Read Kahua TOMAHA NINUNI 22 Bible Online

TOMAHA NINUNI 22 - Kahua bible

TOMAHA NINUNI 22

¹Na Isiraelita ka râ nga, ma ka tênga igê na bena i Moaba, i na apanena akê i ve i Jotano, i avorana tarê i hinua i Jeriko.

²Matena na maneraha i Moaba, o Balaka o karena o Sipore, ki rongogi na parongata na Isiraelita tangara na Amorita, ma ki girara, vi na Isiraelita ka rako teha,

³ngaia ma na kariana hato ka magu ngavê.

⁴Na ai ni Moaba ka vi tangara na enoni raha i Mitiani, ka vi: “Na Isiraelita ngegana ka page sinogi vê na ara ni marâ hato iamami. Ngaira ka maratorata na puruka mane ga ngê hagamagahurugi na go.” Tahema na maneraha o Balaka

⁵ki kasira na mane tora tamasinga, ka nungia o Bileama karena o Beore, hanana vi arâ me. O Bileama ki oga i Petora hagarangia na ve i Uparatesi i na apanena iata na Amavita. Na tamasinga iana o Balaka tanga o Bileama ki manga ikê: “Inê kê obania be hagarongogo, vi na enoni gahu ga bani râ me tenia i Esipito. Ngaira ka totoko surigi na ara ni agua. Ngaira ka sugi raua na apanena iamami.

⁶Ngaira ka rako teharigami. Inê kê nungigo, hanana go arâ me nga, ko tamaniê ko kuasira. Vikana igami vari kami page teharira ma kami tarigenira hura tenia na apanena iamami. Inê kê bani girara, manga vigo nunginungi, hanana na koroha ki page tarahura na enoni, na koroha ki tarahura. Ma ki manga vigo kuasira, na kuasiha ki tarahura.”

⁷Vikê na enoni raha i Moaba ma i Mitiani ka migirâ na haga na vatevate mena na kuasiha, ma ka râ i pasina o Bileama, ma ka hagarongoa renia na tamasinga iana o Balaka.

⁸O Bileama ki vi tangara, ki vi: “Mu mêru so ikê. I gomaha inê kê page hagarongogamu renia na tamasinga iana na Araha tangê.” Tahema na enoni raha iata na Moabita ka oga so i pasina o Bileama.

⁹God ki râ me i pasina o Bileama ma ki hagatea, ki vi: “Vati ka na mane ga oga i pasimu?”

¹⁰O Bileama ki arami, ki vi: “O Balaka na maneraha i Moaba ki hagaguhira me, hanana ga hagarongoê,

¹¹renira na enoni gahu, ga râ me tenia i Esipito ma ka totoko suria na agua hagenani. Ngaia ki obaniê, vigê tamania kê kuasira, hanana ngaia ki girara i meraheariha ma ki tarigenira hura.”

¹²God ki vi tanga o Bileama, ki vi: “Siana ko râ henira na mane ngegana. Siana ko kuasira na Isiraelita, suria inê kê ngahisira.”

¹³Ki tangi me mo Bileama ki râ i pasita na mane tora tamasinga tenia o Balaka, ma ki vi: “Mu aporo i pasimi. Na Araha ki manimaniê, vi siana kê arâ henigamu.”

¹⁴Vikê ngaira ka aporo i pasina o Balaka, ma ka hagarongoa, vi o Bileama ki usi vige râ me henira.

¹⁵Ma hemuri o Balaka ki hagatorangenira rako era na enoni raha, ga raramohaga teharira na ani i kasira i nago.

¹⁶Ngaira ka râ i pasina o Bileama ma ka hagarongoa renia na tamasinga iana o Balaka, ka vi: “Inê kê nungigo nga, siana ko naka ta na tarana ki hagabarasigo, vigo arâ me i pasiku.

¹⁷Inê kê page vurigo raha, ma kê page tanugi na ani mavê na marâ go visigi. Râ me ku tamaniê, ku kuasira na enoni ngegana.”

¹⁸O Bileama ki arami, ki vi: “Naka ma o Balaka ki vateê na ara ni siliva hato ma na golo hato i ruma raha iana, inê ki bara tangê, vi ve haritohea na tamasinga iana na Araha God iaku, naka ma vi na kere marâ sisite, inê ki asa ve guguruga.

¹⁹Hoi, mu mêru so ikê mangara na tamami i nago. I gomaha vari ma kê kahu girara, vi na Araha ki vateê na tamasinga haoru se mareha.”

²⁰Igê na bungiana ngekana God ki râ me nikâ i pasina o Bileama, ma ki vi: “Manga vi na mane, ga râ ngegê, ma ka nungigo, hanana vigo arâ henira, hoi, go hagarurugu ma ko arâ. Go arâ suria ma na tarana gê visia tangago.”

²¹Hoi, ki tangi me ma o Bileama ki naka na âgâga i gerina na tonki iana ma ki râ henira na enoni raha ni Moaba.

²²God ki mangariaga, suria o Bileama ki râ. Na kariana gi rua karu râ henia. Matena o Bileama ki tage ki arâ igê na tonki iana, na angero iana na Araha ki ura pusia na tara, i arâ igê.

²³Matena na tonki ki bâsia na angero i meura na tatapa borahu i ngekana, na tonki ki râ hariri tenia na tara. O Bileama ki tahurua na tonki ma ki meaporo harê i tara.

²⁴Hemuri na angero ki ura i tara, igê na agua i roro i berarogaterua na pariki ni vaini ma na panga na hê garu oga hetangenia na tara.

²⁵Matena na tonki ki bâsia na angero, ngaia ki râ ngahisia na panga na hê, ma na êgana o Bileama ki garasi henia igê. Vikê o Bileama ki tahurua nikâ na tonki.

²⁶Na angero ki nanago râ nikâ, ma ki ura i tara, igê na agua i herugi ngavê ma ki mareha rârâ igê vi na kere teha.

²⁷Matena na tonki ki bâsia na angero, ngaia ki tâ so. O Bileama ki mangariaga tanga na tonki ma ki tahurua renia na vato iana.

²⁸Hoi, na Araha ki katoa na tonki ki tamasi. Na tonki ki vi tanga o Bileama, ki vi: “Na ta kê erasigo renia? Tanu hega go tahuruê? Hageoru noga!”

²⁹O Bileama ki arami, ki vi: “Ma kani suria igo ko hagabekasiê va! Manga ve nahunia na tatapa borahu, inê be bani ahurago renia nge.”

³⁰Na tonki ki arami, ki vi: “I hega, na tonki iamu kani inê se mareha? I hega, igo ko tagiriê igê na ogaha hagenani iamu se mareha? I hega, inê kê bani katogo noga vikê i nago se mareha?” O Bileama ki arami, ki vi: “Mareha ngavê.”

³¹Hoi, i ngekê nga na Araha ki katoa o Bileama ki bâsia na angero, i meura na tatapa borahu i tara. O Bileama ki susure ki tubê so i ano.

³²Na angero ki tamasi ramo, ki hagate, ki vi: “Tanu hega ko tahurua hageoru na tonki iamu? Inê nga kanigê urapusigo, suria i pe ararigo, vigu katoa na râha ngekê.

³³Na tonki iamu kani bâsiê ma ki aharê hageoru tenia na tara. Manga vi ngaia ma ke pe kato vikana, inê be bani ahurago igo, mareha vi na tonki.”

³⁴O Bileama ki arami, ki vi: “Inê kê tasi bâraha. Inê kê pe girara, vi igo kani go urapusiê i tara. Manga go takusia, vi pe oto tangê hanana vi ve arâ, hoi, inê be aporo i pasiku.”

³⁵Na angero ki vi: “Hoi, go arâ henira na mane ngegana, ma ko visia ma na marâ, gê page bonasigo renia.” Vikê o Bileama ki râ nga henira.

³⁶Matena o Balaka ki rongoa, vi o Bileama i râ me, ngaia ki râ vurusia i hinua i Are i ve i Aranone igê na taritarihana i Moaba.

³⁷O Balaka ki hagatea o Bileama, ki vi: “Tanu hega, ko pe bani râ me, matena gê kasi tamasinga hagenago tangago? Go takusia vari, vi inê kê pe girara ve vurigo raha?”

³⁸O Bileama ki arami, ki vi: “I hega, inê kê pe râ me? Inê kê pe girara vari vi manga i he kê girara gê tamanigo, suria inê kê girara ma gê visia na marâ, God ki bonasiê renia.”

³⁹Hoi, o Bileama ki râ henia o Balaka tanga na hinua i Gusote.

⁴⁰I ngekana o Balaka ki nahuira igê na puruka ma na sipi tanga na vogasiha, ma ki vatera o Bileama ma na enoni raha ga râ henia tani na hasigoni.

⁴¹Ki tangi me mo Balaka ki metagere o Bileama i Bamote Bala. I ngekana o Bileama ki bâsia igê ta na apanini me na Isiraelita.