Read Kahua TOMAHA NINUNI 10 Bible Online

TOMAHA NINUNI 10 - Kahua bible

TOMAHA NINUNI 10

¹Na Araha ki vi tanga o Moise, ki vi:

²“Gu tagarahirerua na ahuri gi rua renia na siliva tanga go unira haku me na enoni ma tanga go raragea na tênga.

³Manga na ahuri gi rua ngegana ma karu angiangi karu okegenigi na ringeterua, na enoni hato ka hakurigo me nga i maana na ruma na gahu apuna iaku.

⁴Manga vi na ahuri gi tage ma ki angiangi ki okegenia na ringena, ngaira ma na bêni na varo ninuni ga bêngenira na mane ni me, kaniga hakurigo me.

⁵Manga na ahuri gi rua ma karu angiangi kasikasigi na ringeterua, hagenago na varo ninuni ga oga i na apanena bêkê na ruma na gahu apuna ka hagarurugu nga ma ka arâ.

⁶Matena na ahuri karu angiangi kasikasi na ruata na matena, na varo ninuni i mahata na ani ngegana ka hagarurugu nogata ma ka arâ. Na angiangiha kasikasi ki tanga ga raragea na tênga.

⁷Na angiangiha i okegenia ki tangara na enoni hato ka hakuhaku me.

⁸Ngaira o karena o Aroni ga mane ni vogasiha kaniga uhirerua na ahuri. “Na ramata ni uhinga ni ahuri kani igê.

⁹Mu uhirerua na ahuri tanga na hearihatana igê na agua iami, matena na merongami ka taharigamu ma igamu kamu meraheariha. Vikana inê na Araha God iami be tamanigamu ma be hagatahigamu tenira na merongami.

¹⁰Mu ahuri nikâ igê na tangiani raha ni vagevageha iami, manga igê na tangiani i rikiriki me na hageha se igê na tangiani raha getigi ni rotu, matena mu susu tangê ma kamu tagarenigi na vogasiha ni ngêhaku. I ngekana nikâ inê be takusigamu igê, suria inê nga ka na Araha God iami.”

¹¹Na tangahuruta gi rua na tangiana igê na ruata na hageha igê na ruata na harisi, i murina na Isiraelita ga hura tenia i Esipito, na vaha i buhia na ruma na gahu apuna iana na Araha ki ahe akê ki râ.

¹²Ngekana na Isiraelita ka tavoraha tenia na bagamasusu raha i Sinai. Na vaha ki rârâ mataro me ki tâ tonge igê na bagamasusu raha i Parane.

¹³Ngaira ka ragea na tênga ma ka tavoraha surigi na ramata iana na Araha i harana o Moise tangara.

¹⁴I na ara ni mateni ga tavoraha, ngaira ka arâ hesurisuri nga igê na atohata hegitigi manga i visia na ramata. Ngaira na varo ninuni i ruguhana na gahu na girarana vi na apaneni me iana o Juta ka tavoraha hagenago. O Nagasone karena o Aminataba ki bêngenira na varo ninuni iana o Juta.

¹⁵O Netanele karena o Suare ki bêngenira na varo ninuni iana o Isakare,

¹⁶ma o Eliaba karena o Geloni ki bêngenira na varo ninuni iana o Sebuluni.

¹⁷Hemuri na hagosi ninuni iaterua o Geresone mo Merari ka hogea na ruma na gahu apuna ma ka metavoraha.

¹⁸Hemuri na varo ninuni i ruguhana na gahu na girarana vi na apaneni me iana o Rubeni ka tavoraha. O Elisure karena o Seteure ki bêngenira na varo ninuni iana o Rubeni.

¹⁹O Selumiele karena o Surisatai ki bêngenira na varo ninuni iana o Simeone,

²⁰ma o Eliasapa karena o Teuele ki bêngenira na varo ninuni iana o Gata.

²¹Hemuri na hagosi ninuni iana o Kehata tenia na raraha iana o Levi ka tavoraha. Ngaira ka migirâ na marâ apuna. Matena ngaira ka ata vê igê na tênga haoru, na ruma na gahu apuna ka bani hagêrasia aporo.

²²Hemuri na varo ninuni i ruguhana na gahu na girarana vi na apaneni me iana o Eperaimi ka tavoraha. O Elisama karena o Amihuti ki bêngenira na varo ninuni iana o Eparaimi.

²³O Gamaliele karena o Petasure ki bêngenira na varo ninuni iana o Manase,

²⁴ma o Abitane karena o Gitone ki bêngenira na varo ninuni iana o Benamino.

²⁵Hemuri tatare na varo ninuni i ruguhana na gahu na girarana vi na apaneni me iana o Tane ka tavoraha. Ngaira ka anumasia na murina na râha. O Agiesere karena o Amisatai ki bêngenira na varo ninuni iana o Tane.

²⁶O Pagiele karena o Okarane ki bêngenira na varo ninuni iana o Asere,

²⁷ma o Agira karena o Enane ki bêngenira na varo ninuni iana o Napatali.

²⁸Nga hanana na Isiraelita ga hagarurugu ma ka tavoraha ngekana.

²⁹O Moise ki vi tanga o Gobaba o vehana o karena o Jetero na mane ni Mitiani, ki vi: “Igami kami tavoraha noga tanga na agua, na Araha i bani surua vi haganahunigami renia. Ngaia ki bani suru, hanana vi katogami na Isiraelita kami gâgâ igê na ramana. Hoi, gu râ me henigami ke tage nahunia na ramana.”

³⁰O Gobaba ki arami, ki vi: “Mareha. Inê kê obania vigê aporo i pasiku.”

³¹O Moise ki vi: “Se! Siana! Siana ko arâ tenigami. Igo ko bani girara na tavani tênga igê na bagamasusu raha. Igo ko bani girara na tara.

³²Manga go arâ me henigami, igia ka tage nahunia na ramana, na Araha i bani surua tangagami.”

³³Na Isiraelita ka pania i Sinai, na hungana apuna, ma ka tavoraha ka râ surigi na tangiani gi oru. Na bokesi na suruheri iana na Araha ki hagenago tarata, hanana i hagabâsira renia na agua tanga na tênga.

³⁴I na ara ni matena ga sugasuga tenigi na tênga, na vaha iana na Araha ki gâgâ i avorata na Isiraelita suria na tangiana.

³⁵I na ara ni matena na bokesi na suruheri ki nanê ni râha, o Moise ki vivi tare: “Araha, gu aharaga! Tarigenira râ na merongamu! Ku sikirenira na ani ga kitenigo!”

³⁶I na ara ni matena i gâgâ na bokesi na suruheri o Moise ki vivi tare: “Araha, gu aporo tangara na kariamu na Isiraelita, na rehagaro ma na rehagaro!”