Read Kahua OBATIA 1 Bible Online

OBATIA 1 - Kahua bible

OBATIA 1

¹Igê na marâ, na Araha God ki hagagirara o Obatia renigi, hanana i visigi mataha renira na ai ni Etome. Na Araha ki bani hagatorangenia na mane tora tamasinga iana tangara na enoni, ga pe Siu. Igia ka bani rongoa, i vi: “Nanê, ma ke râ, ke meraheariha na ai ni Etome!”

²Na Araha God ki tamasi, ki vi: “Ai ni Etome, i bara tangagamu. Na merongami ka page teharigamu. Na enoni hato ka page ruhigamu.

³Na paroparoha iami ki bani hagabekasigamu. Na hinua raha iami ki manga na hê meo ma ki nganganihaga igê na hungana. Igamu kamu tamasi paroparo, kamu vi, ‘Ti ki page teharigia?’

⁴Naka ma mu tagarahia na hinua iami i haha i na agua i aheahe igê na ahetaronga, se i vavearo i berarogani na higu, inê nga kê okegamu vato! Ngaia kani gê visia, inê na Araha.

⁵“Matena na mane hanago se na manero ka hogegi na ruma igê na bungiana, ngaira ka hanagogi ma na marâ, ga tenigi. Matena na enoni ma ka hanehane na ni, ngaira ka husigi ma ta guani.

⁶Ma igamu, Etome, na merongami ka page mutegamu ngavê. Etome, na raraha iana o Esau, naka ma na ruruguha iami mu bani pinihigi, na merongami ka page tarahugi ma ka page hanagogi.

⁷Na agua, ga suru, viga tamanigamu igê na hearihatana, ka page hagaparugamu, ma ka page paigamu hura tenia na apanena iami. Na enoni, ga komanigamu, ka page teharigamu igê na henahuita. Na tamami, mu merabêrihu, ka page sutasuta karigamu. Ngaira hato ka page manavatenigamu, ka vivi, ‘E, mu vi gamu, vigamu girara bâraha, ma i he ngaigi?’”

⁸Na Araha ki tamasi, ki vi: “Na matena gê page hagaitangia igê i Etome, inê kê page hagamesira na enoni tako mataha igê, ma be hagamagahurugi na takoha mataha tenia na agua ni barani ngekana.

⁹Na mane ni hearihatana i Temane ka page bunubunuga ngavê, ma na ara ni mane ni me i Etome ka page mutemute ngavê.

¹⁰Suria mu nahuira ka me na goami, na raraha iana o Jakobo, ma kamu hanago tenira, tahema ga page hagamakigamu ngavê ma ka page mutegamu.

¹¹Igê na matena na merongata na goami i Juta ka hogegi na maani para ni hinua, ka banu i Jerusaleme, ka henahuraura na goami, ka toregi vê na nahuninga iata ma ka tonganigi, ma igamu kamu ura, kamu borebore ma. Mu era ngavê mangara na mamahuara ngegana.

¹²I pe oto ngavê tangagamu, vigamu makimaki tenira vigana na goami i Juta, suria i tarahura na bagabevoani. I era ngavê na parongami! I pe oto ngavê tangagamu, vigamu vagevage vigana, suria na merongata ka hagasuhia na hinua iata. I era ngavê na parongami! I pe oto ngavê tangagamu, vigamu manavatenira vigana igê na matena na mamasiaganiha iata. I era ngavê na parongami!

¹³I pe oto ngavê tangagamu, vigamu banu vigana i hinua iata na kariaku, hanana vigamu manavatenira ma kamu hanagogi na nahuninga iata igê na matena na mamasiaganiha iata. I era ngavê na parongami!

¹⁴I pe oto ngavê tangagamu, vigamu ahehi hekarigi vigana igê na matangani na tara, hanana vigamu ranguira na enoni, ga gavagava tenia na hinua. I era ngavê na parongami! I pe oto ngavê tangagamu, vigamu tagarenira vigana igê na mamasiaganiha iata tangara na merongata. I era ngavê na parongami!”

¹⁵Na Araha ki vi: “I hagarangi me noga na tangiana inê nga na Araha kê page surira igê na enoni hato i maveta. Igamu na ai ni Etome, na tarani mu katogi ka page paririgi aporo me tangagamu. Na marâ mu haganegagi ka mama aporo ma me tangagamu.

¹⁶“Kariaku, ai ni Isiraele, igê na hungana apuna iaku i Sione inê kê bani hagatonomigamu igê na kâkâ ni hagaitangiha raha. Ma bâ, na enoni i maveta, ga merongasigamu, inê be hagatonomira nogata igê na kâkâ ni hagaitangiha, i teharia na animi na hagaitangiha. Ma i murina na hagaitangiha ngaira hato ka page anu râ.

¹⁷“Na kariaku ka page tahitahi i hungana i Sione, i page vora aporo na agua apuna. Na raraha iana o Jakobo ka page nahunia aporo na mako iata mareta.

¹⁸Na raraha iaterua o Jakobo mo Josepo ka page mangagi na gi. Ma na raraha iana o Esau ka page mangagi na go, i maria. Na gi ki page ngaugi hato na go. Na raraha iana o Esau ki page mamata ngavê. Ngaia kani gê visia, inê na Araha.”

¹⁹Na Isiraelita ka page meraheariha na merongata, ma ka page taugi na mako i Negeve, na hungani kere banu i Etome, na bena kereso i Sefela, ga oga igê na ai ni Pilisitia. Ma ngaira ka page nahunia nikâ na hinua raha i Samaria ma na mako i Eperaimi. Na raraha iana o Benamino ka page nahunia aporo kerekê i Gileata.

²⁰Na ai ni Isiraele, ga bani henahuraura, ka page aporo me i pasita. Ma na mane ni me iata ka page meraheariha na ai ni Punisia, ma ka page parênia na mako iata ki tariha i Sarepata. Na enoni i Jerusaleme, ga bani henahuraura tanga i Sefarata, ka page aporo me nogata, ma ka page parênigi na hinua i Negeve.

²¹Na mane ni me i Jerusaleme, ga bani tehateha tare, ka page teharia i Etome nikâ, ma ka page marungia. Ngaia getea nga na Araha ki na marungiha.