Read Kahua TOMAHA NINUNI 13 Bible Online

TOMAHA NINUNI 13 - Kahua bible

TOMAHA NINUNI 13

¹Na Araha ki vi tanga o Moise, ki vi:

²“Gu atera na enoni raha tangahuru matarerua, na ani gi tage tenia na ara ni varo ninuni iana o Jakobo. Gu kasira ka arâ bâbâ igê i Kanani, na agua gê page haganahunira na Isiraelita renia.”

³O Moise ki kato vikana. Tenia na bagamasusu raha i Parane ngaia ki hagatorangenira na enoni raha igê: [O Samua o karena o Sakuru tenia na varo ninuni iana] — o Rubeni. [O Sapata o karena o Gori tenia na varo ninuni iana] — o Simeone. [O Kalebe o karena o Jepune tenia na varo ninuni iana] — o Juta. [O Igale o karena o Josepo tenia na varo ninuni iana] — o Isakare. [O Hosea o karena o Nune tenia na varo ninuni iana] — o Eparaimi. [O Palati o karena o Rapu tenia na varo ninuni iana] — o Benamino. [O Gatiele o karena o Soti tenia na varo ninuni iana] — o Sebuluni. [O Gati o karena o Susi tenia na varo ninuni iana] — o Manase. [O Amiele o karena o Gemali tenia na varo ninuni iana] — o Tane. [O Seture o karena o Mikaele tenia na varo ninuni iana] — o Asere. [O Nagabi o karena o Vopisi tenia na varo ninuni iana] — o Napatali. [O Gehuele o karena o Maki tenia na varo ninuni ia(...)

¹⁶Ngaira ngegana ka na mane o Moise ki kasira ka râ bâbâ igê i Kanani. Ngaia ki urusia na atana o Hosea o karena o Nune, vi o Josua.

¹⁷Matena o Moise ki hagatorangenira, ngaia ki vi tangara, ki vi: “Mu haganega tenia ikê, ma kamu bêbanu i Negeve, na apanena i Kanani bême tangagia. Mu arâhigi na hungani i Negeve.

¹⁸Mu tarahua nga, vi na agua ki manga i he, vi gi hita na enoni ka oga igê, vi ngaira ka nahunira rako na mane ni me se i mareha.

¹⁹Mu tarahua nga, vi na agua ki hagagara koro se i mareha, ma vi na enoni ka oga tatara so ma, se ga pararihuigi na hinua.

²⁰Mu tarahua nga, vi na mako ki koro tangagi na ngauha se i mareha, vi na apinige ka oga igê se i mareha. Mu migiaporo me na guani tani na marâ i ngekana.” Ngaia ki na matena ga sugi mata igê na guani na vaini.

²¹Hoi, na mane ka râ ka banu i Negeve ma ka râhia na agua haganega igê na bagamasusu raha i Sini i Negeve mataro me i Regobo, na agua i bêrere tanga i Hamata.

²²Ngaira ka râhia hagenago na apanena i Negeve mataro me i Heberoni. I ngekana ka oga igê na raraha iata o Agimane, o Sesai ma o Talamai. Ngaira ka na raraha iana o Enaka, na enoni ga bagararaha ma ka ramo ngavê. Na hinua i Heberoni ki bani oga me i ngekana surigi na harisi gi pi ma hemuri ka kahu tagarahia na hinua i Soane i Esipito.

²³Ngaira ka ata i Esekole na maruguna hagarangia i Heberoni. I ngekana ngaira ka retea igê na hunguna na vaini i higa ngavê. Na vererua na mane karu tugia igê na totora. Ngaira ka migiaporo nikâ tani na guani, ga bâ mangagi na memeapu, ma tani na guani na apinige na fiki.

²⁴Na maruguna ngekana ka hêtana vi Esikole, vi hunguna na vaini, na Isiraelita ka retea igê.

²⁵Matena ga râ bâbâ hato igê na agua surigi na tangiani tangahuru ge he, ngaira ka aporo

²⁶tangara o Moise, o Aroni ma na Isiraelita hato, ga oga i Katesi igê na bagamasusu raha i Parane. Ngaira ka hagarongora renigi na marâ ga bâsigi, ma ka hagabâsira renigi na guani, ga migiaporo me.

²⁷Ngaira ka hagarongoa o Moise, ka vi: “Igami kami râhia na agua ma kami tarahua, vi na mako ki koro tangagi na ngauha ma na togoha. Bâ, tani na guani na marâ i ngekana kani igê.

²⁸Ma na enoni ga oga i ngekana ngaira ka ramo ngavê. Na hinua iata ka raha ngavê ma ka pararihigi. Ua, ma ta na marâ nikâ. Igami kami bâsira na raraha iana o Enaka, na enoni ga bagararaha ma ka ramo ngavê.

²⁹Na Amalekita ka oga i Negeve. Na Hitita, na Jebusita ma na Amorita ka ogasigi na hungani. Na Kananita ka ogasigi na tarasini i bêso ma igê na apanena na ve i Jotano ki bêkê.”

³⁰Na enoni ka hagagege tanga o Moise. Ma o Kalebe ki hagamunira, ki vi: “Nika, ge sugarira nga ma ke henahuraua na agua. Mu girara hanana ga ramoramo ka teharira.”

³¹Ma na mane ga râ bâbâ henia o Kalebe ka vi: “E, i bara! Igia ka pe ararira. Na enoni i ngekana ka ramo teharigia.”

³²Vikê ngaira ka tokorenia na hagaparunga i berarogata na Isiraelita renia na agua, ga râ bâbâ igê. Ngaira ka vi: “Na mako i ngekana ki pe koro. Na enoni i ngekana ka mesi magêha. Na enoni hato mi bâsira i ngekana ka borahu ngavê.

³³Ma igami kami bâsira nikâ igê na raraha iana o Enaka, na enoni ga bagararaha ma ka ramo ngavê. Igami kami vora re ma vi na pê. Vari ngaira ka bâsigami so manga vi na pê kanigami.”