Read Kahua TOMAHA NINUNI 17 Bible Online

TOMAHA NINUNI 17 - Kahua bible

TOMAHA NINUNI 17

¹Na Araha ki vi tanga o Moise, ki vi:

²“Gu vi tangara na Isiraelita ke vatego na vato tangahuru matarerua, na ani gi tage tenia na ara ni enoni raha surigi na varo ninuni iana o Isiraele. Go segea na atana na ara ni hitangita igê na vato iana,

³ma ko segea na atana o Aroni igê na vato tenia na varo ninuni iana o Levi. Na vato gi tage tanga na ara ni enoni hato surigi na varo ninuni.

⁴Gu migirâ tanga na ruma na gahu iaku ma ku nakagi i ano i maana na bokesi na suruheri, na agua gê megotamasi igê.

⁵Na vato iana na mane gê atea kani page hisihisi. Igê na tarana ngekana inê kê page hatungia igê na hagagegeha iata na Isiraelita tangago.”

⁶Vikê o Moise ki tamasi tangara na Isiraelita ma na ara ni hitangita na enoni raha iata ki vatea na vato iana tanga, na ani gi tage surigi na varo ninuni. Ngaigi hato ka vora na vato tangahuru matarerua henia na anina o Aroni.

⁷O Moise ki nakagi so na ara ni vato hato i ano i maana na bokesi na suruheri i rarona na ruma na gahu iana na Araha.

⁸Ki tangi me ma o Moise ki banu i rarona na ruma na gahu iana na Araha ma ki bâsia, vi na vato iana o Aroni ki hisi. Ngaia ki na vato tenia na varo ninuni iana o Levi. Ngaia ki baugo, ki taka ma ki hungu.

⁹O Moise ki migihura na ara ni vato hato ma ki hagabâsira na Isiraelita renigi. Ngaira ka bâsia na tarana i vora me, ma na ara ni hitangita na enoni raha ki têa aporo na anina marena na vato.

¹⁰Na Araha ki vi tanga o Moise, ki vi: “Gu naka so aporo na vato iana o Aroni i ano i maana na bokesi na suruheri. Girara ki tâtâ maninga tare. Ngaia ki na haganunuha tangara na Isiraelita, ga guguruga tare, i vi, vi ngaira ka page meme, manga vi ngaira ma ka ama ni hagagege nga.”

¹¹O Moise ki kato vikana manga na Araha i bonasia.

¹²Na Isiraelita ka vi tanga o Moise, ka vi: “Vikana iami kami hato. Mi meme!

¹³Manga na enoni ma ki ata ni rêra ma me hagarangia na ruma na gahu iana na Araha ma ki meme, hoi, igami kami hatohato nga. Igami kami mangara na enoni ga bani me.