Read Kahua TOMAHA NINUNI 24 Bible Online

TOMAHA NINUNI 24 - Kahua bible

TOMAHA NINUNI 24

¹Ngekana o Bileama ki girara, vi i tuguhia, vi nungia na Araha ki korokoro tangara na Isiraelita. Tahema ngaia ki pe garigi na giraraha. Ngaia ki maatia na bagamasusu raha.

²Ngaia ki bâsira na Isiraelita, ga tênga hehegitigi surigi na varo ninuni iata. Na raramohana God ki angaria,

³o Bileama ma ki tamasi poropete vikê: “Inê o Bileama, karena o Beore, kê tamasi vikê: Inênga ka na ani gê bâsigi na marâ ga pinihi.

⁴Inê kê rongogi na marâ God ki visigi. Inê kê hagata ma kê boretenia na maruteha tenia God raramohaga hunia.

⁵Isiraelita, igamu kamu page ogasigi na ruma na gahu bâkoro era.

⁶Na hinua iami, ka page oga igê na ramana ma ka page oga harahara borahu mangagi na pariki raha na ni igê na maruguni mangagi na mu i papana na ve mangagi na ago i hasigi na Araha mangagi na ao i na akerena na ve.

⁷Na rangi ki page aharêsira igê na mateni tanga. Na mu iata ka page oga igê na mako ruruhutoga. Na maneraha iata ki page ramo teharia o Agaga. Na arahanga iana ki page arâhigi na agua hagatê.

⁸God ki bêngenira hura tenia i Esipito. Ngaia ki ramo pusira manga na puruka mane vasiga. Ngaia ki mutera ngavê na merongata, ki rumurumugi na surita ma ki kumukumugigi na mage iata.

⁹Ngaia ki manga na laione ramo. I bara vige hagaritea, matena i mêru. Na enoni i nungia God ki korokoro tangara na Isiraelita, God ki korokoro tanga ngaia nogana. Na enoni i kuasira na Isiraelita, ka page kuasia ngaia nogana.”

¹⁰O Balaka ki mangariaga, ki rumigi na rimana ma ki vi tanga o Bileama, ki vi: “Inê kê unigo ko râ me, hanana vigo kuasira na merongaku, ma hete go nungia hageoru God, ki koro tangara.

¹¹Gu aporo i pasimu! Inê kê bani vi, vigê vurigo raha, ma na Araha ki urapusia na vurimu.”

¹²O Bileama ki arami, ki vi: “Inê kê bani vi tangara na mane tora tamasinga iamu tangê,

¹³vi henaka manga vi igo ma ko vateê na ara ni siliva ma na golo hato i ruma raha iamu, i asa, be haritohea na tamasinga iana na Araha, be katoa mareku ta na marâ. Nga noga ma na marâ na Araha ki bonasiê renia, vigê visia.

¹⁴O Bileama ki vi tanga o Balaka, ki vi: “Hoi, inê kê aporo i pasiku. Ma hagenago ma kê kahu arâ, inê be hagarongogo renigi na marâ, na Isiraelita ka page katogi tangara na kariamu i na matena i muri me.

¹⁵Vikana o Bileama ki tamasi poropete vikê ki vi: “Inê o Bileama, karena o Beore, kê tamasi vikê: Inênga ka na ani gê bâsigi na marâ ga pinihi.

¹⁶Inê kê rongogi na marâ God ki visigi. God raramohaga hunia ki hagagirarê rênigi. Inê kê hagata ma kê boretenia na maruteha i râ me tenia God raramohaga hunia.

¹⁷Inê kê bâsia manga i he ki page bâ na matena i muri me. Inê kê basira na Isiraelita. Na maneraha, i manga na higu i mave ngavê, ki page rêra akê i berarogata na Isiraelita. Ngaia ki page gaha me tenia i Isiraele manga na ataro tari. Ngaia ki page tahuru hunira na enoni raha i Moaba. Ngaia ki page menamenarigi na ratani na bêta na ai ni Sete.

¹⁸Ngaia ki page teharira na merongana ni Etome ma ki page henahuraugi na mako iata. Na Isiraelita ka page ama ni tehateha nga.

¹⁹Na Isiraelita ka page purira so i ano ma ka page mutera ngavê ngaira hato.”

²⁰Ma hemuri igê na maruteha iana o Bileama ki bâsira na Amalekita, ma ki tamasi poropete vikê: “Na Amalekita ka ramo teharira na ani getera hato. Henaka, ma ngaira ka page mutemute hato ngavê.”

²¹Igê na maruteha iana ngaia ki bâsira nikâ na Kenita ma ki tamasi poropete vikê: “Igamu na raraha iana o Kaini kamu oga purunguni i pasimi. Igamu kamu asitatara manga na robona na manu igê na tarihu.

²²Ma igamu ka page sinogamu, matena i Asiria ki henahuraugamu.”

²³O Bileama ki tamasi poropete nikâ, ki vi: “Ti ka na ai asi ga haku me? Ngaira ka page roherohe bana me tenia i Saipero tanga na hearihatana.

²⁴Ngaira ka page henahuraura na ai ni Asiria ma na Hebereo. Ma ngaira nogata ka page mutemute ngavê.

²⁵Ma hemuri o Bileama ki aporo i pasina, ma o Balaka ki aporo nogana.