Read Kahua TOMAHA NINUNI 15 Bible Online

TOMAHA NINUNI 15 - Kahua bible

TOMAHA NINUNI 15

¹Na Araha ki vatea o Moise

²renigi na ramata igê tangara na Isiraelita, hanana ga arâ surigi, matena ga gâga igê na agua, na Araha i page haganahunira renia.

³“I ngekana kamu tagarenira tangê inê na Araha na puruka mane, na sipi mane, na sipi se na goti tanga na vogasiha ni sungiha, se tanga na na vogasiha ni hagamonariani na suruha, se tanga na vogasiha mu takusia maremi, se tangagi na vogasiha igê na tangiani raha ni rotu. Na vanuhani na ganiani ngegana ka hagakoro obaku.

⁴Na ara ni mateni mu tagarenia na sipi se na goti tanga na vogasiha ni sungiha tangê inê na Araha, mu tagarenigi henia nga na ara ni ganiani na 3 kilo na palaua taranina hetorariga henigi na 2 lita na oile ni olive tanga na vogasiha ni palaua henigi na 2 lita na vaini.

⁶Matena mu vogasiê renia na sipi mane, mu tagarenigi henia nga na 6 kilo na palau taranina i hetorariga henigi na 2 lita ma ki kâgupu na oile ni olive tanga na vogasiha ni palaua

⁷henigi na 2 lita ma ki kâgupu na vaini. Na vanuhani na vogasiha ngegana ka hagakoro obaku.

⁸Matena mu tagarenia na puruka mane tangê tanga na vogasiha ni sungiha se tanga na vogasiha ni hagamonariani na suruha, se tanga na vogasiha ni ngêhaku,

⁹mu tagarenigi henia nga na 3 kilo na palaua hetorariga henigi na 2 lita na oile ni olive,

¹⁰ma henigi na 4 lita na vaini. Na vanuhana na vogasiha ngekana ki hagakoro obaku.

¹¹Mu tagarenigi ngaigi nga henia nga na ara ni puruka mane, na sipi mane, na sipi se na goti.

¹²Matena mu vogasiê renira na ganiani haritamani igê na matena gi tage, mu tagarenigi nga na palaua ma na vaini henia na ara ni hitangita surigi na ramata.

¹³Na ara ni Isiraelita ki susu nga vikana ma na vanuhani na ngêra ka hagakoro obaku.

¹⁴Manga vi na mahuara i berarogami, henaka i gâga tare i berarogami se i mareha, ma ki tagarenia na vogasiha ni ngêra, na vanuhana ki hagakoro obaku, hoi, ngaia ki arâ surigi nga nogana na ramata ngegana.

¹⁵Na ramata ngegana ka tâ tangagamu, igamu ma na mahuara i berarogami tare ki bê ki arâ.

¹⁶Suria igamu ma ngaira, kamu hetagenami ma tangê inê, tahema na ramata ngegana ka tâ tangagamu hato, igamu ma ngaira.”

¹⁷Na Araha ki vatea o Moise

¹⁸na ramata igê tangara na Isiraelita, hanana ga marupegi igê na agua, na Araha i page haganahunira renia.

¹⁹“Tagua na ngêra mu ngaua i ngekana, mu tagarenia nga tangê.

²⁰Matena mu hahihi na guani hagenago na bereti renia na palaua na koni na nagona na mu, mu tagarenigi nga tangê. Mu tagarenigi nga tagenana manga na nagona na mu ni koni.

²¹Mu katokato vikana nga tare ki bâ ki arê.

²²“Manga vi na enoni hato i hemuri me ma ka pe marupegi na ramata, gê vatea o Moise renigi tangagamu,

²⁴suria viga ga pe hagare, hoi, ngaira ka tagarenia nga na puruka mane tanga na vogasiha ni sungiha, i hagakoro obaku, henigi na vogasiha ni palaua ma na vogasiha ni vaini. Ngaira ka tagarenia kê nikâ na sipi mane tanga na vogasiha ni bonoteniha ni tasi.

²⁵Na mane ni vogasiha ki hagamatarotarora nga ma na tasi ki kahu hatohato tenira, suria ngaira ka bagararâ me ka tasi, ma ka tagarenia tangê na vogasiha ni bonoteniha ni tasi manga na vogasiha ni ngêra.

²⁶Inê be bonotenigi na tasi iami, igamu na Isiraelita ma na mahuara i berarogami, suria igamu tagenami kanimu bagararâ me kamu tasi.”

²⁷“Manga vi ta na enoni ma ki bagararâ me ki tasi, ngaia ki tagarenia nga na goti mane, i tongatonga na harisi gi tage iana tanga na vogasiha ni bonoteniha ni tasi.

²⁸Hagarangia na bea ni vogasiha na mane ni vogasiha ki hagamatarotaroa nga na enoni ngekana, hanana na tasi iana ki hatohato tenia ma kê bonotenia.

²⁹Na ramata ngekana ki tâ tanga na ara ni hitangimi, i bagararâ me ki tasitasi, henaka vi ngaia ka na Isiraelita se na mahuara i berarogami.”

³⁰“Manga vi ta na enoni ma ki kato vi tasitasi, henaka vi ngaia ka na Isiraelita se na mahuara, ngaia ki pe hagahigasiê. Ka nahuia nga ki meme,

³¹suria ngaia ki haritoheê ma ki kato nga vi aharêngigi na ramata iaku. Ngaia ki hagaratena marena.”

³²I ta na matena, matena na Isiraelita ka gâga mêngara igê na bagamasusu raha, ngaira ka tarahua ta na mane i totora ario igê na tangiana ni mamaroha.

³³Ngaira ka torea ka merâ tangara o Moise, o Aroni ma na hakuta na Isiraelita.

³⁴Ngaira ka maasuria bâkoro, suria ga pe girara mênga, vi na ta kanige katoa renia na tarana vikana.

³⁵Hoi, na Araha ki vi tanga o Moise, ki vi: “Mu nahuia nga na mane ngekana ki meme. Na hakuta hagenani iami ka arihahunia nga tarege râ tenia na tênga.”

³⁶Vikana ngaira ka huhura tarege râ tenia na tênga ma ka arihahunia, suria na bonasiha iana na Araha.

³⁷Na Araha ki bonasia o Moise,

³⁸ki vi vikê tangara na Isiraelita. “Mu tagarahigi na boroni ma kamu surugi henigi na varo maravarava igê na agua ge he i taretareni vato na tuguni iami. Mu katokato nga vikana tare ki bê ki arâ.

³⁹I na ara ni mateni mu bâsigi, ngaigi ka hagatakusigamu renigi na ramata hato iaku, hanana vigamu marupegi. Ngekana igamu ki asa vigamu murisigeê ma kamu arâ surigi na obaniha ma na teniha iami maremi.

⁴⁰Ngaigi ki hagatakusigamu, kamu marupegi na ramata iaku ma vigamu ka na aniku inê geteê ma.

⁴¹Inê nga ka na Araha God iami. Inê kê bêngenigamu hura tenia i Esipito, hanana gê God iami. Na Araha nga kani inê.”