Read Kahua TOMAHA NINUNI 25 Bible Online

TOMAHA NINUNI 25 - Kahua bible

TOMAHA NINUNI 25

¹Matena na Isiraelita ka tênga igê na maruguna i Sitimi, na mane ka rongo era henira na gete ni Moaba, ga oga i ngekana.

²Na gete ngegana ka hagamura na mane ngegana tangagi na tangiani raha ni vogasiha tanga na ataro iata i Moaba. Na Isiraelita ka ngê na ngêra ni vogasiha ma ka vogasia na ataro o Bala Peore.

³Tahema na Araha ki mangariaga tangara.

⁴Ngaia ki vi tanga o Moise, ki vi: “Go têtê viteaku! Gu hagamagahurura nga mave na enoni raha hato iata na Isiraelita, ma ki kahu hatohato na mangariaganiha iaku tangara na Isiraelita.”

⁵O Moise ki vi tangara na mane ni hagaotonga, ki vi: “Na ara ni hitangimi ki tuguhia, vi nahuira ka meme na ara ni mane igê na varo ninuni iana, i vogasia o Bala Peore.”

⁶Ta na hitangita na Isiraelita ki mebanu na gete ni Mitiani igê na ruma na gahu iana i maata o Moise ma na enoni hato, matena ga angiangi maramara i maana na ruma na gahu iana Araha.

⁷Matena o Pinegasi karena o Eleasare ma o vesina o Aroni na mane ni vogasiha ki bâsia vikana, ngaia ki aharaga tenira na enoni. Ngaia ki tabea na ora,

⁸ma ki banu surirerua na mane ma na gete igê na ruma na gahu, ma ki ahurarerua. Vikana na ringa i mutera na Isiraelita, ki kahu hato tenira.

⁹Ma na ringa ngekana ki bani nahuira me na 24, 000 na enoni.

¹⁰Na Araha ki vi tanga o Moise, ki vi:

¹¹“Suria o Pinegasi ki kato vikana, inê ki hato vi ve mangariaga tangara na Isiraelita. Suria ngaia ki obanira na enoni, viga vogasiê inê geteê ma, tahema inê kê pe mutera na enoni igê na mangariaganiha iaku.

¹²Hoi, gu vi tanga, vi inê kê naka na suruheri iaku henia, na suruheri i asa vige page hato.

¹³Inê kê atera ngaia ma na raraha iana ka heheuri ka voravora re na mane ni vogasiha tare, ki bê ki arâ, suria ngaia ki usitenia ngavê na vogasiha ni ataro. Tahema inê kê bonotenigi na tasi iata na enoni.”

¹⁴Na atana na Isiraelita ga nahuia henia na gete ni Mitiani ngekana ka no Simiri karena o Salu, i araha tanga ta na hitangita na apaparaha igê na varo ninuni iana o Simeone.

¹⁵Na atana na gete kani ka Kosibi. Vaemana ki no Sure, i araha tangagi tani na hagosi ninuni i Mitiani.

¹⁶Na Araha ki bonasia o Moise, ki vi:

¹⁷“Gu taharira na ai ni Mitiani ma ku mutera,

¹⁸suria ngaira ka erasigamu, matena ga hagaparugamu i Peore, ma suria nikâ ka Kosibi, ga nahuia igê na matena na ringa i Peore.”