Read Kahua TOMAHA NINUNI 11 Bible Online

TOMAHA NINUNI 11 - Kahua bible

TOMAHA NINUNI 11

¹Na enoni ka haganega ka hagagege tanga na Araha renigi na mamasiaganiha i tarahura. Matena na Araha ki rongora, ngaia ki mangariaga ngavê tangara, ma ki hagaitangira renia na gi. Na gi ki tarê i berarogata ma ki aruhuruhu ta bogona na tênga.

²Na enoni ka avarasia o Moise. O Moise ki avarasia na Araha, ma na gi ki me.

³Tahema ka hêtana na agua ngekana vi ‘Tabera’, i vi na gi, suria na gi iana na Araha ki tarê i berarogata.

⁴Igê na râha iata na Isiraelita ka kere rako nikâ na mahuara ga râ henira. Na mahuara ka hutahutaga ngavê, vigê ngêgi na ganiani. Na Isiraelita nogata ka haganega ka hagagege, ka vi: “E, ge vora re, vige nahunigi na ganiani!

⁵I Esipito ki koro ngavê. I ngekana igia ka ngêngê masu tare igê renira na siare, ga vategia purua ma. Takusigi na kiukamba, na meleni, na ruve, na onioni, ma na ruve na galiki.

⁶Ma i ngekê igia ka memega. I marehasigia ngavê na ngauha, nga noga ma na mana i na ara ni tangiani!”

⁷Na mana ki bâ mangagi na maani na guani na apinige ma ki hereherega.

⁸Igê na bungiani na mana ki agorata so igê na tênga henigi na kârupu. Igê na mahogotani na enoni ka huhura ka ruguni, ka menamenarigi se ga taketake, ma hemuri ka hagagobo ma ka hahigi, ki voravora na hêni aberabera. Ngaigi ki ngê mangagi na bereti, ga torarigi henia na oile ni olive.

¹⁰O Moise ki rongora na enoni hato ga hagagege, matena ga heurêrasi i metara na ruma na gahu iata. Ngaia ki era na obana, suria na Araha ki mangariaga tangara.

¹¹Vikê ngaia ki tamasi tanga na Araha, ki vi: “Tanu hega ko katoê bera? I hega, ta na marâ kê pe koro vari igê? Tanu hega, ko nakê kê bâsurira na enoni hato ngegê?

¹²Inê kê pe hagavorara! Inê kê pe aparara! Tanu hega ki tuguhiê, vigê marupera manga na gete i hagasusu kare, ma kê topera rârâ mangara na kere kare, mataro me ka atata igê na agua, go bani surua tangara na êvarita, viga nahunia?

¹³Ngaira ka ama ni hagagege nga, suria i marehasira na ganiani ma ka angisigi. I he kê girara, vigê page tarahugi igê na ganiani, i ararira na enoni hato ngegê?

¹⁴Inê geteê ki bara tangê, vi ve bâsurira na enoni hato ngegê. I bara ngavê tangê!

¹⁵Manga go ama ni katoa nga vikana, hoi, gu takuiê ma ku nahuiê râ nga be me, i era ma ko ama ni hagamamasiagê nga.”

¹⁶Na Araha ki vi tanga o Moise, ki vi: “Gu atera na mane tangahuru gi pi, na ani na enoni ka hagahigasira ma ka girarara vi na enoni raha iata. Go merarâ me ikê i metara na ruma na gahu iaku. Go vi tangara ka rêra i ngekana henigo.

¹⁷Inê be so ma be megotamasi i ngekana ma be hagatarêngenigi tangara tani na ramoha, gê bani vatego renigi. Vikana ngaira ka girara ga tamanigo, kamu tage bâbâsurira na enoni ngegana, i era ma ko bâsurira igo getego.

¹⁸Hoita, go bonasira na enoni, ko vivi: ‘Mu hagamatarotarogamu maremi tanga i gomaha. Igamu kamu page ngêngê na ganiani. Na Araha ki bani rongogi na hagagegeha iami, mu vivi, igami kamu obanigi na ganiani manga i Esipito, i koro era. Hoi, na Araha ki page vategamu nga na ganiani, mu ramo kamu ngêngê na ganiani.

¹⁹Igamu kamu page ngaugi na ganiani, mareha vi suria na tangiana gi tage, se vi gi rua, se vi gi rima, se vi tangahuru, se vi na tangahuru na tangiani gi rua,

²⁰ma suria hete na hageha gi tage hagenani, mataro me ki huhuragani i karingami ma ki roboa na obami. Na tarana ngekana ki page tarahugamu, suria igamu kamu guguruga tanga na Araha, i gâga henigamu ikê, ma kamu hagagege tanga, kamu okevaroga renia i Esipito.”

²¹O Moise ki vi tangara na Araha, ki vi: “Bâ, inê kê bêngenira na 600, 000 na enoni. I hega igo ko girara go vatera na enoni hato negana na ganiani i ararira suria na hageha hagenani?

²²Na enoni ngegana ki asa vige tungira na ganiani naka ma ga nanahuira na togoha hato ni puruka, ni sipi ma ni goti. I asa vige tungira, naka ma nikâ na siare hato i asi!”

²³Na Araha ki hagate, ki vi: “I hega, ta na marâ vari ki bara tangê? I sugia ma, gu bâsia na tarana gê visia, i voravora me vari se i mareha!”

²⁴O Moise ki hura ma ki hagarongora na enoni renigi na tamasinga iana na Araha. Ngaia ki atera na tangahuru gi pi na enoni raha iata na Isiraelita ma ki kasira rihia na ruma na gahu iana na Araha.

²⁵Ma hemuri na Araha igê na vaha ki so me ma ki tamasi tanga o Moise. Ngaia ki hagatarêngenigi tangara na enoni raha ngenana tani na ramoha, i bani vatea o Moise renigi. Matena na ramoha ki angarira, ngaira ka haganega ka tamasi raharaha mangara na poropete igê na matena ngekana.

²⁶O Eletata mo Metata na hitangita na enoni raha tangahuru gi pi, ngairerua karu oga mavê igê na tênga. Ngairerua karu pe râ me tanga na ruma na gahu iana na Araha. Ma i ngekana igê na tênga na ramoha ki angarirerua ma ngairerua nogaterua karu haganega karu tamasi raharaha manga na poropete.

²⁷Ta na mane na gapu haoru ki tango hura ki hagarongoa o Moise renirerua o Elitata mo Metata.

²⁸Ma o Josua o karena o Nune, i bani tamania me o Moise, matena i na mane na gapu haoru mênga ngaia ki tamasi tanga o Moise, ki vi: “Gu manimani tenirerua, siana karu poropete.”

²⁹O Moise ki arami, ki vi: “I hega, go hengari reniê vari? Inê kê obania, vi na Araha ke angarira na kariana hato, hanana ngaira hato ke tamasi poropete!”

³⁰Hemuri o Moise ma na tangahuru gi pi na enoni raha iata na Isiraelita ka aporo tanga na tênga.

³¹Na Araha ki parama ma ki kasia me na roga tenia i asi ki torera me na manu. Ngaira ka gaha me ka oga igê na tênga, ma ka manasia ki râ ki têa na 20 kilomita rihuia. Ngaira ka angapopo na agua ga unumia tenia i ano.

³²Vikê igê na tangiana hagenani ma igê na tangiana hagenani i muri na enoni ka tagara ga têra na manu. Na ara ni hitangita ki hagavunusigi na paike raha tangahuru gi tage renira. Ngaira ka nakara na manu tanga na arito i metara na tênga, hanana ga garaki.

³³Matena i upuga rakorako mênga na ganiani tangara, hanana viga ngaugi, na Araha ki mangariaga tangara ma ki naka na ringa ki tarahura.

³⁴Tahema na agua ngekana ka hêtana vi Kiborote Hatava, i vi Anoano ni Hutaganiha, suria i ngekana ka bagira igê na enoni ga hutahutaga.

³⁵Na enoni ka aharaga tenia i ngekana tanga i Gaserote ma ka tênga igê.