Read Kahua TOMAHA NINUNI 12 Bible Online

TOMAHA NINUNI 12 - Kahua bible

TOMAHA NINUNI 12

¹O Moise ki bani êragia na gete na Kusita. Ka Miriama ma Aroni karu oga apena renia.

²Ngairerua karu vi: “I hega, na Araha ki tamasi tangago ma igo? I hega, ngaia ki pe tamasi tangagamirua nogamirua?” Na Araha ki rongoa na marâ garu visia.

³O Moise ki muni ma, suria i mareha rârâ ta na enoni i maveta, vige haritagi manga ngaia.

⁴Ki parama na Araha ma ki bonasira o Moise, o Aroni ma ka Miriama, ki vi: “Inê kê obanigamu, igamu na vera oru vigamu huhura me tanga na ruma na gahu iaku.” Ngaira ka râ.

⁵Na Araha igê na vaha ki so me, ki ura i maana na maani ruma na gahu, ma ki uni ki vi: “Aroni! Miriama!” Ngairerua karu ura râ tanga.

⁶Na Araha ki vi tangarerua, ki vi: “Igamurua muru karinga na tamasinga iaku. Manga vi inê ma kê atea ta na enoni ki poropete, inê kê hagagirara reniê mareku ma kê tamasi tanga igê na maruteha.

⁷Ma ki tora getea, matena gê tamasi tanga o Moise na kariaku koro. Inê kê kasia ki bâsurira na ara ni kariaku hato na Isiraelita.

⁸Tahema inê kê memato hetanga ma kê metamasi, mataha, mareha ve hagahi. Ngaia ki bâ nunuku. Tanu hega igamurua kamu oga apena o Moise na kariaku?”

⁹Na Araha ki mangariaga tangarerua, matena i râ.

¹⁰Matena na vaha ki akê tenia na ruma na gahu iana na Araha, ki parama na mera era ngavê ma ki tarahua na gavona apena ka Miriama, ma ki siki ahuru ngavê. Matena o Aroni ki sira râ ki bâsia ka Miriama, ma ki bâsia vi na mera ki gahuia na apena hagenani,

¹¹ngaia ki vi tanga o Moise, ki vi: “Siana ko hagaitangigamirua vikana renia na tasi iamamirua, matena muru tamasi bekabeka vikana.

¹²Siana ko katoa ka Miriama ki manga na marâ i me i obana kenana i vora me, i bani kakaga tangua na apena.”

¹³Vikê o Moise ki avarasia na Araha, ki vi: “God, gu hagakomaga aporo ka Miriama!”

¹⁴Na Araha ki arami, ki vi: “Manga vi o vaemana kani pusurigi na maana, ka Miriama ki maki surigi na tangiani gi pi. Hoi, gu paia hura tenia na tênga, ke oga hura surigi na tangiani gi pi, ma hemuri ki girara i kahu aporo me.”

¹⁵O Moise ki paia ka Miriama ki oga hura surigi na tangiani gi pi. Na enoni ka pe aharaga rârâ, mataro me ka Miriama ki aporo me.

¹⁶Hemuri ngaira ka pania i Gaserote ma ka tênga igê na bagamasusu raha i Parane.