Read Kahua TOMAHA NINUNI 27 Bible Online

TOMAHA NINUNI 27 - Kahua bible

TOMAHA NINUNI 27

¹Ka Magala, ka Noa, ka Gogala, ka Milika ma ka Tirisa, ngaira kani ka karena o Selopagata, o karena o Gepere. Ngaia ki no karena o Gileata, o karena o Makire. O Makire ki no karena o Manase, o karena o Josepo.

²Ngaira ka râ ma ka ura i maata o Moise, o Eleasare, na mane ni vogasiha, na enoni raha iata na Isiraelita ma na enoni hato igê na maana na ruma na gahu apuna iana na Araha.

³Ngaira ka vi: “O vaemamami ki bani me igê na bagamasusu raha ma ki pe apara kare mane rârâ. Ngaia ki mareha vi na kariana o Koraga, i guguruga tanga na Araha. O vaemamami ki me renigi na tasi iana marena.

⁴Tanu hega na atana o vaemamami ki magahuru nga tenia i Isiraele? Suria vari vi pe apara kare mane? Mu vategami nogamami tagua na mako mangara na goana o vaemamami.”

⁵O Moise ki hagate tarana na tarana ngekê i pasina na Araha.

⁶Na Araha ki vi tanga o Moise, ki vi:

⁷“Na tarana ka karena o Selopagata ka nungia, ki na tarana i oto. Gu vatera nogata tagua na mako mangara na goana o vaemata. Ngaira ki arari, viga nahunia na nahuninga iata na vaemata.

⁸Gu vi tangara na Isiraelita, vi manga na mane i pe apara kare mane ma ki me, ka karena ki nahunigi nga na nahuninga iana.

⁹Manga i pe apara nikâ na kare hehene, o goana ka nahunigi ngaira.

¹⁰Manga vi pe meravora goana, o goana o vaemana ka nahunigi ngaira.

¹¹Manga i pe tonga o goana, se na mona, se na vaemana hagareha, vikana na goana mêri ka nahunigi ngaira mangagi na nahuninga iata mareta. Na Isiraelita ka hagahigasia maninga nga na ramata ngekê, manga inênga na Araha gê bonasigo renia.”

¹²Na Araha ki vi tanga o Moise, ki vi: “Gu tagere igê na Hungana Abarimi, ma ku bâsia râ na agua, gê page haganahunira na Isiraelita renia.

¹³Matena go bâsia hato, igo ko kahu meme manga o veogamu o Aroni,

¹⁴suria igamurua kamuru pe tê viteaku igê na bagamasusu raha i Sini. Matena na Isiraelita hato ka hagagege tangê i Meriba, igo ko pe hagagirarara na enoni reniê, vi inê ka na God raramohaga huniê.” I Meriba ki na ve banga i Katesi igê na bagamasusu raha i Sini.

¹⁵O Moise ki nunginungi, ki vi:

¹⁶“Araha God, na mêriha hato ka râ me tenigo. Inê kê nungigo, ko atea na mane i girara i bêngenira na enoni,

¹⁷ma ki girara i bêngenira igê na hearihatana, hanana siana na kariamu ka maratorata na sipi i mareha na avanuta.”

¹⁸Na Araha ki Arami, ki vi: “Gu atea o Josua o karena o Nune. Ngaia ki na mane i araria. Go têtêbuhia.

¹⁹Go naka ki rêra i maata o Eleasare na mane ni vogasiha ma na enoni hato. Ma i ngekana i maata na enoni hato ko kasia ki rêra urusigo.

²⁰Go hagatarêngenigi tanga tani na ramoha iamu maremu, hanana na Isiraelita hato ka têtê viteana.

²¹Ngaia ki page hagate tarana i pasina o Eleasare na mane ni vogasiha, i page giraragi na obaniha iaku renigi na hê ni girarasiha. Vikana o Eleasare ki page hagaotora o Josua ma na Isiraelita hato igê na ogaha iata hagenani.”

²²O Moise ki kato manga na Araha i bonasia. Ngaia ki naka o Josua ki ura i maata o Eleasare na mane ni vogasiha ma na enoni hato.

²³Ngaia ki têbuhia o Josua ma ki kasia ki ura urusia, manga i bani visia na Araha.