Read Kahua TOMAHA NINUNI 23 Bible Online

TOMAHA NINUNI 23 - Kahua bible

TOMAHA NINUNI 23

¹O Bileama ki vi tanga o Balaka, ki vi: “Gu tagarahigi igê na bea gi pi ni vogasiha ma ko torera me na puruka mane gi pi ma na sipi mane gi pi.”

²O Balaka ki kato vikana, ma ngaia mo Bileama karu susu renirerua na puruka mana ma na sipi mane igê na ara ni hitangini na bea ni vogasiha.

³Hemuri o Bileama ki vi tanga o Balaka, ki vi: “Go migioga so nga ikê na ganiani vigaru susu renigi. Inê kê arâ, hanana gê girara, vi na Araha ki râ me tangê se mareha. Inê kê page hagarongogo renigi na marâ hato, i page hagagirarê renigi.” Vikê ngaia ki tagere getea igê na botona na hungana.

⁴God ki râ me i pasina. O Bileama ki vi tanga God, ki vi: “Inê kê bani tagarahigi na bea gi pi ni vogasiha ma kê bani susu igê na ara ni hitangini renirerua na puruka mane ma na sipi mane.”

⁵Na Araha ki hagagirara o Bileama renia na marâ, i tuguhia vi visia, ma ki hagatorangenia aporo tanga o Balaka, hanana i hagarongoa renia na tamasinga iana.

⁶Vikê o Bileama ki aporo ma ki tarahua o Balaka henira na enoni raha i Moaba, ga migioga mêngara na ganiani, vigaru susu renigi.

⁷O Bileama ki tamasi poropete, ki vi vikê: “O Balaka, na maneraha i Moaba, ki uniê me ikê tenia i Siria, tenigi na hungani i kerekê. Ngaia ki vi, ‘Râ me ku tamaniê, ku kuasira na Isirealita.’

⁸Tanu hega kê girara vigê kuasira na enoni God ki pe kuasira? Tanu hega kê girara vige arangenira tanga na hagaitangiha manga vi na Araha ma ki pe katora vikana?

⁹Tenia na botona ikê inê kê bâsira. Tenia na hungana ikê inê kê hahutugira. Ngaira nga ka na enoni ga tora getera ngavê, na enoni God ki bani atera tanga ngaia marena.

¹⁰Na raraha iana o Isiraele ka gahu teharigi na momo. I asa ta na enoni ge girara, vige tomanira. I marisiku ma vi ve me manga na hitangita na kariana God. I marisiku ma vi ve me manga na hitangita na enoni ngegana ga hagakoro obana God.”

¹¹Hemuri o Balaka ki hagatea o Bileama, ki vi: “Na tarana ta ko katoa tangê? Inê kê unigo me ikê, hanana vigo kuasira na merongaku, ma igo ko nungia ma God ki korokoro tangara!”

¹²O Bileama ki arami, ki vi: “Inê kê girara gê visia ma na marâ, na Araha ki bonasiê renia.”

¹³Hoi, o Balaka ki vi tanga o Bileama, ki vi: “Râ me, karu râ i ta na agua getea. Tenia i ngekana igo ko page bâsira tani ma na Isiraelita. Gu tamaniê ku kuasira i ngekana.”

¹⁴Ngaia ki metagere tanga na bena i Sopimi igê na botena na hungana i Pisiga. I ngekana ngaia ki tagarahigi nikâ igê na bea gi pi ni vogasiha ma ki susu igê na ara ni hitangini renirerua na puruku mane ma na sipi mane.

¹⁵O Bileama ki vi tanga o Balaka, ki vi: “Gu migiura so ikê na ganiani, vigaru susu renigi, ma be râ inê vurusia God ikana.”

¹⁶Na Araha ki mehetarahu o Bileama ma ki hagagirara renia na tamasinga iana tanga o Balaka, ma ki kasia ki aporo ma ki hagarangoa o Balaka renia.

¹⁷Vikê ngaia ki aporo ma ki tarahua o Balaka ma na enoni raha i Moaba ka migiura mêngara na bea ni vogasiha, ga susu igê. O Balaka ki hagatea o Bileama renia na tamasinga iana na Araha.

¹⁸O Bileama ki tamasi poropete vikê: “O Balaka, karena o Sipore, gu rongo, gu karingê.

¹⁹God ki pe maratorata na enoni ni hagaparunga. Ngaia ki pe maratorata na enoni i herua tare na parongata. Ngaia ki hagamonarigi tare na suruha iana. Ngaia ki tamasi ma, ma ka voravora me.

²⁰Ngaia ki bonasiê, hanana gê visia na ramana tangara na Isiraelita. Na ramana ngekê ki gâga hagahu.

²¹Inê kê bani bâsia râ, vi i hemuri me na bagabevoani ma na mamasiaganiha ki asa vige page tarahura na Isiraelita. Na Araha God iata ki ngahisira tare. Ngaira ka visia, vi ngaia nga kani bêngenira.

²²God ki bêngenira hura tenia i Esipito. Ngaia ki ramo pusira manga na puruka mane vasiga.

²³I mareha rârâ vi na harikuaniha se na kuasiha hanana vige katogi tangara na Isiraelita. Haganega tenia i ngekê na enoni ka tamasira na Isiraelita, ka vi, ‘Bâ, na tauhana raha God!’

²⁴Na Isiraelita ka manga na laione ramo. Ngaia ki pe mamaro, mataro me ki ngasingasi ma ki unumigi hato na ganiani, mataro me ki tonomigi hato na gaputa.”

²⁵Hemuri o Balaka ki tamasi tanga o Bileama, ki vi: “Igo ko usi vigu kuasira. I koro ma. Ma siana ko nungia God, ki korokoro tangara!”

²⁶O Bileama ki arami, ki vi: “I hega, inê kê pe bani hagarongogo vari, vi inê ki tuguhiê, vigê katogi ma na marâ, God ki bonasiê renigi?”

²⁷O Balaka ki vi tanga o Bileama, ki vi: “Gu râ me heniê tanga na agua getea nikâ. Vari God ki page hagamarumungenigo, hanana go tamaniê ko kuasira i ngekana.”

²⁸Vikê ngaia ki metagere o Bileama igê na hungana Peore, i bâsia so na bagamasusu raha.

²⁹O Bileama ki vi tanga o Balaka, ki vi: “Gu tagarahigi me ikê na bea gi pi ni vogasiha ma ko torera me na puruku mane gi pi ma na sipi mane gi pi.”

³⁰O Balaka ki kato vikana ma ki susu renirerua na puruka mane ma na sipi mane igê na ara ni hitangini na bea ni vogasiha.