Read Kahua TOMAHA NINUNI 18 Bible Online

TOMAHA NINUNI 18 - Kahua bible

TOMAHA NINUNI 18

¹Na Araha ki vi tanga o Aroni, ki vi: “Igo ma o karemu ma na raraha iana o Levi, igamu kamu hagaratemi maremi, matena i arâ tasi na hagarahenga igê na ruma na gahu apuna iaku. Ma ki manga igo ma o karemu ma kamu pe tagara maninga manga i marisimi vigamu ka na mane ni vogasiha, igamu getegamu ma kanimu hagaratemi maremi.

²Gu torera na goamu na raraha iana o Levi, hanana ga tagara henigamu ma ka tamanigamu, matena igamu igo mo karemu kamu tagara i ruma na gahu apuna.

³Ngaira na raraha iana o Levi ka katogi nga na tagaraha iata tangagamu ma tanga na ruma na gahu apuna, ma siana ka hatarigi na marâ apuna i rarona na kiboru apuna se vi na bea ni vogasiha, i era ma igamu, ngaira ma igamu kamu me.

⁴Ngaira ka tagara nga henigamu ma ka tanugi na tagaraha iata tanga na hagarahenga i na ruma na gahu apuna, ma na enoni getera râ siana ka tagara vikana, nga noga ma na raraha iana o Levi.

⁵Igamu, igo ma o karemu kanimu katogi nga na tagaraha igê na kiboru apuna ma na bea ni vogasiha, hanana siana kê mangariaga nikâ tangara na Isiraelita.

⁶Inê kê bani atera na goami na raraha iana o Levi i berarogata na Isiraelita, hanana ga tamanigamu. Ngaira ka na aniku. Vikana ngaira ka katogi na tagaraha iata i na ruma na gahu apuna.

⁷Igamu, igo ma o karemu, kanimu katogi na tagaraha hato ni mane ni vogasiha igê na bea ni vogasiha ma igê na kiboru apuna teha ngavê. Ngaigi nga ka na tagaraha iami, suria inê kê hagapunarigamu, igo mo karemu, kamu mane ni vogasiha ma na ani getera râ na enoni ga katokato vikana, ka nahuira nga ka meme.”

⁸Na Araha ki vi tanga o Aroni, ki vi: “Gu rongo! Inê kê haganahunigamu renigi na votovoto hato na Isiraelita ga tagarenigi tangê, nga noga ma na ani ga susu tangê renigi. Inê kê vategamu renigi, igo ma na raraha iamu. Ngaigi ka na apanemi ga arâ vê tare tangagamu.

⁹Nga noga ma na vogasiha ni sungiha, na animi kani igê: na vogasiha ni palaua, na vogasiha ni bonoteniha ni tasi, na vogasiha ni kasi meni. Na ara ni marâ na Isiraelita ga tagarenigi tangê manga na vogasiha apuna, ka na animi, igo mo karemu.

¹⁰Mu ngaugi nga igê na agua apuna. Ngaira ma na mane ga mane ni vogasiha kaniga ngaugi, mareha vi na gete, suria ngaigi ka na aniku.

¹¹“Nikâ, na ani getigi na votovoto, na Isiraelita ga tagarenigi tangê, ka na animi. Inê kê vategamu renigi, igo ma o karemu ma ka karemu. Ngaigi ka na apanemi ga arâ vê tare tangagamu. Ngaira hato igê na ahemata iami ka girara ga ngaugi, manga vi ngaira ma ka matarotaro.

¹²“Na nagoni na mu, na Isiraelita ga tagarenigi tangê i na ara ni harisi, ka na animi: na oile ni olive, na vaini ma na koni.

¹³Ngaigi ka na animi. Ngaira hato igê na ahemata iami ka girara ga ngaugi, manga vi ngaira ma ka matarotaro.

¹⁴“Na ara ni marâ na Isiraelita ga hagapunarigi râ tangê, ka na animi.

¹⁵“Na ara ni bêbê ni kare ma na kareta hagâkani na togoha, na Isiraelita ga tagarenira tangê, ka na animi. Mu aganarigi nga na meta ga vurira aporo re na bêbê ni kare ma na kareta hagâkani na togoha ga pe matarotaro.

¹⁶Ka vurira aporo nga na kare, ga tongatonga na hageha gi tage iata renigi na maani gi rima na siliva suria na ramata. Ngaia nga ka na meta i tâtâ tare vikana.

¹⁷Ma ki asa vige vurira aporo na kareta hagâkani na puruka, na sipi se na goti, suria ngaira ka na aniku ma inê tanga mu vogasiê renira. Mu kamusia na bea ni vogasiha renigi na gaputa ma kamu sungigi na êbeta manga na vogasiha ni ngêra, i hagakoro obaku na vanuhani.

¹⁸Na hasigota ka na animi igamu henigi na matota ma na êgata i otota, henaka vi ngaira ka tagarenigi tangê inê.

¹⁹“Inê kê vategamu vê tare ki bê ki arâ, igo o karemu ma ka karemu na votovoto hato na Isiraelita ga tagarenigi tangê inê. Ngaia nga ka na suruheri iaku henigamu, igo ma na raraha iamu, ma ki tâtâ tare nga ki bê ki arâ.”

²⁰Na Araha ki vi tanga o Aroni, ki vi: “I asa vigamu page nahunigi na nahuninga ma na mako i Isiraele, vigamu hagatarêngenigi tangara na raraha iami. Inê nga ka na Araha gê ararigamu.”

²¹Na Araha ki vi: “Inê kê bani haganahunira na mane ni hagarahenga renigi na ara ni tangahuruta na marâ na Isiraelita ga tagarenigi nga tangê i na ara ni harisi. Ngaigi nga ka na vurita na mane ni hagarahenga, suria ga bâbâsuria na ruma na gahu apuna iaku.

²²Na ani getera râ na Isiraelita ki apu tangara vige karikari me hagarangia na ruma na gahu apuna, i era ma ka meme.

²³Haganega tenia i ngekê na mane ni hagarahenga ma kaniga bâbâsuria na ruma na gahu apuna. Ngaia nga ka na tagaraha iata. Ngaia nga ka na ramata i tâ tangagamu, igamu ma na raraha iami tare ki bê ki arâ. Na mane ni hagarahenga ki asa vige nahunigi hagahu na nahuninga i Isiraele,

²⁴suria inê kê bani haganahunira renigi na tangahuruta na marâ na Isiraelita ga tagarenigi nga tangê i na ara ni harisi. Tahema inê kê bani vi tangara, vi ngaira ki asa vige nahunigi hagahu na nahuninga i Isiraele.”

²⁵Na Araha ki bonasia o Moise,

²⁶ki vi tangara na mane ni hagarahenga ki vi: “Matena mu tavogi na tangahuruta na marâ na Isiraelita ga tagarenigi tanga na Araha i na ara ni harisi ma na Araha ki haganahunigamu renigi,

²⁷mu tagarenigi nogami na tangahuruta tenigi na tangahuruta na marâ ngegana tanga na Araha. I tagenana ma manga na mane i tagarenigi na tangahuruta na koni se na vaini.

²⁸Vikana igamu kamu tagarenigi tanga na Araha na tangahuruta tenigi na tangahuruta na marâ na Isiraelita ga tagarenigi tanga, suria ngaigi ka na anina. Mu tagarenigi nga tanga o Aroni na mane ni vogasiha na tangahuruta na marâ iami ngegana tanga na Araha.

²⁹Mu tagarenigi nga tanga na Araha na apaneni koro ngavê tenigi na tangahuruta na marâ na Isiraelita ga tagarenigi.

³⁰Matena mu tagarenigi hato vigana, mu nahunigi maremi na ani ga hitahita râ, manga na mane i nahunigi na ani ga hitahita râ, matena i bani tagarenigi na tangahuruta iana.

³¹Igamu ma na ahemata iami kamu girara mu ngaugi na ani ga hitahita râ igê na agua mavê, suria ngaigi ka na vurimi mu bâbâsuria na ruma na gahu apuna.

³²Igamu kamu pe tasitasi, matena mu ngaugi, manga vi igamu ma kamu bani tagarenigi na apaneni koro teha tanga na Araha. Mu katokato nga vikana, i era ma kamu hagaerasigi na votovoto iata na Isiraelita ma ka nahuigamu kamu me.”