha God iami.”