Read Kahua TOMAHA NINUNI 21 Bible Online

TOMAHA NINUNI 21 - Kahua bible

TOMAHA NINUNI 21

¹Matena na maneraha i Arata i Negeve i Kanani ki rongoa, vi na Isiraelita ka râ me tenia i Atarimi, ngaia ki taharira ma ki henahuraura na hitangita.

²Ma hemuri na Isiraelita ka suru tanga na Araha, ka vi: “Manga go nakagami, kami teharira na enoni ngegana, igami kami page nakagi na ara ni marâ hato tangago igo ma, ma kami page mutera ngavê na enoni, ma kami page ruhuruhugi na hinua iata.”

³Na Araha ki aganarira ma ki tamanira, ka teharira na Kananita. Vikana na Isiraelita ka mutera ngavê ma ka ruhuruhugi na hinua iata ma ka hêtana na agua ngekana vi Horema, i vi Aruhuruhunga.

⁴Na Isiraelita ka pania na hungana i Hore igê na tara tanga na Asi Memera, hanana viga susu pane ka arigu tenia i Etome. Matena ga râ, na enoni ki usisiga na apeta ma ka bagamangamangariaga.

⁵Ngaira ka hagagege tangarerua God mo Moise, ka vi: “Tanu hega, igamurua kamuru bêngenigami hura tenia i Esipito, kami meme igê na bagamasusu raha ikê? I ngekana i Esipito hete na ngêra ma na ve ka aharêsigami ngavê. Ma i ngekê igami kami ngêgi makira na ngêra i pe koro.”

⁶Vikê na Araha ki kasira na ma garahunu i berarogata na enoni, ma ka garahunira rako na Isiraelita.

⁷Na enoni ka râ tanga o Moise ma ka vi: “Igami kami tasi, suria mi hagagege tangagamurua na Araha ma igo. Hoi, gu nungia na Araha, ke hagamagahurura râ na ma igê.” Vikê o Moise ki avarasia God, ke takuira na enoni.

⁸Na Araha ki bonasia o Moise, ki tagarahia na nununa na ma renia na kapa, ma ki kuharenia igê na u, hanana na anima na enoni, na ma ki gagarea, ngaia ki tahitahi renia, matena i bâsia.

⁹Vikê o Moise ki tagarahia na nununa na ma renia na kapa ma ki kuharenia igê na u. Ma na anima na enoni na ma ki gagarea, ngaia ki bâsia ma ki tahitahi.

¹⁰Na Isiraelita ka râ nga ma ka tênga i Oboto.

¹¹Tenia i ngekana ngaira ka tênga nikâ i Habarimi, na hinua i aruhuruhu igê na masusu i kerekê i Moaba.

¹²Ma hemuri ngaira ka tênga igê na maruguna na ve i Serete.

¹³Tenia i ngekana ngaira ka tênga nikâ i na apanena râ na ve i Aranone. Na ve i Aranone ki haganega me tenia na bagamasusu raha ma ki râ igê na apanena iata na Amorita. Ngaia ki voasia na apanena iata na Moabita tenia na apanena iata na Amorita.

¹⁴Tahema na buka ni hearihatana iana na Araha ki tamasi renia na hinua i Wahebe i Supa ma renigi na maruguni na ve i Aranone,

¹⁵ma renigi na tarihani na bena i râ tanga na hinua i Ara ma tanga na pereperegana i Moaba.

¹⁶Tenia i ngekana ngaira ka râ tanga i Wekaru. I ngekana na Araha ki vi tanga igê o Moise, ki vi: “Gu hagahakura me na enoni, ma be vatera na ve ke tono.”

¹⁷I na matena ngekana na Isiraelita ka kiria na ki ikê: “Wekaru, gu vategami na ve ma kami kiki vagevagesigo

¹⁸Wekaru, na maneraha ma na meraha ka aoparigo renigi na vato ni arahanga ma renigi na vato iata.” Ngaira ka pania na bagamasusu raha tanga i Matana,

¹⁹ma tenia i ngekana tanga i Nagaliele, ma tenia i ngekana tanga i Bamote.

²⁰Ma tenia i Bamote ngaira ka râ tanga na maruguna i na hunana na hungana i Pisiga i na apanena iata na Moabita. Tenia na botona na hungana i Pisiga ngaira ka bâsia vato na bagamasusu raha.

²¹Na Isiraelita ka hagatorangenira na mane tora tamasinga tanga o Sigone na maneraha iata na Amorita.

²²Na mane tora tamasinga ngegana ka vi: “Nakagami kami ri i na apanena iamu. Igami ma na togoha iamami kami arâ ma i tara. Igami ki asa vigami râ igê na mu iami se vi igê na pariki na vaini iami, ma ki asa vigami tono igê na vekaru iami. Igami kami ototo suria ma na tara raha, mataro me kami huhura tenia na apanena iamu.”

²³Ma o Sigone ki usi, vige nakara na Isiraelita, hanana vige ri igê na apanena iana. Ngaia ki hagahakura na mane ni me iana, ma ngaira hato ka râ i Jahasi igê na bagamasusu raha ma ka taharira igê na Isiraelita.

²⁴Ma na Isiraelita ka meraheariha ma ka nahuira rako na merongata ma ka rêa na mako iata haganega tenia na ve i Aranone tanga na ve i Jaboko, na pereperegana na apanena iata na Amonita, ga ramoramo pusia na pereperegana na apanena iata.

²⁵Vikê na Isiraelita ka henahuraugi na hinua hato iata na Amorita henia na hinua i Geseboni ma henigi na hinua hato rihia, ma ka ogasigi.

²⁶I Geseboni ki na hinua raha iana o Sigone na maneraha iata na Amorita. Ngaia ki meheariha na ani hagenago na maneraha i Moaba ma ki henahuraugi na mako hato iana rârâ ma ki tariha igê na ve i Aranone.

²⁷Tahema na enoni ga barobaro ki, ka ki vikê: “Râ me i Geseboni, na hinua raha iana o Sigone na maneraha. Na hinua ke tagarahia aporo.

²⁸Tenia na hinua ikê i Gesebone na mane ni me iana o Sigone ka tavoraha ni hearihatana, manga na gi i ruhuruhua na hinua i Are i Moaba henigi na ani igê na hungani igê na tarihani na ve i Aranone.

²⁹I era ngavê tangagamu na ai ni Moaba. Igamu mu hagarapea Kemosi, igamu kamu mute hato. Na ataro iami ki katora na mane ka gava tangagi na agua getigi ma na maneraha iata na Amorita ki henahuraura na gete.

³⁰Ma i ngekê na raraha iata ka mute haganega tenia i Gesebone tanga i Tibone. Na hinua hato ka aruhuruhu haganega tenia i Nasimi tanga i Nopa ma tanga na hinua i Meteba.”

³¹Vikê na Isiraelita ka ogasia na apanena iata na Amorita.

³²O Moise ki hagatorangenira na mane ka râ bâbâ, hanana viga tarahua, manga i he ka girara ga henahuraua na hinua i Jasere. Na Isiraelita ka henahuraua henigi na hinua rihia, ma ka tarigenira hura na Amorita, ga oga i ngekana.

³³Hemuri na Isiraelita ka apariri ma ka râ suria na tara tanga i Basani ma o Ogo na maneraha i Basani ki ragame ma ki taharira i Eterei.

³⁴Na Araha ki vi tanga o Moise, ki vi: “Siana ko magutenia. Inê kê katogo, ko teharira ngaia ma na kariana hato, ma ko henahuraua na mako hato iana. Gu katoa manga go katoa noga o Sigone na maneraha iata na Amorita, i marungia i Geseboni.

³⁵Vikê na Isiraelita ka nahuia ki me o Ogo henira o karena ma henira na kariana hato. I pe hita so rârâ tani. Ma hemuri ngaira ka ogasigi na mako iata.