Read Kahua JONA 1 Bible Online

JONA 1 - Kahua bible

JONA 1

¹Ta na tangiana na Araha ki tamasi tanga o Jona, karena o Amitai.

²Ngaia ki vi: “Go akê i hinua raha i Nineve, ma ko ramonira renigi na bagaparongata, suria inê kê girara, vi ngaira ka erataga ngavê.”

³He naka, ma ngaia ki bê so, suria ma i obania, vi gavatenia na Araha. Ngaia ki bê so tanga i Jopa. Ma i ngekana ngaia ki tarahua igê na haka, i sugi tavoraha tanga i Sipeni. Ngaia ki taharia, ma ki tage henira na mane tagara igê, ma ki râ tanga i Sipeni, suria i vi ma, vi i ngekana na Araha ki mareha igê.

⁴Naka ma, ma na Araha ki katoa na apena na roga raha, ma ki era ngavê na asi. Na roga ki ramo teha ngavê, ma na navo ka bâ manga ga kamaria na haka.

⁵Na mane tagara igê na haka ka bubununuga bâraha, ma ka kasi harê na erutanga, hanana viga hagamaha na haka. Ma ngaira ka avarasira hegetigi na ataro iata. Matena ngekana o Jona ki bani so i rarona ngavê na haka igê ta na kiboru, ki tâ ma ki mêru bore.

⁶Na mane, i torea na haka, ki tarahua i ngekana, ma ki vi: “Na ta go migimêru? Gu aharaga, ma ku avarasia na animu na ataro, hanana vari ge takuigia ma ke hagatahigia.”

⁷Ma hemuri na mane tagara igê na haka ka hetamatamasi, ka vi: “Nika, ge matu, hanana ge tarahua, vi o ti na hitangika kini erasia ta na marâ. Ngaia ki hagarateka ka oga igê na perenga.” Vikê ngaira ka matu, ma ka tarahua vi o Jona.

⁸Vikê ngaira ka hagatea, ka vi: “Gu visia me tangagami. Na ta ko erasia, tahema i tarahugia na perenga? Na râha iamu ngekê tanga na ta? Igo ko râ me tenia he? I pasimu i he? Igo na ai ni ta?”

⁹O Jona ki arami, ki vi: “Inê ki na Hebereo. Inê kê rahesia na Araha God raramohaga hunia, i hagavoragi na vaveraro, na ano ma na asi.”

¹⁰Ngaia ki hagarongora, vi ngaia ki gavatenia na Araha. Na mane tagara igê na haka ka magu ngavê renia na tarana ngekê, ma ka hagahunia, ka vi: “Na tarana, go katoa ngekê, ki era ngavê.”

¹¹Na asi ma na roga karu ama ni ramo nga. Vikê na mane tagara igê na haka ka hagatea o Jona, ka vi: “Mi katogo mara ta, ma ke piova aporo na asi?”

¹²O Jona ki aramira, ki vi: “Mu kasiê harê i asi, ma ki kahu piova. Inê kê girara, vi na tasi iaku kani tarahugamu renia na perenga ngekê.”

¹³Naka ma i vi vikana, ma na mane tagara igê na haka ka uhungia nga, viga harutea na haka tanga na one. Ma ki bara ngavê tangara, suria na asi ki ama ni era ngavê.

¹⁴Tahema ngaira ka avarasia na Araha, ka vi: “Araha, igami kami nungigo, siana ko hagamesigami nogamami, suria mi hagamesia na mane ikê. Igo nga na Araha ki na hunani na marâ hato ngegê.”

¹⁵Vikê ngaira ka ragea o Jona ma ka kasia harê i asi. Ki para ma, ma ki piova.

¹⁶Na tarana ngekê ki katora na mane tagara igê na haka ka magu ngavê, ma ka hagahigasia bâraha na Araha. Vikê ngaira ka vogasia, ma ka tohe, viga tototo suria ngaia.

¹⁷Na Araha ki katoa na ega raha ngavê, ki unumia o Jona. Ma ngaia ki oga i obana na ega surigi na tangiani gi oru ma na bungiani gi oru.