Read Kahua JONA 3 Bible Online

JONA 3 - Kahua bible

JONA 3

¹Na ruata na matena na Araha ki tamasi nikâ tanga o Jona.

²Ngaia ki vi: “Gu akê i hinua raha i Nineve, ma ku tarohenia igê tangara na enoni i ngekana na tamasinga, gê bani hagatorago i nago.”

³O Jona ki tê viteana na Araha, ma ki râ i Nineve. Ngaia ki na hinua raha ngavê. Na enoni ki girara i toregi igê na tangiani gi oru tenia tapanena tanga i tapanena.

⁴O Jona ki tavoraha tenia i tapanena. I murina na tangiana hagenani i râ suria, ngaia ki tokorenia na tamasinga, ki vi: “I murini na tangiani tangahuru ge he, haganega tenia i ngekê, i Nineve ki aruhuruhu.”

⁵Na ai ni Nineve ka tongesuria na tamasinga iana God. Vikê ngaira ka vi, vi na ara ni enoni hato ki tuguhira, ga harihari, ma na enoni hato, na enoni raha ma na enoni purua, ki tuguhira, ga gahugahu renigi na kakagani na gahu, na girarana, vi ngaira ka angitenigi na bagatarihata ma ka urisi parongata.

⁶Matena i rongo na maneraha, i marungia i Nineve, ngaia ki pania na atohana, ki tasigi râ na tuguni ma na gahu ni maneraha, ma ki urisi renigi na kakagani na gahu, ma ki oga hurihuri so ma i ano.

⁷Ngaia ki hagatorangenira na mane tora tamasinga, ma ka hagarongora na ai ni Nineve renia na tamasinga vi: “Inê na maneraha ma na kariaku, igami kami bonasigamu vikê. Siana hagetage ta na enoni, vige ngêngê, se vige totono. Na puruka ma na sipi ki apu tangara nikâ.

⁸Ki tuguhira na enoni hato, viga gahugahu tatari, ma ka buhigi nikâ na gerita na puruka ma na sipi renigi. Na enoni hato ki tuguhira, viga avarasia God i mêrihata hagenani, ka angitenigi maninga na bagaparongata ma na bagatarihata, ma ka urisi parongata.

⁹Vari God ki page urusia na katoha iana, ma ki page manava aporo vari na obana tangagia. Vikana igia ki asa iaka vari, vige page me.”

¹⁰God ki bâsira vikana, ma ki bâsira, ga urisi parongata. Tahema ngaia ki urusia na katoha iana, ma ki pe hagaitangira, manga i bani takusia renira.