Read Kahua TOMAHA NINUNI 20 Bible Online

TOMAHA NINUNI 20 - Kahua bible

TOMAHA NINUNI 20

¹Igê na hageha hagenago na Isiraelita hato ka ata igê na bagamasusu raha i Sini ma ka tênga i Katesi. Ka Miriama ki me i ngekana ma ka bagia.

²Igê na tênga ngekana ki mareha rârâ igê na ve. Tahema na enoni hato ka râ i pasiterua o Moise mo Aroni.

³Ngaira ka hagagege, ka vi: “I ararigami, vigami bani me kê hete henira na goamami na Isiraelita i metara i ruma na gahu iana na Araha.

⁴Tanu hega muru bêngenigami banu igê na bagamasusu raha ikê? Muru obanigami vari, vigami ma na togoha iamami vigami meme ikê?

⁵Tanu hega muru bêngenigami hura tenia i Esipito tanga na agua i hagagara era ikê? I asa ta na marâ vige akê igê! Ikê ki mareha rârâ igê na ngauha, na guani na fiki, na guani na vaini, se vi na marâ manga na memeapu. Na ve nikâ ki mareha ngavê ikê!

⁶O Moise mo Aroni karu ura râ panira na enoni ma karu ura igê na maana na ruma na gahu iana na Araha. Ngairerua karu susure ma karu tubê so i ano. Na bâbâhana raha na Araha ki vora me tangarerua.

⁷Na Araha ki vi tanga o Moise, ki vi:

⁸“Gu tavoa na vato i maana na bokesi na suruheri. Igo ma o Aroni kamuru hagahakura na enoni hato. I maata ngaira hato igo o Moise ko tamasi tanga na hê i riki kê ikana ma na ve ki page gogo me igê. Vikana igo ko page katoa na ve, ki gogogo me tenia na hê, hanana na enoni ma na togoha iata ka totono.”

⁹O Moise ki râ, ki tavoa na vato, na Araha ki bonasia renia.

¹⁰Ngaia mo Aroni karu hagahakura na enoni hato hagarangia na hê. O Moise ki vi: “Mu rongo, igamu na enoni mu guguruga tare. Igamu kamu obanigamirua vari, vigamuru katoa na ve ki gogogo me tenia na hê ikê tangagamu?”

¹¹Hoi o Moise ki têa akê na vato ma ki tahurua hagerua na hê renia. Na ve oto ki gogo me igê ma na enoni hato ma na togoha ka tono.

¹²Ma na Araha ki ramonirerua o Moise mo Aroni. Ngaia ki vi: “Suria muru pe tongesuriê maninga ma kamuru pe hagagirarara na enoni, vi inê ka na God raramohaga huniê, tahema igamurua ki asa, vigamuru bêngenira banu na Isiraelita igê na agua, gê bani surua vigê page haganahunira renia.”

¹³Na tarana ngekê ki vora me i Meriba, na agua na Isiraelita ka hagagege igê tanga na Araha, ma na Araha ki hagabângenia igê, vi ngaia ki God raramohaga hunia.

¹⁴O Moise ki hagatorangenira na mane tora tamasinga tenia i Katesi tanga na maneraha i Etome. Ngaira ka vi: “Na rongoha ngekê ki râ me tenira na goamu na Isiraelita. Igo ko bani giraragi na mamasiaganiha iamami.

¹⁵Na êvarimami ka râ i Esipito. Igami kami oga igê surigi na maniharisi. Na ai ni Esipito ka katogami bera, na êvarimami ma igami nogamami.

¹⁶Igami kami avarasia na Araha. Ngaia ki aganarigami ma ki hagatorangenia na angero, ki bêngenigami hura tenia i Esipito. I ngekê igami kami oga i Katesi, na hinua igê na pereperegana na apanena iamu.

¹⁷Hoi, igami kami nungigo, ku nakagami kami ri igê na apanena go marungia. Igami ma na togoha iamami igami ki asa, vigami page arâ ahaharê tenia na tara, se vigami arâ igê na mu se na pariki ni vaini iami, se vigami totono igê na vekaru iami. Igami kami page arâ suri parongamami suria ma na tara raha, mataro me kami huhura tenia na apanena iamu.”

¹⁸Ma na maneraha i Etome ki arami, ki vi: “Igami kami manimania na apanena iamami. Siana kamu riri igê. Manga mu togeaga, na mane ni me iamami ka page taharigamu.”

¹⁹Ma mane tora tamasinga ka vi: “Igami kami page arâ suria ma na tara raha. Ma ki manga vi igami se vi na togoha iamami ma kami totono igê na ve iami, igami kami page vurigamu. Igami kami obania ma, vigami riri igê.”

²⁰Na maneraha i Etome ki ama ni manimani nga. Ngaia ma na mane ni me rako iana ka râ ma ka taharira na Isiraelita.

²¹Suria na ai ni Etome ka pe obanira na Isiraelita, vige riri igê na apanena iata, tahema na Isiraelita ka apariri tenia i Etome ma ka râ suria na tara getea.

²²Na Isiraelita hato ka pania i Katesi ma ka ata igê na hungana i Hore,

²³igê na pereperegana i Etome. I ngekana na Araha ki tamasi igê tangarerua o Moise mo Aroni, ki vi:

²⁴“O Aroni ki asa vige banu igê na agua, gê bani surua, vigê page haganahunira na Isiraelita renia. Ngaia ki page meme, suria igamurua kamuru guguruga tangê i Meriba.

²⁵Igo Moise gu mererâ tagere o Aroni mo Eleasare o karena igê na hungana i Hore.

²⁶Ma i ngekana igo ko tasigi râ tenia o Aroni na gahu iata na mane ni vogasiha, ma ko hagatugunia o Eleasare renigi. O Aroni ki page meme i ngekana.”

²⁷O Moise ki katoa na marâ na Araha ki bonasia renia. Ngaira ka tagere igê na hungana i Hore i maata na enoni hato.

²⁸O Moise ki tasigi râ tenia o Aroni na gahu iata na mane ni vogasiha ma ki hagatugunia o Eleasare renigi. Ma o Aroni ki me i ngekana igê na botona na hungana.

²⁹Na enoni hato ka kahu girara, vi o Aroni ki me, ma ngaira hato ka hetaki surigi na tangiana tangahuru gi oru.