Read Kahua TOMAHA NINUNI 16 Bible Online

TOMAHA NINUNI 16 - Kahua bible

TOMAHA NINUNI 16

¹O Koraga o karena o Isare tenia na raraha iana o Kehata na mane ni hagarahenga, ngaia ki hengaria na arahanga iana o Moise. Na vera oru na mane tenia na raraha iana o Rubeni ngaira ka hakunia. Ngaira ka no heogata o Tatane ma o Abirama, o karena o Eliaba, ma o Ono o karena o Peleti, henira na 250 na Isiraelita getera. Ngaira ngegana ka na enoni raha, na Isiraelita ka hagahigasira.

³Ngaira hato ka râ haku i pasiterua o Moise mo Aroni, ma ka vi tangarerua, ka vi: “Igamurua kamuru râ bâraha. Na ara ni enoni hato ka na kariana na Araha. Na Araha ki ngahisigia hato. Tanu hega igo o Moise kanigo kasigo akê maremu teharigami igami na kariana na Araha?”

⁴Matena o Moise ki rongo vikana, ngaia ki susure ma ki tubê so i ano ma ki nunginungi.

⁵Ma hemuri ngaia ki vi tangara o Koraga ma na kariana, ki vi: “I gomaha mavoraro na Araha ki page hagagiraragia, renia vi o ti ka na kariana. Na ani God ki atea, ngaia kani rêra râ hagarangia na bea ni vogasiha.

⁶I gomaha mavoraro igo ma na kariamu kamu migirâ me na peleti tangagi na gi, kamu bêbagi na garaputa na gi ma na marâ ga sigini koro igê, ma kamu migirâ tanga na bea ni vogasiha. Ngekana igia ka kahu bâsia, vi o ti na hitangika na Araha ki bani atea. Igamu na mane ni hagarahenga ka na ani mu râ bâraha!”

⁷

⁸O Moise ki vi tanga nikâ o Koraga, ki vi: “Mu rongo igamu na mane ni hagarahenga!

⁹I hega, igamu kamu takusia vari, vi na marâ purua ma kani vi God iata na Isiraelita ki hagapunarigamu i berarogata na Isiraelita, hanana vi igamu kamu girara mu rêra râ hagarangia, kamu katogi na tagaraha iami igê na ruma na gahu iana na Araha, ma kamu bâsurira ma kamu tamanira na Isiraelita?

¹⁰Ngaia ki kasigamu ma na raraha hato iana o Levi tanga na tagaraha raha ngekê. Tanu hega mu obania, vigamu voravora re na mane ni vogasiha?

¹¹Matena mu hagagege tanga o Aroni, igamu igo ma na kariamu, kamu haritohea hete na Araha.”

¹²Ma hemuri o Moise ki kasi tamasinga tangarerua o Tatane mo Abirama, ma ngairerua karu vi: “Igamirua kamuru usi vigamuru râ vê!

¹³Igo ko bani bêngenigami hura tenia i Esipito, na agua na mako koro ni ngauha ma ni togoha, hanana mi meme igê na bagamasusu raha ikê. I uhu noga! Tanu hega ko obania vigo marungigami nikâ?

¹⁴Igo ki mareha ngavê vigu bêngenigami banu igê na agua na mako koro ni ngauha ma ni togoha, se vigu haganahunigami renigi na mu ma na pariki ni vaini. Ma i ngekê igo ko obania vari vigo hagaparugami? Igamirua ki asa vigamuru râ vê!”

¹⁵O Moise ki mangariaga ma ki vi tanga na Araha, ki vi: “Siana ko aganarigi na ani mavê na votovoto iata na mane ngegana. Inê kê pe katoa rârâ henira ta na tarana i pe oto, naka ma na hitangita na tonki iata.”

¹⁶O Moise ki vi tanga o Koraga, ki vi: “I gomaha igamu, igo ma na 250 na kariamu, ki tuguhigamu, vigamu arâ me nga tanga na ruma na gahu iana na Araha. O Aroni nikâ ki page gâga i ngekana.

¹⁷Na ara ni hitangimi ki merâ me na peleti na gi iana, ki nakanaka na marâ i sigini koro igê na gi i rarona, ma kamu tagarenigi igê na bea ni vogasiha. Igo mo Aroni kamuru katokato nga vikana nikâ.”

¹⁸Vikê na ara ni hitangita ki merâ me na peleti na gi iana, ki nakagi na garaputa na gi igê henigi na marâ i sigini koro, ma ki rêra i maana na ruma na gahu iana na Araha henirerua o Moise mo Aroni.

¹⁹O Koraga ki hagahakura me na Isiraelita hato ma ngaira ka ura i maaterua o Moise mo Aroni i maana na ruma na gahu iana na Araha. Na bâbâhana raha na Araha ki parama ma ki vora me tangara na Isiraelita hato.

²⁰Na Araha ki vi tangarerua o Moise mo Aroni, ki vi:

²¹“Muru sugarâ tenira na enoni ngegê. Inê be mutera ngavê ototo râ nga.”

²²Ma o Moise mo Aroni karu susure karu tubê so i ano, ma karu vi: “God, igo ka na hunani na mêriha hato. Siana ko mangariaga tangara na enoni hato renigi na tasi iana na vere tage togo na enoni.”

²³Na Araha ki vi tanga o Moise, ki vi:

²⁴“Gu vi tangara na enoni, ke guru râ tenigi na ruma na gahu iata o Koraga, o Tatane mo Abirama.”

²⁵Hoi, o Moise henira na enoni raha iata na Isiraelita ka râ i pasiterua o Tatane mo Abirama.

²⁶O Moise ki vi tangara na enoni, ki vi: “Mu suga râ tenigi na ruma na gahu iata na eragani nuni ngegana. Siana kamu hatarigi na ani mavê na nahuninga iata, i era ma kamu me henira renigi na tasi hato iata.”

²⁷Vikê ngaira ka sugarâ tenigi na ruma na gahu iata o Koraga, o Tatane mo Abirama. O Tatane mo Abirama karu hura me ma karu ura i maani na ruma na gahu iatereua henira na gete iaterua ma na kareterua.

²⁸O Moise ki vi tangara na enoni, ki vi: “Hoita, i ngekê igamu kamu kahu tahetara maninga, vi na Araha nga ki kasiê, kê katogi na tarani hato ngegê, mareha vi inê mareku.

²⁹Manga na mane ngegê ma ka meme suri parongata ma God ki pe hagaitangira, hoi, i vi, vi God ki pe hagatorê.

³⁰Ma ki manga na Araha, ma ki katoa na tarana, mu pe rongo kuruhana rârâ i nago, ma na ano ki avaga ma ki unumira henigi na nahuniga hato iata, ma ngaira ka soso mamêrigata igê na agua iata na enoni ga bani me, hoi, igamu kamu page tahetara renia, vi na mane ngegana ka bani kitenia na Araha.”

³¹Matena i tamasi hato, na ano ki parama ma ki avaga i ruguhaterua o Tatane mo Abirama,

³²ma ki unumira na ahemata iaterua henira na kariana hato o Koraga ma henigi na nahuninga iata.

³³Vikê ngaira ka so mamêrigata henigi na nahuninga iata igê na agua iata na enoni ga bani me. Na ano ki purutaku hurira ma ka magahuru.

³⁴Na Isiraelita hato ga oga i ngekana, ngaira ka gava, matena ga rongora ga angiangi. Ngaira ka ngerengere, ka vivi: “Gava! Na ano ki page unumigia nogaka vari!”

³⁵Ma hemuri na Araha ki kasia na gi ma ka noro igê na 250 na mane ga tagarenigi na marâ i sigini koro.

³⁶Ma hemuri na Araha ki vi tanga o Moise, ki vi:

³⁷“Go vi tanga o Eleasare o karena o Aroni na mane ni vogasiha, ki tavogi râ na peleti na gi tenigi na rahugata na mane, ga bani noro, ma ki kasikasi hagatê na garaputa na gi i raroni, suria na peleti na gi ngegana ka apuna.

³⁸Ngaigi ki apuna, suria ga tagarenigi igê na bea ni vogasiha iaku inê na Araha. Tavogi râ na peleti na gi iata na mane, ga noro meni na tasi iata. Putagigi ke manihi aberabera. Aba na bea ni vogasiha renigi. Ngaia ki na haganunuha tangara na Isiraelita.”

³⁹Vikê o Eleasare na mane ni vogasiha ki tavogi na peleti na gi i putagigi ki manihi aberabera ma ki aba na bea ni vogasiha renigi.

⁴⁰Ngaia ki na haganunuha tangara na Isiraelita, vi nga noga ma na raraha iana o Aroni ki ararira, viga arâ tanga na bea ni vogasiha, hanana ga sungigi igê na marâ i sigini koro tanga na Araha. I era ma na Araha ki mutera mangara o Koraga ma na kariana. O Eleasare ki kato vikana surigi na tamasinga iana na Araha tanga o Moise.

⁴¹Ki tangi me, ma na Isiraelita hato ka hagagege tangarerua o Moise mo Aroni, ka vi: “Igamurua kanimuru hagamesira tani na kariana na Araha.”

⁴²Matena ga haku hato me hanana viga hagagege tangarerua o Moise mo Aroni, ngaira ka aharia na ruma na gahu iana na Araha, ma ka bâsia na vaha i buhia, ma na bâbâhana raha na Araha ki oga i ngekana.

⁴³O Moise mo Aroni karu ura râ karu ura i maana na ruma na gahu iana na Araha.

⁴⁴Na Araha ki vi tanga o Moise, ki vi:

⁴⁵“Ura râ tenira na enoni ngegana. Inê be mutera ngavê ototo râ nga!” O Moise mo Aroni karu susure karu tubê so i ano.

⁴⁶O Moise ki vi tanga o Aroni, ki vi: “Gu tavoa râ na peleti na gi iamu. Gu raguigi râ na garaputa na gi igê na bea ni vogasiha ma ku nakagi i rarona. Gu nakagi na marâ i sigini koro igê na garaputa na gi. Hemuri ko megaha râ tangara na enoni ma ku hagamatarotarora. Garigari! Na mangariaganiha iana na Araha ki bani akê me noga. Na ringa ki bani ramo noga!”

⁴⁷O Aroni ki tê vita, ki têa na peleti na gi iana, ma ki megaha râ i berarogata na enoni, ga haku i ngekana. Matena i bâsia na ringa i bani heganega noga, ngaia ki nakagi na marâ i sigini koro igê na garaputa na gi ma ki hagamatarotarora na enoni.

⁴⁸I ngekana na ringa ki hato. Ma ngaia ki ura i berarogata na enoni ga tahitahi mêngara ma na ani ga bani me.

⁴⁹Ngaira hato na enoni ga bani me ka vora na 14.700, ma ka pe tomanira banu me na ani ga me, matena o Koraga ki haritohea God.

⁵⁰Matena na ringa ki hato, o Aroni ki aporo tanga o Moise igê na maana na ruma na gahu iana na Araha.